Read South Giziga Bar 5 Bible Online

Bar 5 - South Giziga bible

Bar 5

¹Zeruzalem, cuko jibe ɗik ngi bonoy ati ngi vagay na avra, ɓa ki ki gwat ngi wuya mezle, ngir dudok ngi Buymisemuŋ hã ngi samadin.

²Gijiwa godo ɗik ngi gi gwat mijeŋŋe maso tivi Buymisemuŋ, yo tuwuɗa hirnga ti loppol ngi gi dudok da Buymisemuŋ.

³Asi Buymisemuŋ a sa buga wucuɗ ɗik na, asi gazlavay kurzluˀ gar.

⁴A sa cuw slimiɗ ani ngi set wãˀ: «Gi gwat mijeŋŋe mavul zuy waɗ pura ircece mavul dudok».

⁵Zeruzalem slikiɗi, cici deŋ ar ɗigar, pur hiri kini tisi pas ngi mipriki: Pura ziri ɗikey makusoko hirnga tika tika gar, tisi pas ngi pastaˀ hã asi pas ngi mipriki, i mingiɓi ngi Buymisemuŋ mipal makuso taŋ hirnga. A ra mumulom asi Buymisemuŋ a wuluk le keŋ ar taŋ.

⁶A bam ti hay ɗike ti sar, i mesene taŋhay muɓulaka taŋ. Amma Buymisemuŋ a mo taŋ le ng’avi ka amuŋ, paɗ paɗ a muŋ, ti dudok, kaɓa mazuɓam buy ti janga naŋ.

⁷Asi Buymisemuŋ a ɓa daˀ le, ɓa muwã migila subur gar, waɗ li miɗingire misi zleˀehey, a maka taŋ nga ruwuy, a dika hurjijiŋheye le, ɓa li a tiri ɗalla, ɓa Israyel a ru ng’ar dudok ngi Buymisemuŋ ɗalla manja li mutuɗukum.

⁸Buymisemuŋ a ɓi daˀ na, jo widisey ati kalaf maŋzaˀam ndumo, a ɗiɗam timbiɗim, ɓa ngi ga susuɗuk da Israyel.

⁹Naŋ kine, Buymisemuŋ a sa ki sa Israyele, ti mumul,dudok naŋ a sago njahha ng’ar taŋ jom ti pura taŋ ircece waɗ ti gi taŋ mezle nganaŋ.