Read South Giziga Dan G 1 Bible Online

Dan G 1 - South Giziga bible

Dan G 1

¹Joˀ ti Hananiya ati Azariya waɗ Mikayele, makir taŋ, a ra laˀam a wuzla vu minjilim njilim. A ra zlam dimis ngi hunuma Bumbulvuŋ Buymisemuŋ.

²Azariya a cici deŋ a wuzla vu, a wuna mi a dir dibiɗ, a ɓi na:

³«Bumbulvuŋ, Buymisemuŋ ngi dideˀ ndrahay, sise ngi ɗiki. Anja mizli a hunumukuw, yo a gukuw dudok ngi caˀa.

⁴Asi gwat ka maga gar vur ndra na, taŋ jeŋŋe. Gwat ka maga gar naŋ kaslsla. Jiviɗ ɗikeye, taŋ cir cir, yo ki ga kiita ɗike njah wãˀ.

⁵Ndra ati Zeruzalem, walahay mipal ngi dideˀ ndrahaya, ki kuta ndra le ti bonoy mijeŋŋe, nana i gi kiita ɗik mijeŋŋe. Asi ki ga ndra gwat tayna gar vur mungra ndrahay.

⁶Naŋ kine, ndr’i gam mungra le, i gam moˀore le, hã i gwaham avi ka, ani i pulaka gi gwat malambaˀhaya ta na si.

⁷Ɓimuɗuva ɗikeye, ki vula ndra taŋ zle ɓa i lumam cira hiri ti taŋ, ani ndr’i cinaka taŋ mi ta, i gam taŋ slra ta, yo i sipaka taŋ ta ma na si.

⁸Ka mukuta ndra ti bonoy, yo gwatay ka miga ndra taŋ gar na, ki ga taŋ asi ka magi kiita mijeŋŋe.

⁹Ki vula ndra asi haŋ ngi mizli misi moˀore, mesene ndrahay, da mizli mislikiɗa ɓihey waɗ da buy malambaˀ miwãˀ ngi si ruwuy, magi gwat mijeŋ ta.

¹⁰Ani wurenna, ndra gawla ɗikey, ndra magukuw dudoko, i wunam mi ŋwew gu ta. Mesem a sirta ndra le wãˀ.

¹¹Aw Buymisemuŋ, vur slimiɗ ɗik na, anja ki pula ndra ngi wãˀ ta. Jumoˀay ɗik ati ndra na, ki wuɗka ta.

¹²Yo ka mapura ndra ircece vur ngama ɗik Abraham, vur gawla ɗik Izak waɗ vur Israyel mbur ɗik mipal na, anja ki susuyumo ta.

¹³Ki ɓa taŋ zleˀe ki sa sika dideˀ taŋhaya kaɓa wurzlaŋ ngi muŋhoy waɗ kaɓa muyuŋ ngi mi mubuliy.

¹⁴Aw buy ndra, ani i tiram le ndr’i sukwi meciɗek ngi wuzla sukwihey gar, yo asi ruwuyo wurenna, ndra migam gwat malambaˀ na, ndr’i ŋhihiyam le.

¹⁵Ar hin muwurenna, yerima ndra anta, mijiviɗ ndra anta, buy anta, mikuli ti ginew zlamzlam anta, mikuli ho gar anta, gwat ngi vul ngi gi mikuli anta, li wura urdihey anta, yo li ngi so ti gwat ngi migam ndrahay micikiɗeffehey ɓa ngi luma gi mezle anta.

¹⁶Na, ko membezleŋ ngi vu ndra muvus, yo musuɗuk ndra miŋhihiy na kwana, tuɓa ndra kine so.

¹⁷Tuɓa ndra kaɓa i gukuw di i mikuli mizlam zlam ti zlengerek ati gusoŋhoy. Yo kaɓa i gukuw di i mikuli ti tumuŋ muzlumbrahay durmuk mbeˀ mbeˀe. Sedege ndra magukuw di dana na, i ngi mbiɗi mevel ndrahay, tuɓa ndra di, yo pula ndra i supukuw hã ngi sete. Naŋ kine, mizli muvulukuw vu taŋhaya le da ka na, t’anta sa pam mesem ta.

¹⁸Ani wurenna, i ra supukuw ti mevel ndra wãˀ, i ra zluwunam ti ka, yo i wuɗam i lumaka deŋ ɗike.

¹⁹Ki pa ndra mesem ta, amma gi ti ndra weˀe avi ka mapul malambaˀ ngi mizli na, yo weˀe avi ka mapur ircece haɗa na ma.

²⁰Bumbulvuŋ, laha ndra weˀe avi gwat ngi zuma hirngahay, ka miga taŋ na, yo ga ɓa ɗik slimiɗ ɗik a zil.

²¹Mizli majuwam vu ngi gi malambaˀ da gawla ɗikey na, anja a gam welele, a pam mesem. Anja a wam mizli gu mata, yo anja gidaŋ taŋ a kiɗi.

²²Anja a sinaka, Bumbulvuŋ Buymisemuŋ asi ruwuyo i ka pal ɗiki.»

²³Dambalaka gawla ngi buyoy mihiziga taŋ ng’ar vu mihilɓiɓ tuwa, a ra ɗiyaka vu ko mbak le ta. A pam gudroŋ, mukuturɓuy, zeweɗ mufucu fucu ati dum, ɓa a tiɓi kuy kuy.

²⁴Irne vu a slikiɗ nga muŋ, metir kukur cuw nga mufaɗ.

²⁵A ra tiɓi giw giw, hã mizli Kaldehey mugun hirnga naŋ na, a wuram.

²⁶Amma modro ngi Bumbulvuŋ a po sar ng’ar zayvu ati ti Azariya waɗ ngama naŋhaya. Dar a baˀa irne vu tir zayvu avra.

²⁷Joˀ a tiri ti wuzlaˀa vu, kaɓa i himiɗ ngi wulngar mitisla vu. Ko vu anta wusa taŋ tika ta tika ta. Ko a gam bonoy ta, a ga taŋ ngaˀa ta.

²⁸Dar mizli ngamahay tuwa makir taŋ, a zlam dimis ti ˀay purla ti wuzla vu migiw giw, a gaka dudok da Bumbulvuŋ, a hunumakaŋ, a gakaŋ sise, a ɓam:

²⁹«Bumbulvuŋ, Buymisemuŋ ngi dideˀ ndrahay, sise ngi ɗiki. Ki ndila le ɓa mizli a hunumukuw, yo a jukuw salalay ngi sete. Anja a gukuw sise asi slimiɗ ɗik mipal mazil na, a hunumukuw, yo a jukuw salalay ngi sete.

³⁰Sise ngi ɗik, ka misi ar hay ɗik mipal ngi guw dudok ara na. Gakaŋ mezegwel, yo jakaŋ salalay ngi sete

³¹Sise ngi ɗik ka mijoˀ a hirnga kerubeŋhey na. Ki ndila le ɓa mizli a hunumukuw, yo a jukuw salalay ngi sete.

³²Sise ngi ɗik ka mijoˀ ar janga ɗik ngi buy na. Gakaŋ mezegwel, yo jakaŋ salalay ngi sete.

³³Sise ngi ɗik ka mijoˀ ar birngiŋ ngi muŋ na. Gakaŋ mezegwel, yo jakaŋ salalay ngi sete.

³⁴Kum gwatay mugukum gar na, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

³⁵Muŋ, ga dudok da Bumbulvuŋ. Gakaŋ mezegwel, yo jakaŋ salalay ngi sete.

³⁶Modro ngi muŋhoy, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

³⁷Yam ngi muŋhoy gar, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

³⁸Mizli ngi muŋhoy gar, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

³⁹Kum kiya ati pasa, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴⁰Wurzlaŋ ngi muŋhoy, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴¹Vuŋ ati wulngar gar, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴²Burgataŋhay, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴³Vu ati li muwik wik, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴⁴Li miyaɓ yaɓ ati pas mawur vu, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴⁵Wulng’ar ati vuŋ malasar, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴⁶Duvuɗ ati papasa, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴⁷Li minjahha ati luvuŋ, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴⁸Li mitisla ati himiɗ miyaɓ yaɓa, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁴⁹Slaslalay ati yam mubukbuk mija arleˀe, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁵⁰Li mawucuɗ ati kutuɓu, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁵¹Anja hirwuy gar a ga dudok da Bumbulvuŋ, anja a gaŋ muguzlum, yo a jaŋ salalay ngi sete.

⁵²Muŋwa ati li miɗingirey, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁵³Widis ngisi ruwuyoy gar, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁵⁴Mubuliy ati mizaw madiɗahay, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁵⁵Miviɗi viɗi ngi yamay, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁵⁶Kilif madiɗa ati gwat ngi si yamay, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁵⁷Ɗiyuw ngi ɓuhoy gar, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁵⁸Gwat misãmihey ati ginewey, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁵⁹Kum ziri ngi mizli, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁶⁰Israyeley, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁶¹Masayay, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁶²Gawla ngi Bumbulvuŋhoy, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁶³Kum musuɗuk ngi mizli mijeŋŋehey, gaka dudok da Bumbulvuŋ ti mevel kum wãˀ. Gakaŋ mezegwel, yo jakaŋ salalay ngi sete.

⁶⁴Mizli mipalay ati misi mevel mezlehey, gaka dudok da Bumbulvuŋ. Gakaŋ mezegwel, yo jakaŋ salalay ngi sete.

⁶⁵Hananiyas ati Azariyas waɗ Mikayel, gaka dudok da Bumbulvuŋ. Gakaŋ mezegwel, yo jakaŋ salalay ngi sete, asi a laha ndra le tir li ngi mizli mumucahaya, a laha ndra le tisi haŋ ngi mucu. A ɗiɗo ndra tir irne vu mihilɓiɓɓe, matiɓi giw giwe, yo a ɗiɗo ndra le tir vu.

⁶⁶Gaka sise da Bumbulvuŋ, asi naŋ kuy. Asi a pur ircece ngi sete.

⁶⁷Mizli gar, madilikam a mbuŋ Bumbulvuŋ, gaka dudok da Buy ngi gwat madilikam a mbuŋ naŋ gar. Gakaŋ mezegwel, yo jakaŋ salalay ngi sete, asi a pur ircece ngi sete.»