Read South Giziga Suz 1 Bible Online

Suz 1 - South Giziga bible

Suz 1

¹Mbur Yude ada a Babiloŋ, a zilaka Zoˀakim.

²A zuɓ ngwasa, a zilaka Suzan, zuŋ ngi Helkiyas. Naŋ kuy haɗa, yo a ra ɗuva hirnga kuy kuy da Bumbulvuŋ.

³Miyi naŋhay i mizli miteŋteŋhey, a gilakaŋ ti ɗuva hirnga da ɓimujuwa ngi Moyis.

⁴Zoˀakime, naŋ ti zlili haɗa. Ginew naŋhay ada gezleŋ taˀa, gweˀ a ciki hay naŋ. Mizli Yudehey ada soko nga pur naŋ haɗa, asi mizli gar a ra ɗuvakaŋ hirnga fineˀ mizli mekelemeye.

⁵Angi vi nah na, mizli micawwahay ada cuw awuzla Yudeheye, a wunaka taŋ ngi gi kiita. Bumbulvuŋ miɓi na, vur taŋ, a ɓi zleˀe: «Ɓi mijeŋ ta, a so ti Babiloŋ. A so tivi mizli micawwa migi kiitahay. A so tivi mizli magam kaɓa taŋ i mijigina mizli.»

⁶Mizli micawwa tayna, ada ram ndrehhe a hay Zoˀakime. Mizli, ɓi muluma taŋ le ngi ɗiyi na, a ra lumaka taŋ adiga.

⁷Da pas a gi le deŋ na, mizli a cohom, Suzan a ci nga liˀi ar gezleŋ ngi zil naŋ tuwa.

⁸Mizli micawwahay mucuw mapuraka naŋ maliˀi adiga ndrehhe na, a roko ti may naŋ.

⁹Ɓi naŋ a zliɗa taŋ lesl le wãˀ, hã a mbuɗam duba avu Buymisemuŋ, yo a wulkam ar kiita mijeŋŋe, taŋ magaka tuwa mata.

¹⁰Taŋ cuw taŋ, wuɗa Suzana, a tiɓi a mevel taŋ ka vu. Amma gwat magira taŋ a mevel na, t’anta ɓaka da cala ta,

¹¹asi taŋ mawuɗam hin ti Suzan na, mbur gar mesem a ra gaŋ ngi ɓa ɓi nah da cala.

¹²Akẽh, vur hin gar na, mbur gar a ra jiɗa Suzana, a ra gaŋ vekeɗ vekeɗ ngi pur naŋ.

¹³Ngi pas deŋ mekelem ada na, a ra boko ti hay, a wuɗukam, a ɓam: «Akum le nga hay ndrahay, pas ngi zum a gi le.»

¹⁴Amma a dirba nah na, mbur gar a mo brok midirba amuŋ. Taŋ misa zliram gagaŋ ar li misi purla na, a cufuɗam vu ar wala taŋ, vur gwat mimo ti taŋ na. Joˀ mbur gar a ɓa ɓi ngi may ngi hin ti Suzan majaŋ na muduba. A zilam mi arleˀe ngi sipi jiviɗ ngi sa luma Suzana silaŋ pal naŋ.

¹⁵A ra jiɗaka hine, ɓa a lumaka so. A ŋkeh na, ngi pas mekeleme, Suzan a ru ng’ar gezleŋ ngi ginewey kaɓa ŋhoyyo ma. Diyli migi slra naŋhay cuw tewle mikisakaŋ. Ti nana, li i liiriɓ, a wuɗ ɓa a bun.

¹⁶Ar li nana, ko mbur anta, sey mizli micawwahay, muɗum ɗum cuw, majiɗakaŋ na tewle.

¹⁷Suzan a ɓa diyli migi slra naŋhaya, ɓa a ra wuɗakaŋ mal ati urdi, waɗ a gicaka miviŋ ngi gezleŋ, ɓa a bun pusak vu.

¹⁸Diyli migi slrahay a cinakaŋ mi, a gicaka miviŋ madiɗa ngi ci ng’ar gezleŋheye, dar a bam tir miviŋ misi ti ciki, nga sipa gwat Suzan mawuɗ tuwa. Ko a puraka mizli micawwahaya ta, asi a ɗumom le kuy kuy.

¹⁹Diylihey micohom si na, a boko yar tir li ɗum taŋ, a kilam hir ng’ar Suzan tuwa,

²⁰joˀ a ɓakaŋ: «Miviŋ i migicahay, ko mbur mapura ndra anta. Ndra ada ti may ɗike haɗa haɗa, ki ngum ɓa i hinam ti ka kwa?

²¹Da ki ngum ta na, i sa kupukuw ɓi, i sa ɓam ka muɓula diyli migi slra ɗikey na, ɓa ki ndiram pal kum ati mangal gawla.»

²²Suzan a niˀic, dar a ɓa taŋ: «Y’ani awuzla mazaɓ manja li bi. Da i tuɓa cufuɗ kum na le, naɓa a sa gikiy kiita ngi muc, asi i gi madama le, da i ngum ta, naɓa y’anta sa lih tisi haŋ kumo ta.

²³Na, ya mara gi mungra a mbuŋ Bumbulvuŋ na, zuwen ya madiɗ asi haŋ kum manja i gi gwat malambaˀa.»

²⁴Joˀ Suzan a hiziga widi kaˀ. Mizli micawwahaya, cuw taŋ a wudam aya, ɓa a kupakaŋ ɓi.

²⁵Mbur pal asi taŋ a kil nga wuna mizlingre ngi li misla da ginewey.

²⁶Migi slra ngi hayay micinaka widi na, a kiloko kutum nga pura Suzana, a cam ng’ar li misla da ginewey misi ti mizlingre misi ti mivay tuwa.

²⁷Mizli micawwahay a slufaka taŋ ɓi taŋ na. A zuma hirnga le da migi slrahaya haɗi, asi a ɓam ɓi kahana daˀ ar Suzana ta.

²⁸Li naŋ muwun na, mizli a cikilam a mamay Zoˀakime, zil ngi Suzana, waɗ mizli micawwahay tuwa, a soko le ya. Ti wuluk taŋ ngi kiɗa hirnga na, a juwoko vu le kuy kuy ngi ga kiita ngi muc da Suzana. A zlaka, joˀ a ɓam awuzla mizli gar:

²⁹«Suzan, zuŋ ngi Hilkiyas, yo ngwas ngi Zoˀakim na, a ra ziloko ndra di.» Dar a slinam nga zila Suzana.

³⁰Suzan a ndiloko jom ati miyi naŋhay, ziri naŋhay waɗ mizli ngi hay taŋhaya.

³¹Naŋ na, mezle haɗa, yo naŋ kuy teˀe.

³²Mizli micawwa, malambaˀ tayna tuwa, a ɓaka mizli daˀ, ɓa a cukokoŋ zana misirit a mihiri avra, ɓa a mbam ti pura kuy naŋ na wãˀa.

³³Mizli ngi hay naŋhay ati mizli mapuraka gar na, a ra tuwam.

³⁴Mizli micawwahay tuwa, a slikiɗam a mbuŋ mizli gar, a paka haŋ taŋhay a hirnga Suzana.

³⁵Suzana, mbak tuwuy, a zuɓa hiri nga muŋ, asi a vula mevel naŋ le da Bumbulvuŋ.

³⁶Dar mizli micawwahay tuwa, a ɓam: «Ndr’i roko zleˀe pal ndra ar li liˀi ar gezleŋ. Ngwas hana a soko ati diyli migi slra naŋhay cuw. A ɓi ɓa a gicakaŋ mizlingre ngi gezleŋ, joˀ a ɓulo migi slra naŋhay avra.

³⁷Mangal gawla ada zle ɗum akẽh, a so ng’ava, joˀ a hin di.

³⁸Ndr’i roko zleˀe ar mukulkuc ngi gezleŋ, ndra mupuraka gwat malambaˀ nah na, i kilam ng’avi taŋ.

³⁹I puraka taŋ le slirkacak arleˀe, amma i jaka mangal gawla gu ta, asi naŋ gidaŋ fineˀ ndra. A wun miviŋ ngi gezleŋ pal, joˀ a bi sulkuɗ, a kil.

⁴⁰Na so na, i jakaŋ naŋ le, yo ‹Mangal gawla vuna i waka?› na, i cufuɗakaŋ le.

⁴¹Amma ko a ngum ɓa ɓi naŋ ta. Ndr’i gam hana, i sedewo ngi gwat nana migi.» Kus ngi mizli a tuɓaka ɓi taŋ le, asi taŋ i mizli micawwahay, yo i migi kiitahaya ma. A gaka kiita ngi muc da Suzana.

⁴²Dar Suzan a widi ˀay paɗ a muŋ: «Buymisemuŋ, mandir caˀ kine, gwat muɗum ɗumoyo, ki sina taŋ le. ɓa gwatay a sa gam na, ki sina le daf dumbuŋ si.

⁴³Ki sina le, mizli hanayna, a gam sedewo le ti slir ar ya. Pra ɗi, yi ra mucu, ani gwat taŋ muslufaka ti wuluk ngi moˀore ar ya vuna, i ga ta ngbaŋ.»

⁴⁴Bumbulvuŋ a cina diradibiɗ ngi Suzana le.

⁴⁵Ti taŋ maram ti Suzan nga kiɗ vagay na, Buymisemuŋ a vulo wuluk naŋ da mangal gawla ada, a zilaka Daniyel.

⁴⁶Mangal tuwa a widi ti ˀay paɗ amuŋ: «Ngwas nana a gi gwat ta, y’anta ngum ɓa a muco ta.»

⁴⁷Mizli gar a mbuɗam hiri puyõˀ ng’avaŋ. A cufuɗakaŋ: «Ki wuɗ ɓa ki ɓi mbrike?»

⁴⁸Mangal tuwa, a cici deŋ a wuzla taŋ, joˀ a ɓa taŋ: «Mizli Israyeley, ki bam hirnga le kwa? Ngwas ngir sukwi kum na, ki gakaŋ kiita ngi muc manja ki cufuɗakaŋ, yo manja gwat mabuga si na mbrike?

⁴⁹Mam ng’ar kiita amuŋ. Mizli tayna, a gam di sedewo ti slir ar naŋ.»

⁵⁰Mizli gar a moko kutum. Mizli micawwa mekelemey a ɓaka Daniyele: «Sawa, cifi awuzla ndra, yo ɓa ndra wuluk ɗike. Asi Buymisemuŋ a vuluw sin mijileŋ ngi mbur micawwa le si.»

⁵¹Daniyel a ɓa taŋ: «Gwahaka mizli tayna vuna pal pal, ɓa i cufuɗa taŋ.»

⁵²A gwahaka taŋ. Daniyel a zilo mbur pal, joˀ a ɓaŋ: «Midigila misi moˀore, ti zlezle na, ki gi mungra le haɗa si. Na wurenna a sa mbiɗi nga hirnga ɗik muduba so.

⁵³Ki gi kiita mijeŋ tahay le, ki ja mizli mijeŋŋeheye ti kiita, joˀ ki pula migi gwataya jaka. Dambalaka Bumbulvuŋ a ɓi zleˀe na: ‹Mbur migi gwat ta, malla mbur mikaslsla, kum majakaŋ ti kiita na, kuy ta.›

⁵⁴Wurenna so na, da ki luma Suzana le ati mbur gisiŋ na, ɓiy di, ki luma taŋ asi widis wanaka?» Mbur a mbuɗaŋ di: «Asi miter gaza.»

⁵⁵Daniyel a ɓaŋ: «Hana i slir madiɗa masa zizuw hutuŋ. Na zle Buymisemuŋ a ɓo modro naŋ le pal, ɓa a sa puɗukuw puɗak wuzla cuw.

⁵⁶Daniyel a pula mbur nah a cuh, a zilo numuŋ ma. A ɓaŋ: «Ka ki mbur Zuda ta, ki dideˀ ngi Kanaˀanhay. Kuy ngi ngwas nana a buw hirnga le wãˀ, yo may ngi hin di a mbuɗuw lesle le ma.

⁵⁷Ti zlezle na, ki gam ti ngwas Israyeleye le kanah, joˀ ki hinam taŋ, asi taŋ a ra zluwunam ti kum. Amma ngwas Zuda anta tuɓa gwat ngi gi kum malambaˀ miwãˀ hana ta.

⁵⁸Ani wurenna ɓiy di so, ki lumaka taŋ asi widis wanaka?» Mbur a mbuɗaŋ di: «Asi miter titira.»

⁵⁹Daniyel a ɓaŋ: «Hana i slir madiɗa masa zizuw hutuŋ aya. Na zle modro a ra kutukuw maslam pak, ɓa a sa puɗukuw awuzla cuw, a kuɗukum vagay vagay cuw kumo.»

⁶⁰Mizli mukusom akẽh gar, a wudam cərəwcərəw. A zlam dimis ngi hunuma Buymisemuŋ milaha mizli manjaham hiri aseˀe.

⁶¹Mizli a mbuɗam ng’ar mizli micawwahay mucuw tuwa. Daniyel a buga le ti mingiɓi taŋ tehhe amuŋ, a gam sedewo le ti slir. Mizli mucuw tayna, a wuɗo gaka moˀore da ngwas ngir sukwi taŋ, amma Israyeley a mbiɗaka nga hirnga mizli micawwahay amuŋ jaka.

⁶²A gam ti taŋ kaɓa ɓimujuwa ngi Moyis miɓa. A kiɗaka taŋ vagay vagay. Tapasa, mbur migi gwat ta na, a lahakaŋ hutuŋ le.

⁶³Helkiyas ati ngwas naŋ, a hunumaka Buymisemuŋ, asi zuŋ taŋ Suzana, jom ati zil naŋ Zoˀakim, waɗ mizli ngi hay naŋhay gar. Mizli a sinaka le, gwat ngi mesem anta avu Suzana ko neˀ ta.

⁶⁴Zle ti hin nana, mizli gar a wulkam ar Daniyele ti mezleŋ.