Read South Giziga EZK 1 Bible Online

EZK 1 - South Giziga bible

EZK 1

¹Ngi hin zlum, ngi kiya mumufaɗ naŋ, ngi vi mizli ngir makir naŋ na, naɓa ya Ezekiyele, i ro a mi mizaw Kebar, a wuzla mizli mijahay misi a ruwuy mulaka. Akẽh na, muŋ a wucuh wucah, i pur gwat ngi Buymisemuŋhoy ti kleŋ.

²Naɓa i vi muzlum naŋ, zle ti taŋ mijaka buy Zoˀakiŋ nga ruwuy mulak.

³Naŋ kine, ya Ezekiyel, mangal ngi masay,Buzi, ya a mi mizaw Kebar, angi hirwuy ngi Babiloŋhoy, Bumbulvuŋ a ɓiy ɓi naŋ le da ya. Gidaŋ ngi Bumbulvuŋ a so angi ya a diga.

⁴I ra pur hiri: keɗ na, burkataŋ ara so tir li vay muŋ, gazlavay misi vu njilim njilim hindiˀille aseˀeŋ, li ciɗak ciɗak, gun hirnga ngi gazlavay tuwa. Gwat kaɓa vu matiɓi a wuzla, jiriy jiriy kaɓa ɓiri mawucuɗu.

⁵Keɗ ma na, gwat kaɓa gwat misi titirihey mufaɗ a wuzla ma, a bam vu ati mizli titrahay.

⁶Purla gar na, mihiri ava mufaɗ waɗ kirpasl mufaɗa.

⁷Sar taŋhaya cir cir. Sar taŋ ngi ɗuv taˀ taˀ a ruwuyo, taŋ kaɓa sar ngi zuŋ sla, a wucuɗam kaɓa ɓiri gaza mukuleɗ kuleɗe.

⁸Haŋ ngi mbur asi kirpaslaya purla purla mufaɗ taŋ. Haŋ tayna, pulaˀ pulaˀ ngir tisi gazlavay mufaɗ taŋ, kaɓa mihiri taŋhay ati kirpasl taŋhay vuna ya.

⁹Mi ngi kirpasl taŋhay ada zliram ar wala taŋ. Gwat misi titiri gar aru cir a mbuŋ naŋ si, manja a mbiɗi neˀ le.

¹⁰Mihiri taŋhaya, a bam vu ati ngi mbur titra. Gwat mumufaɗ tayna, purla gar na, tir vay hazumo, i mihiri ngi mobor, tir vay gula, i mihiri ngi gusoŋ, yo mufaɗ taŋ, taŋ ti mihiri ngi mulu.

¹¹Mihiri taŋhaya taŋ kanah. Amma kirpaslaya, avu gwat misi titiri gar na, mucuwoyo binjar binjar ng'a muŋ, mi taŋhaya zlar arleˀe, yo mucuw mekelemeye kwana, a sirtam di dumvu taŋ.

¹²Ko wa gar na, aru cir a mbuŋ naŋ. A ram ng'ar li taŋ mawuɗam, manja a mbuɗam neˀ le.

¹³Gwat misi titiri tayna a bam vu ati zayvu mihilɓiɓ, gwat kaɓa daliivuhoy, a laˀam kwiŋ ti ka kwiŋ ti ka, ar wala ngi gwat tayna. Vu nah a gi hiri dirzliw haɗa, waɗ vuŋ a wucuɗo ti wuzla vu vuna pilngiɗ pilngiɗ.

¹⁴Dar gwat misi titiri tuwa, a mbiɗam ti ka ti ka, kuɗiɗiɗi kuɗiɗiɗi kaɓa wucuɗ ngi vuŋ.

¹⁵I ra pura gwat misi titiri tayna cum cum, keɗ a ruwuy a ciki taŋ na, sar ngi mota, mihiri gar na, naŋ ti sar ngi mota purla purla.

¹⁶Sar ngi mota tayna, kpak taŋ ati ɗiy t'anihĩ: a wucuɗam kaɓa ɗugur mupuɗaw mazilaka krisolit. Taŋ mufaɗ taŋ a bam vu, yo ɗiy taŋ, kaɓa sar purla gar na, kulaˀ ar cala kulaˀ ar cala.

¹⁷Da taŋ mira ram na, a ram cir cir ngir tisi gazlavay mufaɗ taŋ si, anta mbuɗam pulaˀ le ta.

¹⁸Sar ngi mota tayna, ligidaˀ taŋ, a gi zluwun, yo taŋ mufaɗ taŋ, hiri avu taŋ gun zlar, gun zlar.

¹⁹Da gwat misi titiri tayna ara ram na, sar ngi motahay a ram murciki taŋ ya, yo da taŋ mira slikiɗam ti ruwuyo na, saray a slikiɗam aya.

²⁰A ram ng'ar li taŋ muwuɗam le gar, angi pas ngi slikiɗ taŋ sar ngi motahaya kwana a slikiɗam misi purla ati taŋ. Asi mike na, sar ngi motahay a gam gar asi wuɗ ngi gwat misi titirihey.

²¹Ti taŋ mira ram, taŋ mira cicam, yo taŋ mira slikiɗam ngi ru le gar na, sar ngi motahay tuwa, a gam kanah ya, asi mike na, sar ngi motahay a gam gar asi wuɗ ngi gwat misi titirihey.

²²Birngiŋ misi kaɓa viŋ sirit a hirnga gwat misi titiriheye, a wucuɗ wulik wulik kaɓa ɗugur ɗoro.

²³Tisi birngiŋ misi kaɓa viŋ nah tuwa na, gwat misi titiriheye, mbur gar na, kirpaslay cuw binjar ng'avi cala binjar ng'avi cala, amma kirpasl mucuw mekelemeye sirit dumvu naŋ.

²⁴Da taŋ mira ram na, i cine hurum ngi kirpasl taŋhaya. Hurum taŋ kaɓa hurum ngi mubuliy, kaɓa ˀay ngi misi gidaŋ wãˀ malla hurum ngi zigiduw mihaɗa ar vurum. Da taŋ ɓi micicam le na, a suroko kirpasl taŋhaya.

²⁵Ar birngiŋ misi kaɓa viŋ, misirit a hirnga taŋ tuwa ma na, ˀay ara cino ngbiɗiɗiɗi.

²⁶Yo ti hirnga birngiŋ misi a hirnga taŋ tuwa na, gwat kaɓa ɗugur mupuɗaw ngil ngil, a bam vu ati janga ngi buy. Ar sukwi ngi janga ngi buy tuwa, a hirnga naŋ wãˀ na, gwat kaɓa mbur deŋ.

²⁷Akẽh na, gwat misi kaɓa mbur tuwa, i pura na, a wucuɗ pilngiɗ pilngiɗ kaɓa ɓiri mawucuɗu, gwat kaɓa vu a gunoŋ gunno. Zle avu li juwa gwat duba, hã nga muŋ, yo zle avu li juwa gwat duba, hã nga ruwuy na, i pur gwat kaɓa vu, njazl a gunoŋ gunno.

²⁸Li minjahha mugun hirnga naŋ tuwa, a bam vu ati kwalay mogodonok mubo le a muŋ tapas vuŋ mawuɗ a gi. Nah na, i wucuɗ mabiga dudok ngi Bumbulvuŋ. Ya mupura keɗ na, i diɗ, huruk a ruwuy. Dar i cin mbur maɓiy.