Read South Giziga EZK 10 Bible Online

EZK 10 - South Giziga bible

EZK 10

¹I ro pur hiri: keɗ na, sukwi ngi ɗugur mupuɗaw ngil ngil, ɓaˀ naŋ a bam vu ati janga ngi buy. Naŋ a hirnga gwat misi kaɓa viŋ misi a hirnga kerubeŋhey tuwa.

²Buymisemuŋ a ɓa mbur misi zana ngi gugumay mislirkeɗ ɓaˀ avu vu tuwa: «Ci ng'ar wala ngi gwat misi ka sar ngi motahay misi asi kerubeŋheye. Hil zayvu misi ar wala ngi kerubeŋhey na haŋ cuw cuw, ɓa ki pa ar walahay.» Dar mbur tuwa, a ci ng'ara, a mihiri ɗu.

³Hirak ti mbur tuwa maci na, kerubeŋhey a cicam le dedeŋ tir vay hazum ngi hay ngi Buymisemuŋ, gazlavay a naha wazlaraya le.

⁴Dudok ngi Bumbulvuŋ a slikiɗ a hirnga kerubeŋheye ng'ar li ɗuva sar a miviŋ ngi hay ngi Buymisemuŋ. Akẽh na, gazlavay a naha hay ngi Buymisemuŋ, amma wazlaraya, minaha i wucuɗ ngi dudok ngi Bumbulvuŋ,

⁵hã hurum ngi kirpasl ngi kerubeŋheye, a cin sesẽŋ a mamay, a cin kaɓa ˀay ngi Misi Gidaŋ wãˀ mira ɓi.

⁶Mbur misi ti zana ngi gugumay mislirkeɗ ɓaˀ avu vu tuwa, a so cici deŋ a cikisar ngi mota. A cici ti buy Buymisemuŋ miɓaŋ: «Zuɓ vu misi ar wala ngi sar motahay, misi ar wala ngi kerubeŋheye.»

⁷Kerubeŋ purla a tila haŋ til tir wala taŋ kerubeŋheye ng'avu vu misi ar wala taŋ kerubeŋheye, a zuɓo zayvu waɗ a naha haŋ ngi mbur miki zana ngi gugumay mislirkeɗ tuwa mbaf mbaf. Joˀ mbur a tiɓa, waɗ a bi put.

⁸Akẽh na, gwat kaɓa haŋ ngi mbur a puro tisi kirpasl ngi kerubeŋheye.

⁹I ra pur hiri: keɗ na, gwat ka sar ngi motahay mufaɗ a ciki kerubeŋheye. Kerubeŋ gar na, sar ngi mota purla a cikeˀe. Sar ngi motahay a bam vu ati wucuɗ ngi ɗugur mupuɗaw mazilaka krisolit.

¹⁰Bi vu t'ani: taŋ mufaɗ taŋ a bam vu a bam vu cek. Sar purla gar na, naŋ kaɓa kulaˀ ar cala kulaˀ ar cala.

¹¹Da kaɓa ara ram na, a ram ng'asi gazlavay mufaɗ taŋ gar gu. Ko anta mbuɗam neˀ le ta. A ram cir cir ng'ar li hirnga taŋ muɗuv dibiɗ le ngi ru. Ko anta mbuɗam neˀ le ta.

¹²Dum vu ngi kerubeŋhey gar, duba taŋhay, haŋ ati kirpasl taŋhay, waɗ gun gun hirnga ngi sar ngi motahaya, sar taŋhay mufaɗ taŋ gar na, i vu jiriy jiriy pal naŋ.

¹³I cin na, a caka slimiɗ da sar ngi mota tayna tuwa, a zilaka taŋ «Musure».

¹⁴Mbur gar na, mihiri ava mufaɗa. Mihiri ngi mudumbuŋ, i mihiri ngi kerubeŋ, ngi mucuw taŋ, i ngi mbur, ngi mimakir taŋ, i ngi mobor, waɗ ngi mumufaɗ taŋ, i ngi mulu.

¹⁵Kerubeŋhey a slikiɗam, i gwat misi tiri mupurlahay, misi kaɓa ya mupura taŋ zleˀe a mi mizaw Kebar tuwa.

¹⁶Da kerubeŋhey ara ram na, sar ngi motahaya kwana a ram ɓaˀa mur ciki taŋ ya. Da kerubeŋhey a binjiraka kirpasl taŋhaya le ngi slikiɗ na, sar ngi motahay anta baˀam avu taŋ ta, amma t'ada a ciki taŋ na si.

¹⁷Da taŋ ɓi micicam le na, naɓa a cicam aya, yo da taŋ mira slikiɗam na, a slikiɗam bumoˀ ati taŋ ya. Nah na, kite musuwun ngi gwat misi titiriheye, naŋ da angi taŋ.

¹⁸Dudok ngi Bumbulvuŋ a slikiɗ tir li ɗuva sar ngi miviŋ tuwa, a cici a hirnga kerubeŋheye.

¹⁹Akẽh na, kerubeŋhey a binjaraka kirpasl taŋhaya, a slikiɗam baɗ a ruwuyo a mihiri ɗu vuna si, a bam rak rak ati sar ngi motahaya. Dudok ngi Buymisemuŋ a cici ar mizlingre ngi si pas ngi miprik ngi hay ngi Bumbulvuŋ. Dudok ngi Buymisemuŋ ngi Israyele naŋ da a hirnga kerubeŋheye, a dadala muŋ ti hirnga taŋ wãˀ.

²⁰I gwat misi titirihey, ya mupura taŋ zleˀe asi virzi ngi Buymisemuŋ ngi Israyel, a ciki mizaw Kebar tuwa, dar i sina, i kerubeŋhey.

²¹Kerubeŋ mumufaɗ tayna, purla gar na, naŋ ti mihiri ava mufaɗ waɗ kirpasl mufaɗa. Gwat mubam vu ati haŋ ngi mbur asi kirpasl taŋhaya.

²²Mihiri taŋhaya, a bam vu ati mihirihey misi ya mupura taŋ zleˀe a mi mizaw Kebar tuwa. I mihiri misi purlahay. Kerubeŋ gar na, aru cir cir a mbuŋ naŋ.