Read South Giziga EZK 11 Bible Online

EZK 11 - South Giziga bible

EZK 11

¹ˀUf ngi Buymisemuŋ aru ti ya kini ng'avi mizlingre ngi si pas ngi miprik ngi hay ngi Bumbulvuŋ, mupulaˀ hiri ng'asi pas ngi mipriki. Mizli mizilehey ada kukur cuw nga zlum a mizlingre vuna. I pur buy ngi mizli a wuzla taŋ, i Yazaniya, mangal ngi Azur, waɗ Pelatiya, mangal ngi Benaya.

²ˀUf tuwa, a ɓiy na: «Ka mburu, mahizigoko gi gwat malambaˀ, yo mazliɗoko malambaˀ ar walahay hana na, i mizli hanayna.

³A ɓam na: ‹I juwam vu ngi ndira hayaya t'aruŋ. Walahaya i misirgaɗ, amma ndra, ndr'i useˀhey.

⁴Vurˀe, njika taŋ ɓi ngi ya Buymisemuŋ maɓi vur taŋ na, mburu, njika taŋ ɓi maɓi vur taŋ.»

⁵ˀUf ngi Bumbulvuŋ a ci ar ya, a ɓiy: «Ɓi na: Bumbulvuŋ a ɓi anihĩ: Kum Israyeley, kum miɓam na, kanah. Ɓi mislikiɗ ar wuluk kum na, yi si na le.

⁶Ki kiɗam hirnga le makaw mbeˀ mbeˀ ar walahay misenna, ki nahaka jiviɗ madiɗahaya le ti mizli mumucahay.

⁷Naŋ kine, Bumbulvuŋ, Buymisemuŋ a ɓi vurˀe na: Mizli kum mikiɗaka taŋ vagay vagay a hur walahay kum na, useˀe, i taŋ, yo walahaya i misirgaɗa. Amma kumo, i sa bi ti kum ng'avra ti ra.

⁸Ki roko zluwunam ti maslalama: amma i sa pulo maslalam a zumukum. I ya Bumbulvuŋ Buymisemuŋ maɓi.

⁹I sa bi ti kum tir walahaya ng'avra, i sa vulukum asi haŋ ngi mizli mulakay, yo i sa gukum kiita.

¹⁰Maslalam a sa hunukum a ruwuy. I sa gukum kiita daˀ ar hirwuy Israyel vuna si. Dar kisa sinaka, yi Bumbulvuŋ.

¹¹Walahay anta sa tiri avu kum i misirgaɗ ta, yo kum anta sa tiram useˀ ta. I sa gukum kiita daˀ ar hirwuy Israyel vuna si.

¹²Dar kisa sinaka, yi Bumbulvuŋ. Ya na, ki sipaka ɓimujuwa ɗuwoyo ta, yo sirik ɗuwoyo, ki jaka taŋ a hirnga ta. Asi mike na, ki gaka gwata kaɓa sirik ngi sukwi ngi mizli mugun hirnga kum na.»

¹³Hirak ti ya manjika ɓi ngi Buymisemuŋ tuwa na, Benaya, mangal ngi Pelatiya a mucu. Akẽh na, i diɗ waɗ huruk a ruwuy, i widi ti gidaŋ, i ɓi na: «Aw Bumbulvuŋ, Buymisemuŋ ɗu! Israyeley mindiram na, ki wuɗ ki ngizla taŋ wãˀ sukwa!»

¹⁴Bumbulvuŋ a ɓiy ani:

¹⁵«Ka mburu, sukum ɗikey gar, muy ɗikey, mizli Israyeley keɗeɗe, Zeruzalemey a ɓam vur taŋ: ‹Cifam kileŋ avu Bumbulvuŋ, hirwuy hana i muvula le, ɓa a ndir da ndra.›

¹⁶ɓa taŋ na: Ya Bumbulvuŋ, Buymisemuŋ i ɓi: Ko da i kuruhukum le kileŋ nga wuzla sukwi mekelemey, malla da i zliɗukum hirnga taŋ le mber mber ng'asi ruwuy tekeɗe kwana, ar li kum mira cifam anga gar na, yi tiri avu kum a diga, kaɓa ar hay mipal.

¹⁷Ɓa taŋ na: Ya Bumbulvuŋ, Buymisemuŋ i ɓi na: i sa kuso hirnga kumo ti wuzla mizli, i sa cikilo kum baɗ ti ruwuy kum mizliɗam hirnga nga diga na. Akẽh na, i sa vulukum hirwuy Israyele.

¹⁸Kum misa ndilam le a diga na, gi kuli mukuyta wãˀ le ati gi gwat mukuyta wãˀ na, a sa susuymoko taŋ gar avra.

¹⁹I sa vulukum mevel misi purla. I sa ci musuɗuk nawaya a hur kumo. Mevel kum migidaŋ kaɓa ɗugur na, i sa zuɓukum di avra, dar i sa vulukum mevel mukuɗ kuɗ kaɓa meficeke.

²⁰Kanah na, ɓa ki sipam jiviɗe, kaɓa ɓimujuwa ɗu mawuɗo, ɓa ki jaka sirik ɗuwoy a hirnga waɗ ɓa ki gam taŋ slra. Ki sa tiram mizli ɗuwoy, yo yi sa tiri Buymisemuŋ kum.

²¹Amma mizli misi macira taŋ hiri da taŋ i huruk huruk mukuy ta avu kulihey ati gi gwat mukuyta wãˀ na, gi gwat taŋ na, i sa pa zayɓi nah nga hirnga taŋ. I ya Bumbulvuŋ, Buymisemuŋ maɓi.

²²Dar kerubeŋhey a binjiraka kirpasl taŋhaya, sar ngi motahaya sek asi taŋ ya. Dudok ngi Buymisemuŋ ngi Israyele naŋ da a hirnga taŋ, a dadala muŋ, ti hirnga taŋ wãˀ.

²³Dudok ngi Bumbulvuŋ a slikiɗ ti hur walahaya, waɗ a cici a hirnga muwã misi ti sipas ngi mipriki.

²⁴ˀUf ngi Buymisemuŋ a zuɓiy faw, aru ti ya nga Babiloŋ, ng'avi mizli mija ti jihey tuwa. Hana gar na, ɓi naŋ a cuh, i ˀUf ngi Buymisemuŋ mibigiy di ɓa i pura ti kleŋ. Gwat Buymisemuŋ mibigiy di, ya mupura ti kleŋ tuwa, a susuyum a hirnga ɗu.

²⁵Gwat Bumbulvuŋ mibigiy di ɓa i pura ti kleŋ gar na, i ɓa ɓi taŋ le gar da mizli mija ti ji nga ruwuy mulakaya.