Read South Giziga EZK 12 Bible Online

EZK 12 - South Giziga bible

EZK 12

¹Bumbulvuŋ a ɓiy mi naŋ ani:

²«Ka mburu, ka micifi joˀ na, a wuzla sukwi ngi mislikiɗa ɓihey. Hiri ada avu taŋ ngi pur ngbaŋ, amma anta puram ta, slimiɗ ada ngi cin ngbaŋ, amma anta cinam ta, asi taŋ i sukwi ngi mislikiɗa ɓihey.

³Ka mburu, cin! Juw vu ti gwat ngi jijir ngi mbur mijaka le nga ruwuy mulaka, aru ti papas, a mihiri taŋ vuna, kaɓa mbur mija le ti ji. Ki ru, a mihiri taŋ, baɗ ti ka ng'ar li mekelem, kaɓa mbur mijaka le ti ji. Asinta a sa sinaka, taŋ i sukwi ngi mislikiɗa ɓihey sukwani.

⁴Ki sa bo ti gwat ngi jijir ɗikeye, gwat ngi jijir ngi mbur mijaka le ti ji, ti wuzla papas, daˀ a mihiri taŋ. Ka so na, ti pastaˀ na, kisa bi, a mihiri taŋ, kaɓa mizli mijahay le ti ji mira bam le.

⁵Ki sa slina moholo, a mihiri taŋ vuna si, waɗ kisa cuh ti gwat ngi jijir ɗikeye tir mifiliw ngi mohol tuwa.

⁶Ki sa ɗuva taŋ a gagalaˀay ɗik a mihiri taŋ. Ki sa ci taŋ ng'ar luvuŋ. Ki sa sirit gwat sirit a mihiri ɗike, vur ka mapura hirwuyo. Asi i tiri ti ka gwat ngi bigi gwat avu Israyeleye.»

⁷Joˀ i ga kaɓa naŋ miɓiy di ɗaˀ le tuwa. I bi ti gwat ngi jijir ɗu ngi papasa, gwat ngi jijir ngi mbur mijaka le ti ji. Ngi pastaˀa ma na, i slina moholo ti haŋ. I ci ti gwat ngi jijir ɗuwoyo, ng'ar luvuŋ. I bi ti gwat ngi jijir ɗuwoyo, i zuɓa taŋ ng'ar gagalaˀaya pal ɗu, a mihiri taŋ.

⁸Ngi miprik na, Bumbulvuŋ a ɓiy mingiɓi naŋ ani:

⁹«Ka mburu, Israyeley, sukwi mislikiɗa ɓiheye, a sa ɓukuw: ‹Ki gi mike?›

¹⁰Ɓa taŋ na: Ya Bumbulvuŋ, Buymisemuŋ i ɓi na: Mingiɓi hana vur yarima misi a Zeruzalem, waɗ vur Israyeley gar misi anga.

¹¹Ɓa taŋ na: ɓi masa ndilo avu kum na, yi fukum ɓi nah le daf dumbuŋ. Gwat ya miga le na, a sa gi avu taŋ kanah. A sa cohom, a jaka taŋ ti ji nga ruwuy mulak, ɓak ɓak taŋ tisi ruwuy taŋ.

¹²Yarma misi a wuzla taŋ, a sa zuɓa gwat ngi jijirey ng'ar gagalaˀay naŋ. A sa bi tir mohol mislinaka hĩˀĩ vurˀe na, a ci ng'ar luvuŋ. A sa sirit gwat sirit a mihiri naŋ, ɓa a pura hirwuyo ti hiri naŋ ta.

¹³I sa njira zuva ɗu njar ar naŋ, gadaŋ ɗu a sa jaŋ. I sa ru di nga Babiloŋ, ar hirwuy ngi Kaldehey. A sa muc a diga, manja a pura hirwuy nah.

¹⁴Mizli mugun ngi cikeˀehey gar, mijigina li naŋhay ati soje naŋhay gar na, i sa zliɗa hirnga taŋ mber mber, suɓulak ng'asi li, i sa ɓula taŋ ti maslalam ɓaˀ asi virzi taŋ.

¹⁵Ti ya misa zliɗa hirnga taŋ le nga wuzla sukwi mekelemey, yo ya misa waha taŋ le ng'asi ruwuy mulakay na, a sa sinaka, yi Bumbulvuŋ.

¹⁶I sa pul mekelemey cah a wuzla taŋ, a laham tir vurum, tir may, tir jiji mozorbono, ɓa a sa slufaka ɓi ngi gi gwat malambaˀ taŋ mukuyta wãˀ na, a wuzla sukwi ngi mizli, ar li taŋ misa ram le gar. Dar a sa sinaka yi Bumbulvuŋ.»

¹⁷Bumbulvuŋ a ɓiy mingiɓi na ani:

¹⁸«Ka mburu, kisa zuma ɗaf ɗike ti jijik ngbar ngbar. Ki sa sa yam ɗike, ti wus kar kar, ti lik.

¹⁹Ki sa ɓa mizli ngi si ruwuyoyo, mizli Zeruzalemey misi asi ruwuy Israyele, ya Bumbulvuŋ, Buymisemuŋ i ɓa taŋ na: Ki sa zumaka gwata ti lik, yo kisa saka yama ti zluwun ngbaˀ ngbaˀ, vur mike na, mizli a sa zumaka hirwuyo, gwatay mimbaf mbaf ngi hur naŋhaya, a sa so anta mata, asi moˀore ngi mizli ngi raˀahaya, a naha le.

²⁰Walahay misi mizli angi taŋhaya, a sa tiram diŋ, yo hirwuy a sa tiri wuzlaɓuh kirɗak kirɗak. Akẽh kisa sinaka yi Bumbulvuŋ.»

²¹Bumbulvuŋ a ɓiy mingiɓi naŋ ani:

²²«Ka mburu, mikicuwul, kum maɓaka ani asi ruwuy Israyel na, vur mike? Ki ɓam: ‹Hin ara mur, yo gwat Buymisemuŋ mabiga ngi pur ti kleŋ na, anta gi ta ma.›

²³Ɓa taŋ: Bumbulvuŋ, Buymisemuŋ a ɓi na: I susuyumo mikicuwul hana avra, anta sa ɓaka asi ruwuy Israyele mata. Ɓa taŋ jak na: ‹Hin ara ndilawa, gwat ya mabiga ngi pur ti kleŋ gar na, a sa gi›.

²⁴Asi mike na, a wuzla Israyeleye, gwat ya mabiga ngi pur ti kleŋ, ɓa a gi ta na, anta mata, yo ɓi minjika ngi gi gilaw anta mata.

²⁵Ya Bumbulvuŋ, gwat ya miɓa le gar na, a gi cummo, anta mur ta. Kum sukwi mislikiɗa ɓihey, ɓi ya miɓa le gar na, i ga ti kum misi ar siifa aruŋ. I ya Bumbulvuŋ, Buymisemuŋ maɓi.»

²⁶Bumbulvuŋ a ɓiy na:

²⁷«Ka mburu, Israyeley a ɓam: ‹Mbur hana, gwat naŋ mapura dana na, i gwat masa gi tipirik ta, a njik di i ɓi ngi gwat masa gi tumbuŋ kileŋ aruŋ.›

²⁸Naŋ kine, ɓa taŋ: Bumbulvuŋ, Buymisemuŋ a ɓi na: Mingiɓi ɗu gar na, ko ɓi purla masa mur anta mata. Ɓi ya miɓa le na, a gi si. I ya Bumbulvuŋ, Buymisemuŋ maɓi.»