Read South Giziga EZK 13 Bible Online

EZK 13 - South Giziga bible

EZK 13

¹Bumbulvuŋ a ɓiy mi naŋ ani:

²«Ka mburu, ɓa mingiɓi ɗu ani a hirnga mijiviɗ Israyeley, mijiviɗ tayna manjikam ɓi, i ɓi ngir mevel nga taŋ. Ɓa taŋ ɓa a cinaka mingiɓi nga ya Bumbulvuŋ!

³Ya Bumbulvuŋ, Buymisemuŋ i ɓi na: Mijiviɗ gilaway masipam wuluk ngi hirnga taŋ, manja taŋ mupuram gwata si na, i bonoy avu taŋ.

⁴Israyeley, mijiviɗ kumoy a tiram le kaɓa biigaɗay ar diŋ.

⁵Ki dislaka mifiliw ngi vu moholo dasl le ta, yo mohol gun hirnga Israyeleye, ki ndiram ndar le ta ma, anja zleˀe a sa ɗumom di le, a cicam le zlak kuy kuy ar vurumo, ti hin Bumbulvuŋ muwuna na.

⁶Pur gwat taŋ ti kleŋ na, i ɓi ngatara lambaˀa, yo ɓi taŋ manjikaka na, i ɓi ngi gi gilaw da mbur. Da ara ɓam na, a ɓam: ‹Hana i ɓi ngi Bumbulvuŋ›, manja ya Bumbulvuŋ vuna mislina taŋ si. Dar a kutukom, anja ɓa i ga gwat taŋ miɓaka vuna.

⁷Kum mizli maɓam: ‹Hana i ɓi ngi Bumbulvuŋ›, manja ya vuna i ɓi si na, pur kum ti kleŋ na, i ɓi ngatara lambaˀ takwa? Ɓi kum manjikaka na, i ɓi ngi gi gilaw lambaˀ da mbur takwa?

⁸Naŋ kine, ya Bumbulvuŋ, Buymisemuŋ, i ɓi vurˀe na: I ra so ɓi ɓi ngi mbuɗukum hirnga, asi ki tilam mi ti ɓi ngatara lambaˀ, yo ki puram gwat ti kleŋ ngi gi gilaw da mizli. I ya Bumbulvuŋ, Buymisemuŋ maɓi.

⁹Mijiviɗ mupura gwat ti kleŋ ngatara lambaˀhay ati minjika ɓi ngi gi gilaw da mizli na, i sa biga gidaŋ ɗu ar taŋ. Tˀanta sa cifam ar li ngilawuy ngi mizli ɗuwoyo ta, anta sa tohoko slimiɗ taŋ ar ɗerewol ngi Israyeleye ta, yo t'anta sa cam sar kulaˀ le asi ruwuy Israyele ta ma. Dar kisa sinaka, yi Bumbulvuŋ, Buymisemuŋ.

¹⁰Asi mike na, a zizaka mizli ɗuwoyo le, a ɓam: ‹Mizle zuy zuy.› Dambalaka, zuy vuna anta ngbaŋ. Naŋ kaɓa, da mizli ɗuwoy ara ndiram mohol na, taŋ a puyakaŋ di i burkoɗoko si.

¹¹Mizli mapuyakaŋ burkoɗok na, ɓa t'anihĩ: Vuŋ a sa gi hã a zuɓo mekepel. Slaslalay loˀ loˀ a sa pawa, yo burkataŋ a sa curbuɗawa, joˀ mohol a sa mbizli.

¹²Ani mohol a sa mbizli so: ‹Burkoɗok kum mupuyaka da mohol tuwa naŋ maka› na, a sa ɓukum kahana ta sukwani?

¹³Vurˀe, ya Bumbulvuŋ, Buymisemuŋ i ɓi na: Ya muzuɓ himaˀ na, i sa curbuɗo burkataŋ, himaˀ ɗu a sa go vuŋ, a zuɓo mekepel, yo himaˀ ɗu a sa go yam ngi ngizla gwat gar.

¹⁴Mohol, kum mupuyakaŋ burkoɗok na, i sa wahaŋ, i sa mbizla nguɓoc nguɓoc a ruwuy, hã si virzi naŋ a sa pur ar li babaraŋ. Mohol a sa mbizli, kisa ngizlam daˀ aseˀe akẽh. Dar kisa sinaka, yi Bumbulvuŋ.

¹⁵Zuɓa himaˀ ɗu ngi mbiɗa hirnga da mohol waɗ da mizli mupuyakaŋ burkoɗok na, i sa ndil di hã ar kiɗa mi naŋ. I sa ɓukum: Mohol anta mata! Yo mizli mapuyakaŋ burkoɗok na kwana, anta mata.

¹⁶Mijiviɗ Israyeleye, t'anta mata. Mijiviɗ tayna a ɓam ɓi a hirnga Zeruzalem, yo a puraka kaɓa Zeruzaleme, naŋ zuy zuy, dambalaka naŋ zuy vuna ta ngbaŋ. I ya Bumbulvuŋ, Buymisemuŋ maɓi.

¹⁷Ka mburu, cin, mbiɗi hiri ngir tivi ngwas ngi mizli ɗikey, maɓam ɓi ngir mevel nga taŋ tehhe a muŋ na. Ɓi ɓi ar taŋ ngi mbiɗa taŋ hirnga.

¹⁸Ɓi na: Bumbulvuŋ, Buymisemuŋ a ɓi ani: Bonoy avu ngwas matufam kecekecehey ngi ci avu hirzlik ngi haŋhay gar, yo matufam salabihey da mizli, weˀe avu gil ngi mburo ngi mburo gar, ɓa a jaka musuɗuk ngi mizli ɗuwoy na. Ki wuɗam, ki jaka musuɗuk ngi mizli ɗuwoyo, ɓa ki lahaka musuɗuk ngi hirnga kumo sukwa?

¹⁹Ki hiryikiy le a mbuŋ mizli ɗuwoyo, asi daw giziŋ turɓus haŋ purla, waɗ milef ɓuluˀ tewle. Mbak mizli misi i ngi kiɗ vagay vagaya na, ki gaka gilaw da mizli ɗuwoy matiɓam ɓi kutumo, ki kiɗam di i taŋ jak. Yo mizli ngi pul taŋ ti siifa ta na, ki pulam ti siifa i taŋ jak.

²⁰Vurˀe, Bumbulvuŋ, Buymisemuŋ a ɓi na: I ra mbiɗi hirnga ng'ar kecekece kum mutufaka taŋ ngi ci avu hirzlik haŋhay, kum mijaka musuɗuk ngi mizli ɗuwoy anga na. I sa ngira taŋ tivi haŋ kumoy avra, i sa pula musuɗukoy, kum mijaka taŋ na, a cohom.

²¹I sa ngira salabi kumoyo, i sa tiɓa mizli ɗuwoyo tisi haŋ kumo. Kanah na, t'anta sa tiram gwat ngi si haŋ kumoy mata. Dar kisa sinaka, yi Bumbulvuŋ.

²²Asi mike na, ki hiryaka mevel ngi mbur mijeŋŋe ti ɓi ngi gilaway, dambalaka ya vuna i ɓaŋ ɓi ngi lik ta ngbaŋ. Yo mbur misi moˀore jak na, ki ɓakaŋ kaɓa gi gwat naŋ i mezleŋ, ani ɓa a ndir ti siifa na, ko a pula gi gwat malambaˀ naŋ na gu mata.

²³Vurˀe, pura ɓi kum ti kleŋ ngatara na, kum anta sa lumam jiviɗ naŋ mata, yo kum anta sa njikam ɓiheye mata. I sa laha mizli ɗuwoyo tisi haŋ kumo. Dar kisa sinaka, yi Bumbulvuŋ.»