Read South Giziga EZK 14 Bible Online

EZK 14 - South Giziga bible

EZK 14

¹Mizli a wuzla micawwa ngi Israyeley a soko ng'avi ya, a cifam joa mbuŋ ɗu.

²Akẽh na, Bumbulvuŋ a ɓiy mi naŋ ani:

³«Ka mburu, mizli hanayna a jaka ɓi ngi kuli taŋhaya le a mevel taŋ, a ɗuvam a mbuŋ taŋ i gwat ngi hizigiɗa taŋ ɓa a gam mungra. Ani i pula taŋ vu ɓa a cufuɗikiy kwa?

⁴Ka ɓi so, ɓa taŋ na: Bumbulvuŋ, Buymisemuŋ a ɓi anihĩ: Mbur Israyel gar, mija ɓi ngi kuli naŋ le a mevele, maɗuv gwat a mbuŋ naŋ ɓa a hizigiɗaŋ ng'ar mungra, a dirba nah, a so nga pura mijiviɗ ma na, masa zilaŋ mi i ya Bumbulvuŋ. Naŋ muso le na, i sa zilaŋ mi weˀe avu taˀ ngi kuli naŋhay vuna.

⁵Kanah na, Israyeley mikiraham kileŋ avu ya asi ɓi ngi kuli taŋhay na, ɓa ɓi nah a ga taŋ gigisl a mevele.

⁶Vurˀe, ɓa Israyeleye: Bumbulvuŋ, Buymisemuŋ a ɓukum: Moko, mbiɗaka duba da kuli kumoyo. Mbuɗaka duba da gi gwat kum mukuy tahay wãˀ na.

⁷Mbur Israyel malla moholoy misi asi ruwuy Israyele, da a kirih le kileŋ avu ya, ara ja ɓi ngi kuli naŋ a mevele, a ɗuv gwat a mbuŋ naŋ ngi hizigiɗaŋ ɓa a gi mungra, akẽh, ara ru nga pura mijiviɗe ma na, yawwa, masa zilaŋ mi i ya Bumbulvuŋ ti hirnga ɗu.

⁸I sa mbiɗi pulaˀ ng'ar mbur nah, i sa tiri di mbur masa gam di mi ngi wuya, yo i sa gwahaŋ avra ti wuzla mizli ɗuwoyo. Dar kisa sinaka yi Bumbulvuŋ.

⁹Ko i mijiviɗ ɗu, da a pula vu naŋ, a tikinakaŋ le, a mbiɗa mingiɓi nah gisiŋ na, naɓa i ya Bumbulvuŋ mitikina mijiviɗ nah vuna. I sa zuɓa haŋ ng'araŋ, yi sa zizaŋ avra ti wuzla Israyel, mizli ɗuwoyo.

¹⁰A sa jijiraka zayɓi ngi malambaˀ taŋ. Mbur muru nga pura mijiviɗ ati mijiviɗ vuna, i taŋ cuw taŋ mazuɓaka zayɓi nah.

¹¹Kanah na, naɓa Israyeley anta sa kiraham kirah le avu ya mata, t'anta cam ar dili ti slikiɗa ɓi taŋ na mata. A sa tiram mizli ɗuwoy, yo ya kwana, i sa tiri Buymisemuŋ taŋ. I ya Bumbulvuŋ, Buymisemuŋ maɓi.»

¹²Bumbulvuŋ a ɓiy mingiɓi naŋ ani:

¹³«Ka mburu: Kaɓa ani, da mizli ngi si ruwuyoy a gam mungra le avu ya, a gam gwat ngi mbur miteŋteŋ ta le na, i zuɓa haŋ ng'ar taŋ, gwat ngi zum taŋ muwam di vu na, i susuyumo taŋ avra, i go taŋ may, i ngizla mizli ati gwat misãmiheye gar avra.

¹⁴Nowe, Daniyel waɗ Jopo, ko da t'ada makir taŋ a hirwuy nah tekeɗe kwana, i taŋ masa laham tewle asi gi jeŋŋe taŋ na. I ya Bumbulvuŋ, Buymisemuŋ maɓi.

¹⁵Da i slin ti gwat misãmi miji vu ngi ɓuhoy le ng'asi ruwuyo, ɓa hirwuy a tiri kirɗak kirɗak, manja ziri araŋ, manja mbur a cuh ti raŋ, asi gwat misãmihey na,

¹⁶kaɓa ya misi ti siifa gisiŋ na! Ko da mizli mimakir tayna, t'ada asi hirwuy nah tekeɗe kwana, t'anta sa lahaka ziri taŋ mizile malla mongosohoyo gu ta. Milaham le na, i taŋ pal taŋ tewle, amma hirwuy a tiri kirɗak kirɗak cummo na si. I ya Bumbulvuŋ maɓi.

¹⁷Malla ta, da i pulo vurum le ng'asi ruwuyo, da i ɓi le: anja vurum a gi asi ruwuy hana, anja a ngumaka mizli ati gwat misãmiheye ti maslalam,

¹⁸kaɓa ya misi ti siifa gisiŋ na! Ko da mizli mimakir tayna t'ada asi hirwuy nah tekeɗe kwana, anta sa lahaka ziri taŋ mizile malla mongosohoyo gu ta, sey taŋ pal taŋ masa lahama. I ya Bumbulvuŋ, Buymisemuŋ maɓi.

¹⁹Malla ta na, da i slin jiji mozorbono le ng'asi ruwuyo, da i vunoho himaˀ ɗu ngi muco le ng'araŋ, ɓa a ngizlaka mizli ati gwat misãmiheye na,

²⁰ka ɓa ya misi ti siifa gisiŋ na! Ko da Nowe ati Daniyel waɗ Jopo, t'ada asi hirwuy nah tekeɗe kwana, t'anta sa lahaka ziri taŋ mizile malla mongosohoyo gu ta. Sey i taŋ pal taŋ tewle masa laham, asi jeŋŋe taŋ na. I ya Bumbulvuŋ, Buymisemuŋ maɓi.

²¹Naŋ kine, ya Bumbulvuŋ, Buymisemuŋ i ɓi na: Bonoy mumufaɗ hanayna: vurum, may, gwat misãmi miji vu ngi ɓuhoy waɗ jiji mozorbono na, ko da i slino taŋ le ar walahay Zeruzaleme, ɓa a ngizla mizli ati gwat misãmiheye tekeɗe kwana,

²²naɓa mizli mindiram ada na si. A ra boko ti ziley ati ngwasay tir walahaya, t'ani ara soko ng'avu kum. Ki sa puraka gwat ngi gi taŋ ati slra taŋ. Dar kisa tislaka mevel avu bonoy, ya mupulo di nga hirnga Zeruzaleme, waɗ avu gwat ya muso di nga hirnga naŋ gar.

²³Ti kum masa puraka gwat ngi gi taŋ ati slra taŋ na, a sa tuslukum mevele. Gwat ya miga da walahay gar na, kisa slaka wala naŋ, i ga ngatara ta. I ya Bumbulvuŋ, Buymisemuŋ maɓi.»