Read South Giziga EZK 16 Bible Online

EZK 16 - South Giziga bible

EZK 16

²«Ka mburu, Zeruzaleme, gi gwat naŋ mukuy tahay wãˀ na, bigaŋ taŋ, ɓa a sinaŋ.

³Ɓaŋ na: Zeruzalem, Bumbulvuŋ, Buymisemuŋ a ɓuw anihĩ: Kanaˀan i hirwuy ka mubo ti raˀa, yo a yukuw anga. Bunuk i mbur Amori, yo munuk i zuŋ Hiti.

⁴Taŋ muyukuw cak na, a slukuw mamaya ta, a bunukuw ɓa ngi zuɓa dili ɗike ta. A kurukuw mandaŋ ta, yo a mbuzukuw ti zana ta.

⁵Ko mbur mupuraw kuy anta, yo ko mbur mupuruw ircece ngi guw gwat purla asi gwat tayna anta. Tapas yi ɗike, ka maga taŋ kuy ta tuwa na, a hizigukuw fuk avra.

⁶Ya macuh a ciki ɗike na, i puruw ki ra kiɗ vu ar pumbus ɗike. Ti ka miɓaˀ ar pumbus ɗik tuwa na, dar yi ɓuw: Ndir ti siifa! Ti ka miɓaˀ ar pumbus ɗik tuwa na, dar yi ɓuw: Ndir ti siifa!

⁷Yi giluw kaɓa giziŋ ar guva. Dar ki zla ki ra muruɗu, ki ra gil, hã ki tiri kuy gwatta. Ki zla bo ti ɗuwa, ngwic ara pusawa, amma ka manja zana, gulndiŋ kine.

⁸Ya macuh a ciki ɗike na, yi puruw na, dambalaka hin ɗik a ndila le ngi wuɗa zil. Yi sirta mi ngi godo ɗu sirit ar ka mugulndiŋ kine tuwa. Yi ɓuw ti hudum, i jumom ˀay ati ka, dar ki tiri nga ya. I ya Bumbulvuŋ, Buymisemuŋ maɓi.

⁹I bunuw ceɗ ceɗ, pumbus mukor kor avu ka na, i tukuɗuw di avra, i puyuw urdi.

¹⁰I vuluw zana midira dar daray, tarak ngi garak miselek, kanda ngi kwitiɗ mislirkeɗ, waɗ i kuw zana ngi gabaga hirnga hirngahay.

¹¹I vuluw gwat ngi ɗiyavuhoy, ɓalaŋ kulaˀ kulaˀ avu haŋhay waɗ virzle law asi ˀaya.

¹²Gwat ngi hutuŋ kulaˀ, gwat ngi slimiɗ law law waɗ loppo tuwaɗ tuwaɗ njozl a hirnga.

¹³Gwat ngi ɗiyavu ɗikeye, i miga taŋ ti ɓiri tapasl tapasl, ɓiri gaza, zana ɗikeye, i mija ti gugumay mislirkeɗ, gabaga mupuɗaw, midira ˀay taŋ le dar dar. Gwat ngi zum ɗike, i hapa mukuɗ kuɗ waɗ mam ati mal. Dar ki tiri kuy teˀe. Ki ndila le ngi buyo.

¹⁴Akẽh na, kuy ɗik mazil slimiɗ tuwa na, a njih a wuzla sukwi gar: asi mike kuy ɗike, gwat mikic neˀ anta ra ta, vur ya miɗiyuw vu ɗik hã a wucuɗ tuwa. I ya Bumbulvuŋ, Buymisemuŋ maɓi.»

¹⁵Amma ki pula vu ɗike mbak da kuy ɗik tuwa, joˀ ki gi sulome, asi slimiɗ ɗik mazil wãˀ. Ko wa macuh gar si na, ki vulaŋ vu ɗike taˀ wãˀ ngi gi sulome ati naŋ.

¹⁶Ki hila zana ɗik mekelemeye, ki ɗiy taŋ li miɗingir ɗingir ngi gi mikulihey, joˀ ki gi sulome ar taŋ. Ɓi a gi kanah ɗaˀ ta, yo anta sa gi ta ma kini.

¹⁷Gwat mimezle ɗik ngi ɗiyavuhoy, ɓiri tapasl tapasl ati ɓiri bara, ya muvuluw taŋ tuwa na, ki vuɗ taŋ kuli ziley, joˀ ki vula vu ɗike ngi gi sulome ati taŋ.

¹⁸Ki hila zana ɗik midira ˀay taŋ dar daraya, ki sirta taŋ ti naŋ, yo ki zuɓa mal ɗu ati mukuturɓuy ngi urdi ɗuwoyo, ki ɗuva taŋ di a mbuŋ.

¹⁹Gwat ngi zum ɗu, ya muvuluw di, hapa mukuɗ kuɗ, mal ati mam, ya mavuluw taŋ ngi zumo, ki ɗuva taŋ di a mbuŋ, ɓa a zĩˀĩ ngi tisla taŋ mevel. Gwat ka miga i hana. I ya Bumbulvuŋ, Buymisemuŋ maɓi.

²⁰Ziri ɗik mizile ati mongosohoy, ka miyiy taŋ na, ki hila taŋ, joˀ ki gi taŋ mikuli da kuli tayna, ɓa a humbuɗaka taŋ. Gi sulome ɗike, ki pura geˀ preˀe,

²¹hã ki slaˀay ngi ziri ɗu mizileheye, ki vula taŋ di zlam zlam ar deɗe ngi mikuli, ɓa ngi ɗuva taŋ hirnga.

²²Ar gi gwat ɗik mukuy tahay wãˀ ati gi sulome ɗik na, ko ki wulka hin ngi diili ɗik na keŋ ta. Ka zleˀe migulndiŋ kine, manja zana, ki kiɗ vu ɓaˀ ar pumbus ɗike.

²³A dirba gi kuw ɗik tayna gar na, kay, i bonoy masa lumuw! I bonoy masa lumuw! I ya Bumbulvuŋ, Buymisemuŋ maɓi.

²⁴Ar li mizli macikilam anga anga gar na, ki ɗiy li viriw a muŋ, ki ɗiy li jiɗngwil.

²⁵Ar mazlaka jiviɗey gar na, ki ndir li ndar ndar jiɗngwil ngi biga gi gwat ɗik mukuyta wãˀ ti kuy ɗik tuwa angaŋ. Ki vula vu ɗike da mbur macuh gar si, ki ra gi sulome ti vendeke.

²⁶Ki vula vu ɗike ngi gi sulome ati mizli Ezipte, midigwi ɗikey, misi dumvu taŋ gidaŋ gidaŋ na. Naŋ kine, ki ga sulome ɗike le ti vendeke, hã ngi slikiɗiy mevel.

²⁷Ani i ra biga gidaŋ ɗu ar ka so, i ngica gwat ngi zum ɗike le, yo i vuluw le da mesene ɗik, ziri mongoso Filistihey, hã taŋ vuna mesem a kiɗa taŋ ti gi gwat ngi mesem ɗik vuna jak ma.

²⁸Ki pura na, gi sulome ɗik a kiɗuw may ta, dar ki zla gi naŋ ati mizli Asirihey, ki vula taŋ vu ɗike ngi gi sulome, amma ko a kiɗuw may ta na si.

²⁹Akẽh na, ki vula vu ɗik ngi gi sulome ti vendeke a Babiloŋ, hirwuy ngi migi tererehey. Ko ati taŋ vuna kwana, gi sulome a kiɗuw may ta na si.

³⁰Gwat tayna, ka maga taŋ gar na, sulome madiɗa, kay, i hĩhĩy madiɗa a mevel ɗike! I ya Bumbulvuŋ, Buymisemuŋ maɓi.

³¹Ti ka miɗiyi li viriw nga muŋ, a mazlaka jiviɗ gar, yo ti ka miɗiyi li mijiɗngwil angi li mizli macikilam anga gar na, ki hirsa ɓi ngi migir ɗike le, ki gi kaɓa sulomehey ta.

³²Ngwas migi madama na, a sipi di i mulakay, mbak zil naŋ le jaka.

³³A vulam gwat ngatara na da ngwas sulomehey zleˀe, amma ka, mavula gwat da mangasl ɗikey i ka jaka. Ki ja taŋ le asi haŋ, ɓa ko ti damaka gar na, a soko nga gi sulome ti ka.

³⁴Ka na, angi may zil ɗike, ki gi di i slra pal avu ngi ngwas sulome mekelemeye. Anta ram ti supukuw ka ngwas sulome ta, amma ka mavula dala da mangaslay ngatara na, ki mbiɗa slra ngi ngwas sulomeheye le.

³⁵Ka ngwas sulome, cine mingiɓi ngi Bumbulvuŋ so:

³⁶Ya Bumbulvuŋ, Buymisemuŋ a ɓuw na: Ar gi sulome ati mangasl ɗikey waɗ ati kuli ɗik mukuy tahay wãˀ, ti ka muvula taŋ ziri ɗik mizilehey, ki ga taŋ di mikuli na, ki pula vu ɗike le gulndiŋ kine, waɗ mbuŋ ɗike ngbay ar li babara.

³⁷Yo kuy, mangaslay mihĩyukuw gar, mizli ka muwuɗ taŋ gar, mbak misi ka mihirsa taŋ le gar na, i wuɗ i kuso taŋ ko ti damaka gar, kos kos ng'ar ka. I sa puluw gulndiŋ kine a mbuŋ taŋ gar, a sa puraka mbuŋ ɗike.

³⁸Kiita magaka da ngwas migi madamahay ati mikiɗa hirngahay na, i sa guw di i naŋ. I sa pa himaˀ ati suloŋ ɗu nga hirnga ɗiki.

³⁹I sa vuluw asi haŋ taŋ, li miviriw ati li mijiɗngwil, ka miɗiya taŋ na, a sa wahaka avra. A sa cikukuw zana ɗikeye waɗ a sa hilaka gwat ngi wuya ɗik mimezleheye da taŋ. A sa pulukuw vu ɓaˀ ti mi, gulndiŋ kine.

⁴⁰A sa kusom mizli zigiduw taˀ ng'ar ka, a sa kuyupukuw ti ɗugur, waɗ a sa ngumukuw ti maslalam taŋhay.

⁴¹A sa wurukuw hayaya, a sa gukuw kiita a mihiri ngwasay, zigiduw taˀ. I sa kiɗa hutuŋ ngi gi sulome ɗike. K'anta sa vul dala da mizli ar deɗe ngi migir taŋ mata.

⁴²Ya muzuɓ himaˀ ar ka na, sey i kiɗa mi naŋ gbaˀa. A dirba nah, gi suloŋ ti ka na, a sa so anta mata. I sa tisla mevele, yo y'anta sa ji mevel mata.

⁴³Asi mike na, hin ngi gi diili ɗike, ki wulka keŋ ta, yo ki slikiɗiy mevel ti ɓi ngi gwat tayna gar. Yo kuy! Ya kwana, gi gwat ɗik na, i wuɗ i pa zayɓi nah nga hirnga ɗik vuna. Gwat ngi mesem hanayna, ki ga taŋ le jom nga hirnga gi gwat ɗik mukuy tahay na ta kwa? I ya Bumbulvuŋ, Buymisemuŋ maɓi.

⁴⁴Ani, mbur gar maɓi mikicuwul na, a sa ɓi ar ka anihĩ: ‹Na zle digir a yi davay kwa!›

⁴⁵Ngwas mihirsa zil naŋ ati ziri naŋ mizileheye buɗ buɗ na, ki zuŋ naŋ, yo sukum ɗik mongosohoy mihirsaka zil taŋhay ati ziri taŋ mizilehey buɗ buɗ na, ki sukum taŋ mongoso. Munuko, i zuŋ Hiti, yo bunuko, i mbur Amori.

⁴⁶Sukum ɗik mongoso madiɗa, i Samari mujoˀ ti hay naŋ tir vay gula ɗik ati ziri naŋ mongosohoy na. Sukum ɗik mongoso mijingaˀ ɗike, mujoˀ ti hay naŋ tir vay hazum ɗik na kwana, i walahay Sodom ati ziri naŋ mongosohoy.

⁴⁷Ki sipi di i jiviɗ ngi gwat ngi gi taŋ tew ta, yo ki gi di i gwat taŋ mukuyta wãˀ na tew ta, naŋ preˀe. Ar sipi jiviɗ ɗik ar gwat ngi gi taŋ gar na, ki biga le, ki mihirya mifineˀ taŋ.

⁴⁸Kaɓa ya misi ti siifa gisiŋ na! Sodom, sukum ɗik mongoso ati ziri naŋ mongosohoyo, a gam gwat malambaˀhay fineˀ ngi ɗik ati ziri ɗik mongosohoyo ta. I ya Bumbulvuŋ, Buymisemuŋ maɓi:

⁴⁹Sukum ɗik mongoso Sodomo, malambaˀ naŋ miga ati ziri naŋ mongosohoy na, n'ani: huhumo vu, may gwat, wuluk neˀ anta. Amma mizli migeˀ ircecehey ati misi murgahaya, a ja haŋ taŋ ta.

⁵⁰A tiram i muhuhumo vuhoy, a gam di i gwat mukuyta wãˀ avu ya. Dar i zliɗa taŋ avra, kaɓa ka mupura na.

⁵¹Dambalaka na, mungra ɗikey, ka miga taŋ na, ko Samari a ga reta naŋ vuna ta. Ki gi gwat mukuy tahay wãˀ fineˀ nga naŋhay. Gwat ngi gi ɗik mukuyta wãˀ na, weˀ avu ngi sukum ɗik mongosohoy na, ko taŋ a gam gwat malamabaˀ neˀ le ta.

⁵²Naka so na, ka mimi a ruwuy, asi gi mungra ɗik mukuyta wãˀ fineˀ ngi sukum ɗikey na, sey ki ɓusa ɓi nah so. Keɗ keɗ na, taŋ jeŋŋe ar ka. Ka so na, pi mesem, ka mimi a ruwuy na, jijira ɓi nah so, asi da a wukuw le weˀ avu sukum ɗikeye na, ko taŋ a gam gwat malambaˀ neˀ le ta.

⁵³I sa mbiɗa gwat masa gi avu taŋ na, gwat masa gi avu Sodom ati ziri naŋ mongosohoy, gwat masa gi avu Samari ati ziri naŋ mongosohoy, yo gwat masa gi tehhe avu ka vuna a wuzla taŋ,

⁵⁴ɓaka mimi a ruwuy na, ki jijira zayɓi nah, yo ɓa ki pi mesem ti gwat ka miga gar na. Masa tisla taŋ mevel i nah.

⁵⁵Sukum ɗik mongoso, Sodom ati ziri naŋ mongosohoyo, a sa tiram kaɓa joˀ taŋ mudumbuŋ zleˀe a muŋ, yo Samari ati ziri naŋ mongosohoyo kwana, kanah ya. Ka ati ziri ɗik mongosohoyo kwana, kisa tiram kaɓa joˀ kum mudumbuŋ zleˀe na ya.

⁵⁶Ti hin ka mahuhum vu zleˀe na, sukum ɗik mongoso Sodomo, ki tiri di gwat ngi kiɗa mambaˀ le avu mi takwa?

⁵⁷Naɓa gi moˀore ɗik na, a njik t'aruŋ. Naŋ kine, ziri mongoso ngi Sirihey ati ngir prok mugun hirnga taŋhay gar, ziri mongoso ngi Filistihey mahirsukuw ti ka ti ka gar na, ki tiri le, ki i ngi zi avu taŋ ya.

⁵⁸Gi gwat ɗik ngi ɓi avu mi ta ati gi gwat ɗik mukuyta wãˀ na, sey ki jijira zayɓi nah. I ya Bumbulvuŋ maɓi.

⁵⁹Naŋ kine, ya Bumbulvuŋ, Buymisemuŋ i ɓi na: Ka mupura ɓi ngi nise hiris le ti ngila ɓi ngi jumoˀay na, i sa guw gwat ngi kwacay mombroŋ kaɓa ka miga na ya.

⁶⁰Ya na, jumoˀay ɗu ati ka ti hin ngi diili ɗik na, yi sa wulka keŋ, i sa jumˀay ngi sete ati ka.

⁶¹Ti ka masa tiɓa mulak ngi sukum ɗik madiɗa mongosohoy a ciki sukum ɗik mongoso mijingaˀ ɗikey na, kisa wulka gwat ngi gi ɗik zleˀe na keŋ, joˀ kisa ndir ti mesem. I sa vuluw taŋ ar deɗe ngi ziri ɗik mongosohoy, amma anta sa cam ar jumoˀay ɗike ta ɓula.

⁶²I sa jumˀay ati ka, dar kisa sina, yi Bumbulvuŋ,

⁶³ɓa kisa wuluk keŋ, ɓa kisa pi mesem, yo ti ya masa puluw mungra ngi gwat ka miga taŋ gar na, a sa guw gigisl, kisa wuna mi gu mata. I ya Bumbulvuŋ, Buymisemuŋ maɓi.»