Read South Giziga EZK 17 Bible Online

EZK 17 - South Giziga bible

EZK 17

¹Bumbulvuŋ a ɓiy mi naŋ ani:

²«Ka mburu, slufa ɓi manja sli wala da Israyeleye, yo ɓa taŋ mikicuwul.

³Ki sa ɓa taŋ: Bumbulvuŋ, Buymisemuŋ a ɓi anihĩ: Kurom madiɗa ada, misi kirpasl madiɗahay, zlara kifilih kifilih, ɗak ɗak arleˀe, yo ngboɗoɗo, a so a Libaŋ. A puslahã metetengeɗ ngi mitere,

⁴a ngila hirnga ngi mihaŋ naŋhaya, aru di nga ruwuy ngi migi tererehey, a ka ɓaˀ ar walahay ngi migi tererehey.

⁵Akẽh a wuɗ a hilfa ngi widis ngi si hirwuy nah vuna, waɗ a ka angi li muhufa le. A hirvakaɓa widis meciɗek, a ciki yam madiɗaŋ.

⁶Widis meciɗek nah tuwa a mbul, a tiri gudubun gizliliw gizliliw, sukwi ngi gudubun maɓul ti ɓul, a ka mihaŋ naŋhaya ng'avu kurom tuwa, slaslalak naŋhaya ng'aseˀeŋ. A tiri widis, a ki haŋ ɓaˀ ɓaˀ, a ɓul gizliliw gizliliw.

⁷Amma kurom madiɗa mekelem ada ma, misi ti kirpaslay jek jek, zlar ava ɗak ɗak. Keɗ na, gudubun nah tuwa, ara mbiɗa slaslalak naŋhaya ngir ti vaˀa ti gidaŋ, ɓa kurom a zluvaŋ yam, a ska mihaŋ naŋhaya ng'avaŋ, put ng'avra, mbak li mihirvakaŋ anga na le.

⁸Taŋ mihirvakaŋ zleˀe na, angi guva mezleŋ, gweˀ avu yam madiɗaŋ, ɓa a pi haŋ, a yi, ɓa a tiri gudubun mimezle.

⁹Bumbulvuŋ, Buymisemuŋ a ɓiy, ɓi na: Gudubun nah a sa yi gu kwa? Kurom a sa muɗa slaslalak naŋhaya le na, a sa pula yi naŋ a ɓut, a muˀul takwa? Dimbasl naŋ mumuɗa tuwa na, janga naŋhay gar a sa muˀulom. Ɓa ngi muɗ naŋ na, anta ti gidaŋ haɗa ta, i mizli haɗa mata!

¹⁰I mihirva le si, na a sa yi gu kwa? Da himiɗ ngi si pas ngi miprik misa luuma le na, a sa muˀul wãˀ takwa? A sa muˀul daˀ ar li taŋ mihirvakaŋ vuna si.»

¹¹Bumbulvuŋ a ɓiy ani:

¹²«Ɓa sukwi ngi mizli mislikiɗa ɓi tayna: Ki sinaka mbiɗeˀvra ngi ɓi hana takwa? Ɓa taŋ na: Puraka, buy madiɗa ngi Babiloŋ a so le a Zeruzaleme, a ja buy madiɗa ati buy meciɗek naŋhaya le, a cuh ti taŋ nga Babiloŋ.

¹³A ji di i mbur ngir tizer ngi buy, a ɗiyam ɓi ngi jumoˀay cuwa, a tikaŋ ˀay ɓa a hudum hudum mijeŋŋe, a ja mizli madiɗa ngi buyoy misi asi ruwuyo, a cuh taŋ,

¹⁴ɓa zumabuy a ndir weˀe si, a lum gidaŋ ngi ru nga mbuŋ gu ta, anja ɓa a ja ɓi ngi jumoˀay naŋ na kuy kuy zleˀe.

¹⁵Na ma na, buy nawaya tuwa, a slikiɗ ɓi ava, a slin mizli nga Ezipte, ɓa a vulakaŋ pilisey ati sojehey haɗa. Mbur magi kahana na, a sa lum gidaŋ, yo a sa lih gu vurˀe sukwa? Naŋ mingila ɓi ngi jumoˀay na, ɓa a lih sukwa?

¹⁶Kaɓa ya misi ti siifa gisiŋ na! Buy Israyel a sa muc a ruwuy buy madiɗa ngi Babiloŋ, hirwuy buy madiɗa micaŋ buy a diga na, a sa muc a diga cummo, avu mbur naŋ muhudum ti slir, yo naŋ mingila ɓi ngi jumoˀay na. I ya Bumbulvuŋ, Buymisemuŋ maɓi.

¹⁷Buy madiɗa ngi Ezipte, ko naŋ misi ti sojehey haɗa, yo naŋ misi ti mizli naŋhay hiɗim hiɗim haɗa tekeɗe na, anta sa jinaŋ gu vurˀe ta. Asi mike na, tapas kiɗa vu na, Babiloŋhoy a sa mbam muyuŋ zikitiŋ zikitiŋ a ciki moholo, ngi jiɗ ti raŋ, yo a sa ndiram hay migilahay ngi ɗum, ɓa ngi ngizla zigiduw.

¹⁸A gi slir le, naŋ mingila ɓi ngi jumoˀay na. A vulaŋ haŋ le ngbaŋ, amma ti nah gar na, a ga gwat malambaˀ tayna le gbaˀ na si: kay, naŋ anta sa lih gu ta.

¹⁹Vurˀe, ya Bumbulvuŋ, Buymisemuŋ i ɓi na: Kaɓa ya misi ti siifa gisiŋ na! Hudum mijeŋŋe a mbuŋ ɗu, naŋ muburɗa, yo naŋ mingila ɓi ngi jumoˀay ɗu na, i sa pa zayɓi nah gar nga hirnga naŋ.

²⁰I njira zuva ɗu a hirnga naŋ, gadaŋ ɗu a sa jaŋ vaw, i sa ru di nga Babiloŋ, i sa gaŋ kiita a diga, asi naŋ migi teŋteŋ avu ya ta na.

²¹Amma soje naŋhay keɗeɗe misi ti piliseye, a sa hinaka taŋ finiˀ finiˀ ti maslalam. Milahamay le na, a sa zliɗam hirnga mber mber asi gazlavay gar. Dar kisa sinaka miɓa ɓi hana i ya Bumbulvuŋ.

²²Ya Bumbulvuŋ, Buymisemuŋ i ɓi na: Ya na, i ngila metetengeɗ ngi miter muro kuɗuf kuɗufo, i hirvaŋ, mihaŋ ngi widis miɗiɗa luɓuw luɓuw aruŋ na, i ngila hirnga naŋ ɓuluˀ, i hirva tihaŋ ɗu vuna, a muwã madiɗa, migilaŋ.

²³I hirva a muwã migila asi ruwuy Israyel. A sa ki mihaŋ, a sa yi, a sa tiri miter mimezle. Sukwi ngi ɗiyuwoy gar a sa cifam angaŋ, a sa naˀaka susuɗuk ngi mihaŋ naŋhaya.

²⁴Akẽh so na, widis ngi ɓuhoy gar na, a sa sinaka, ya i Bumbulvuŋ, widis migila, yi maŋ nga ruwuy, widis mima le a ruwuyo, yi gilaŋ, widis mutukuzo, yi muˀuloŋ, yo widis muˀulo le, i ga ɓa a fuyuku. Ya Bumbulvuŋ, yi ɓa ɓi, dar i ga gwata.»