Read South Giziga EZK 18 Bible Online

EZK 18 - South Giziga bible

EZK 18

¹Bumbulvuŋ a ɓiy ani:

²«Mikicuwul maɓi: ‹Cine ngi ziri a humbuɗam yi ngi gudubun magala na, dar sliŋ a ja zirie.› Kum mamaka hiri ngi ɓa ɓi nah asi ruwuy Israyel na vur mike?

³Kaɓa ya misi ti siifa gisiŋ na! Ki maka hiri ngi ɓa mikicuwul hana asi ruwuy Israyele mata! I ya Bumbulvuŋ, Buymisemuŋ maɓi:

⁴Haˀaw, siifa gar na, naŋ asi haŋ ɗu, siifa ngi mangal ati siifa ngi cine, taŋ cuw taŋ asi haŋ ɗu. Mamuco, i mbur magi mungra.

⁵Kaɓa ani, mbur mijeŋŋe: a gi gwat mikaslsla, mijeŋŋe.

⁶N'anta zum ɗaf ngi mikulihey a muwãhay ta, naŋ anta huruk huruk a mbuŋ kuli ngi Israyeley ta, naŋ anta tikina ngwas ngi midigwi naŋ ɓa a hin di ta, naŋ anta ru ng'avi ngwas muro ti dili ta,

⁷naŋ anta zum mbur ta, gwat mbur mijika le ar deɗe ngi duvus na, a mi di da buy naŋ a muŋ, naŋ anta hul ta, mbur muro ti maya, a vulaŋ gwat ngi zum, a vula zana da mbur manja zana,

⁸naŋ anta vul duvus ngi yam ta, naŋ anta wuɗ ɓa a lum fineˀ gidaŋ angi gwat naŋ ta, gwat mijeŋ ta na, naŋ anta ngum gi naŋ ta, a ga kiita ngi mizli kasl kasla.

⁹A sipa jiviɗe kaɓa ɓimujuwa ɗu mawuɗo, sirik ɗuwoyo, a ja taŋ a hirnga, a ga gwatakaslsla: mbur nah na, i mbur mijeŋŋe. Naŋ kaslsla, a ndir ti siifa. I ya Bumbulvuŋ, Buymisemuŋ maɓi.

¹⁰Amma mbur nah tuwa, kaɓa ani, naŋ da ti mangal mufuyo vu, a kiɗ mizli vagay vagay, yo gwat tayna gar na, ara ga taŋ,

¹¹amma ko cine vuna a gi gwat nah pal ɗaˀ ta, yo mangal vuna a zum ɗaf ngi mikuli a muwãhay, a tikina ngwas ngi cil naŋ ɓa a hin di,

¹²a zum gwat ngi mizli migeˀ ircecehey ati ngi misi murgahay, a hul, gwat mbur mijikaŋ di le ar deɗe ngi duvus na, a mi di da buy nah mata, a huruk huruk a mbuŋ kulihey, a gi gwat mukuyta wãˀ,

¹³a vul duvus ngi yam, yo a wuɗ ɓa a lum fineˀ gidaŋ angi gwat naŋ. Naŋ na, a ndir ti siifa kwa! N'anta ndir ti siifa ta. Naŋ miga gwat mukuyta wãˀ tayna na, a mucu, pumbus naŋ a mbiɗi nga hirnga naŋ a muŋ.

¹⁴Amma mburo, naŋ da ti mangal, mungra ngi cine miga taŋ gar na, naŋ a pura taŋ le ti hiri naŋ. A pura taŋ le, amma naŋ, naŋ anta ga kanah ta:

¹⁵naŋ anta zum ɗaf ngi mikuli a muwãhay ta, naŋ anta huruk huruk a mbuŋ kuli ngi Israyeley ta, naŋ anta tikina ngwas ngi cil naŋ ɓa a hin di ta,

¹⁶naŋ anta zum mbur ta, gwat mbur mijikaŋ di le ar deɗe ngi duvus na, naŋ anta sli di himaˀ ta, naŋ anta hul ta, mbur muro ti may na, a vulaŋ ɗafa, mbur manja zana na, a vulaŋ,

¹⁷gwat mijeŋ ta na, naŋ anta ngum gi naŋ ta, gwat naŋ, naŋ anta wuɗ yam anga ta, yo anta wuɗ lum fineˀ gidaŋ anga ta, a ga gwat ngi sirik ɗuwoyo, yo a sipa jiviɗe kaɓa ɓimujuwa ɗu mawuɗo. Mangal nah na, naŋ anta muc asi mungra ngi cine miga zleˀe na ta, naŋ kaslsla, a ndir ti siifa.

¹⁸Amma cine naŋ, a gi moˀore le avu mizli zleˀe, a hul gwat ngi mizli le, a gi gwat mezle a wuzla mizli naŋhaya ta, masa muc i naŋ, asi mungra ngi hirnga naŋ.

¹⁹Na ma na, dar ki ɓam na: ‹Mangal nah na, a jijira malambaˀ ngi cine na ta vur mike kini ma?› Amma mangala, a gi gwat mikaslsla ati gwat mijeŋŋe le, a ja ɓimujuwa ɗuwoyo le gar a hirnga, yo a ga gwataya le gar kaɓa ɓimujuwa mawuɗo. Naŋ kaslsla, a ndir ti siifa gisiŋ.

²⁰Mbur magi mungra na, mamuc i naŋ. Mangala, malambaˀ ngi cine miga na, naŋ anta jijira zayɓi nah ta, yo cine kwana, malambaˀ ngi mangal naŋ miga na, naŋ anta jijira ta ya. Jeŋŋe ngi mbur mijeŋŋe, a ndir a hirnga naŋ, yo moˀore ngi mbur misi moˀore kwana, a ndir a hirnga naŋ ya.

²¹Na so na, mbur misi moˀore, da a pula gi mungra naŋhay na le gar, ɓimujuwa ɗuwoyo, da ara ja taŋ a hirnga, yo da ara gi gwat mikaslsla ati gwat mijeŋŋe na, naŋ kaslsla, a ndir ti siifa, naŋ anta muc ta.

²²Naŋ mislikiɗ ɓi zleˀe gar na, anta wulkaka ɓi nah mata, amma naŋ mandir ti siifa na, asi gi gwat mijeŋŋe naŋ miga na.

²³Ani na, muc ngi mbur migi moˀore vuna, ada ciriy hiri gisiŋ sukwani? Ya Bumbulvuŋ, Buymisemuŋ i ɓukum na: ya mawuɗ na, ɓa mbur misi moˀore a mbiɗa duba da gi gwat naŋhay na, ɓa a ndir ti siifa takwa?

²⁴Amma mbur mijeŋŋe mupula gi gwat mijeŋŋe naŋ na le, a gi gwat malambaˀhay rak rak kaɓa gi gwat mukuyta wãˀ ngi mbur misi moˀore tuwa ya na, a ndir ti siifa sukwani? Slra mijeŋ, naŋ miga taŋ zleˀe gar na, anta sa wulkaka ɓi nah keŋ mata. A muc asi gi teŋteŋ ta naŋ ati mungra naŋ miga taŋ na, a muc asi taŋ.

²⁵Na kumo ma na, dar ki ɓam: ‹Gi gwat nga ya Bumbulvuŋ a bun hiri ndar ta!› Israyeley, cinam kwaɗay: Mubun hiri ta na, i gwat ngi gi ɗu jak kwa? Mubun hiri ta na, i gwat ngi gi kum jaka.

²⁶Da mbur mijeŋŋe a pula gi gwat mijeŋŋe le, dar a gi gwat mijeŋ ta, hã a muc di le kine, naŋ mumuc na, asi gi gwat mijeŋ ta, naŋ miga na.

²⁷Da mbur misi moˀore a pula gi moˀore naŋ na le, ara gi gwat mikaslsa, mijeŋŋe na, a ndir ti siifa.

²⁸Asi slikiɗa ɓi naŋhay zleˀe gar na, a wulka ɓi taŋ le, a pula taŋ le. Naŋ kaslsla, a ndir ti siifa, naŋ anta muc ta.

²⁹Na ma na, kum Israyeleye, ki ɓam na: ‹Gwat ngi gi ngi Bumbulvuŋ a bun hiri ta.› Kum Israyeley, mubun hiri ta na, i gwat ngi gi ɗu jak kwa? Mubun hiri ta na, i gwat ngi gi kum jaka.

³⁰Vurˀe, kum Israyeley, i gukum kiita, mbur gar na, weˀe avu sipi jiviɗ naŋ, Moko, pulaka slikiɗa ɓi kumoy na gar, ɓa mungra kumoy na, a hizigiɗukum mata. I ya Bumbulvuŋ, Buymisemuŋ maɓi.

³¹Slikiɗa ɓi kum mihirasl hirasl ar kum na, hizigaka taŋ avra. Anja ki mbiɗaka mevele nawayaŋ ati wuluk nawayaŋ. Israyeley, ki wuɗam sey ɓa ki micam cummo vur mike?

³²Muc ngi mburo, anta ciriy hiri ta. I ya Bumbulvuŋ, Buymisemuŋ maɓi. Moko so, ndiram ti siifa.»