Read South Giziga EZK 19 Bible Online

EZK 19 - South Giziga bible

EZK 19

¹Ka na, bo ti ˀay ngi dimis ngi tuwa buy Israyeley.

²Ki sa ɓi na: Munuko, i madiya mobor zleˀe, a hin le tup a wuzla moboroy. Tup a wuzla ziri moboroy, ara gila ziri naŋhaya.

³A gila purla ngi si ziri naŋhaya pal kine, hã a tiri gawla mobor, a si na ji gwat ngi zum naŋ le, a humbuɗ mbur.

⁴Sukwi ngi mizli ngi si ruwuyoy micinaka maɓaka ɓi naŋ na, a lam vigiɗ, a jaka ara, a ram di ng'ar ruwuy Ezipte, ɓiri muhurtok hurtok ngik ngik a mi.

⁵Madiya mobor tuwa, naŋ muɗuva wuluk naŋ taˀ, yo njaha hiri naŋ tuwa, naŋ mupura i gir ngatara na, a zuɓ zinga naŋ mekelem purla a wuzla ziri naŋhay tuwa ma, a tiri di gawla mobor.

⁶Aru digi a wuzla moboroyo, a tiri gawla mobor le, a si na ji gwat ngi zum naŋ le, a humbuɗ mbur.

⁷A njuyo hay ngi mizli tuwa njoy njoy, a tiri diŋ ti walahay taŋhaya. Hirwuy ati mizli ngi raˀahaya, ti taŋ macinaka tuwuy naŋ na, didak a muɗa taŋ le.

⁸Sukwi ngi mizli mugun ngi ciki naŋhay, musoko tir li ngi buy miwi liheye, a cicam kaŋ kaŋ ng'ar naŋ. A njiraka gadaŋ taŋ a hirnga naŋ, a jaka le ti pulkaw taŋ.

⁹A ɗiɗaka ti ɓiri muhurtok hurtokoy tuwa, a kaka ar hay ngi gici mobor. A ram di da buy madiɗa ngi Babiloŋ, a ram di ng'ar butumoy, ɓa mizli a cinam ˀay naŋ, a muwã Israyeleye mata.

¹⁰Munuko, a bam vu ati gudubun mihirva le kaˀ a mi yam. A ra yi, a ɗiɗi le tukuf tukuf, asi yam mihaɗa tuwaŋ.

¹¹A ki mihaŋ migidaŋ gidaŋ, mihaŋ naŋ tayna a tiram ganday ngi buyoy. A gil jek a wuzla widis mekelemeye. Gil naŋ tuwa, a guw pura pura, asi mihaŋ naŋhay mihaɗa.

¹²Amma a muɗaka ti mevel, muroh, waɗ fuk a ruwuy, joˀ himiɗ ngi si pas ngi miprik a muˀulo yi naŋhay mindilam a ruwuyo. Mihaŋ naŋhay migidaŋ gidaŋ tuwa, a muˀulom le, vu a zuma taŋ le.

¹³Ani wurenna, a hirvakaŋ le a wuzlaɓuh mikirɗak kirɗak, angi hirwuy mingbazlaŋ ngbazlaŋ, yam anta.

¹⁴Amma vu a bo asi virzi naŋ, a zuma mihaŋ naŋhay ati yi naŋhaya. Mbak mihaŋ migidaŋ gidaŋ, ati ganday ngi buyo anta avu gudubuno mata.» Hana i tuwuy, a zlam di dimis ngi tuwuy.