Read South Giziga EZK 20 Bible Online

EZK 20 - South Giziga bible

EZK 20

¹A dirba ji mizli ng'ar beke, hin mukuruˀ naŋ, ngi kiya muzlum naŋ, ngi vi mitarnaˀ naŋ na, mizli a wuzla micawwa ngi Israyeleye, a soko puraka Bumbulvuŋ. A cifam joa mbuŋ ɗu.

²Bumbulvuŋ a ɓiy na:

³«Ka mburu, ɓa mingiɓi ɗu ani da micawwa ngi Israyeleye. Ɓa taŋ: Bumbulvuŋ, Buymisemuŋ a ɓi na: Kum musoko na ngi pur ɗu kwa? Kaɓa ya misi ti siifa gisiŋ na! Y'anta pula vu ɗu ɓa ki purikiy ta! I ya Bumbulvuŋ, Buymisemuŋ maɓi.

⁴Ka mburu, sey ki ga taŋ kiita, haˀaw, ki ga taŋ kiita takwa?

⁵Ki sa ɓa taŋ na, Bumbulvuŋ, Buymisemuŋ a ɓi anihĩ: Ti hin ya muwunaˀ Israyel na, i hudum le, haŋ paɗ a muŋ da dideˀ ngi Zakopoyo. I biga taŋ vu le angi hirwuy Ezipte. I hudum le a mbuŋ taŋ, haŋ paɗ a muŋ, i ɓa taŋ na: I ya Bumbulvuŋ, Buymisemuŋ kum.

⁶Tapasa na, yi hudum le a mbuŋ taŋ, haŋ paɗ a muŋ, ɓa i bi ti taŋ ti ruwuy Ezipte, ngi ru nga hirwuy, ya mira puro taŋ di: ɗuwa ati mam a ɓulom angi hirwuy nah, hirwuy mimezle ngi si ruwuyoy gar.

⁷I ɓa taŋ le: Gwat mukuy tahay wãˀ magukum hiri na, anja mbur gar a zliɗa taŋ avra. Ki cam ar dili ti huruk huruk a mbuŋ kuli ngi Ezipteheye ta. I ya Bumbulvuŋ, Buymisemuŋ kum.

⁸Amma a slikiɗam ɓi avu ya, ko a ngumam cinikiy mingiɓi ɗu ta. Gwat mukuy tahay wãˀ magaka taŋ hiri na, ko mbur mizliɗa taŋ avra anta, yo a pulaka kuli ngi Ezipteheye ta ma. Dar yi ɓa taŋ na: I sa vunaha mevel ɗu angi taŋ, i sa ga himaˀ ɗu angi taŋ, hã avu kiɗa mi naŋ, angi hirwuy Ezipte vuna si.

⁹Amma, i ga kanah mata na, vur slimiɗ ɗu, ɓa a hiryi a mihiri mizli taŋ micifam a wuzla taŋ na ta. Yi biga taŋ vu le a mihiri ngi sukwi ngi mizli tayna, ti ya mubo ti taŋ ti ruwuy Ezipte.

¹⁰Yi bo ti taŋ ti ruwuy Ezipte, dar i ru ti taŋ nga wuzlaɓuh mikirɗak kirɗaka.

¹¹Yi dubuna taŋ ɓimujuwa ɗuwoyo le, yo i biga taŋ sirik ɗuwoyo le, ɓa mburo, da ara gi taŋ slra na, a ndir ti siifa.

¹²Yi ɗuva taŋ ɓi ngi sabat ɗuwoyo ɓa a ndir i gwat mabigi gwat ar wala ɗu ati taŋ, yo ɓa mizli a sinaka, matiri ti taŋ pal na, i ya Bumbulvuŋ.

¹³Amma Israyeley a slikiɗam ɓi avu ya, a wuzlaɓuh mikirɗak kirɗaka. A sipaka jiviɗe kaɓa ɓimujuwa ɗu mawuɗ ta. Sirik ɗuwoy, maga ɓa mbur magi taŋ slra a ndir ti siifa na, a zliɗaka taŋ avra. Ndrehhe na, ara hiryaka ɓi ngi sabat ɗuwoyo. Dar yi ɓi: I sa vunaha himaˀ ɗu angi taŋ a wuzlaɓuh mikirɗak kirɗaka, ɓa a ngizlam kuɗup wãˀ.

¹⁴Amma i ga kanah mata vur slimiɗ ɗu, anja ɓa slimiɗ ɗu a hiryi a mihiri ngi sukwi ngi mizli, ya mibi taŋ ti wuzla taŋ na ta.

¹⁵A wuzlaɓuh mikirɗak kirɗaka, i hudum a mbuŋ taŋ ava ma, haŋ paɗ a muŋ, i ɓi: Y'anta sa ci ti taŋ angi hirwuy ya mavula taŋ di na mata. Ɗuwa ati mam a ɓulom angi hirwuy nah, i hirwuy mimezle ngi si ruwuyoy gar.

¹⁶Asi a burɗaka ɓi ngi sirik ɗuwoyo le, a sipaka jiviɗe kaɓa ɓimujuwa ɗu mawuɗ ta, a hiryaka ɓi ngi sabat ɗuwoyo le, vur a vulaka mevel taŋ le haɗa da kuli taŋhay.

¹⁷Amma ɓa i ziza taŋ na, i pura taŋ ircece haɗa, yo i ngizla taŋ a wuzlaɓuh mikirɗak kirɗaka ta.

¹⁸A wuzlaɓuh mikirɗak kirɗaka, i ɓa ziri taŋhaya na: ‹Ki sipaka jiviɗe kaɓa ɓimujuwa ngi cine kumoy mawuɗ na ta, ki jaka sirik taŋhay na a hirnga ta, ki ra cam ar dili ti huruk huruk a mbuŋ kuli taŋhay.

¹⁹I ya Bumbulvuŋ, Buymisemuŋ kum: sipaka jiviɗe kaɓa ɓimujuwa ɗu mawuɗo, sirik ɗuwoyo, jaka taŋ a hirnga, yo gam taŋ slra.

²⁰Sabat ɗuwoyo, tiram taŋ i gwat muvuku vu taŋ , i gwat mabigi gwat ar wala ɗu ati kum, ɓa mizli a sinaka, yi Bumbulvuŋ, Buymisemuŋ kum.›

²¹Amma ziri a slikiɗam ɓi avu ya, a sipaka jiviɗe kaɓa ɓimujuwa ɗu mawuɗ ta, a jaka sirik ɗuwoyo a hirnga ta, t'anta gam taŋ slra ta, anja da mbur ara gi taŋ slra na, a ndir ti siifa mbele taŋ ngbaŋ. A hiryaka ɓi ngi sabat ɗuwoyo. Dar yi ɓi: I sa vunaha mevel ɗu ng'ar taŋ, i sa ga himaˀ ɗu angi taŋ, hã avu kiɗa mi naŋ, a wuzlaɓuh mikirɗak kirɗaka.

²²Amma i mo ti haŋ ɗu nga ruwuy a muŋ, i ga kanah mata na, vur slimiɗ ɗu, anja ɓa slimiɗ ɗu a hiryi a wuzla Eziptehey, ya mubo ti taŋ a mihiri taŋ na ta.

²³A wuzlaɓuh mikirɗak kirɗaka, yi hudum a mbuŋ taŋ, haŋ paɗ a muŋ, yi ɓi: yi sa zliɗa hirnga taŋ nga wuzla sukwi ngi mizli, yo i sa waha taŋ pal pal ng'asi ruwuyoy.

²⁴Vur a gam slra ti sirik ɗuwoyo ta, a burɗaka ɓimujuwa ɗuwoyo le, a hiryaka sabat ɗuwuyo le, yo a pulaka vu taŋ mbak da kuli ngi cine taŋhay.

²⁵Bac ng'ara ma na, ɓimujuwa mezlehey ta ati sirik maga ɓa mbur a ndir ti siifa ta na, dar ya vuna i vula taŋ di.

²⁶I pula taŋ a cam ar dili ti gwat ngi vul taŋhay hanayna: gi mikuli ti ziri taŋ mizile modogomoy. I wuɗ kanah na, ɓa zluwun a ga taŋ, ɓa a sinaka yi Bumbulvuŋ.

²⁷Vurˀe ka mburu, ɓa ɓi hana da Israyeleye, ɓa taŋ na: Bumbulvuŋ, Buymisemuŋ a ɓi na: cine kumoy a zikiy le ma, ti gi teŋteŋ taŋ ta na.

²⁸I ci ti taŋ le angi hirwuy ya muhudum, haŋ paɗ a muŋ, ɓa i vula taŋ di na. Li miɗingir ɗingirey ati siziɓey gar na, taŋ hiri taˀ angi taŋ. A gaka mikuli taŋhay a diga, gwat ngi vul taŋhay ngi slikiɗa mevel na, a gaka taŋ a diga, a paka urdi taŋhay ngi tisla mevel a diga, waɗ a puslaka mbaazla taŋhay a diga.

²⁹Yi ɓa taŋ na: Li mijiɗngwil, kum maram ng'ara nah vuna i mike? A cakaŋ slimiɗe ‹Li miɗingir› hã dana.

³⁰Vurˀe, ɓa Israyeleye na: Bumbulvuŋ, Buymisemuŋ a ɓi na: Ani, ki cam le ar dili ti kum masipaka gi gwat ngi cine kumoy na, ti kum mahuruk hurukam a mbuŋ gwat mukuy ta taŋhay na.

³¹Da kum mira soko ti gwat ngi vul kumoy, kum mira gam mikuli ti ziri kum mizilehey na, kite ki cam le ar dili ati kuli kumoyo hã dana. Israyeley, ɓa ya, i pulukum vu, ki purikiy sukwa? Kaɓa ya misi ti siifa gisiŋ na! I ya Bumbulvuŋ, Buymisemuŋ maɓi: Y'anta pulukum vu ɓa ki purkiy ta.

³²Gwat kum mawulkaka na, anta sa ndilo ta, kum maɓam: ‹I wuɗam i ndiram kaɓa sukwi ngi mizli mekelemey, kaɓa muy ngi mizli ngi si ruwuy mekelemey, ɓa i gam mezegwel da dumoy ati ɗuguroy na›.

³³Ya Bumbulvuŋ, Buymisemuŋ i ɓi: Kaɓa ya misi ti siifa gisiŋ na! Ya masa zum buy ar kum na, ti gidaŋ ɗu, ti haŋ paɗ a muŋ waɗ ti vunaha himaˀ ɗu.

³⁴Akẽh na, i sa bo ti kum ti wuzla sukwi ngi mizli, yo i sa kuso hirnga kumo tisi ruwuyoy, ya muzliɗukum hirnga zleˀe nga diga tuwa, ti gidaŋ ɗu, ti haŋ paɗ a muŋ waɗ ti vunaha himaˀ ɗu.

³⁵I sa ru ti kum nga wuzlaɓuh mikirɗak kirɗak ngi mizli mekelemey, i sa gukum kiita ɗu hiri taˀ taˀ.

³⁶Ya miga kiita da cine kumoy a wuzlaɓuh mikirɗak kirɗak ngi Ezipte na, yi sa gukum di da kumo kanah ya, i ya Bumbulvuŋ, Buymisemuŋ maɓi.

³⁷I sa cuh ti kum, ganday kilak asi kum, yo i sa ci ti kum ar ɗiya ɓi ngi jumoˀay.

³⁸Mizli mislikiɗam ɓi avu ya, yo micinikiy mi ta na, i sa bi ti taŋ avra ti wuzla kumo. Hirwuy taŋ mislikiɗam ng'ara na, i sa bi ti taŋ ti raˀa avra, amma t'anta sa cam sar asi ruwuy Israyele ta. Dar kisa sinaka, yi Bumbulvuŋ.

³⁹Amma kumo so na Israyeley, ya Bumbulvuŋ i ɓukum na: anja mbur gar ara ga mezegwel da kuli naŋhaya ɓula ni. Amma na, kisa puraka, kisa cinikiy mi cummo ta kwana. Dar kum anta sa hiryaka slimiɗ ɗu ti gwat ngi vul kumoy waɗ ti kuli kumoy na mata.

⁴⁰Asi Israyeley misi asi ruwuy gar, masa gikiy mezegweley na, a muwã ɗu mipal, muwã migila ngi Israyel na. Gwat kum masa zuɓaka taŋ avu gwat kumoy, gwat ngi vul kum mimezlehey da ya ati gwat kum masa vulaka taŋ gar na, i sa tiɓa taŋ a diga. I ya Bumbulvuŋ, Buymisemuŋ maɓi.

⁴¹Ya misa bo ti kum le ti wuzla mizli mekelemeye, yo ya misa kuso hirnga kumo le tisi ruwuy kum mizliɗam hirnga nga diga tuwa na, yi sa tuɓukum kaɓa urdi matisl mevel. I sa biga ya mipal na a mihiri ngi sukwi ngi mizli, tisi kum.

⁴²Ti ya misa ndil le ti kum angi hirwuy Israyel, hirwuy ya muhudum vurˀe, haŋ paɗ a muŋ, i sa vula da cine kumoy na, kisa sinaka, yi Bumbulvuŋ.

⁴³Gi gwat kum ati slra kum gar mici ti kum ar dili na, kisa wulkaka keŋ a diga. Ko anta sa gukum kuy ta, asi gwat malambaˀ gar, kum migaka na.

⁴⁴Ti ya masa gi ti kum asi slimiɗ ɗu, anta asi gi gwat kum malamabaˀ ati slra kum mihirya na ta na, kum Israyeleye, kisa sinaka yi Bumbulvuŋ. I ya Bumbulvuŋ, Buymisemuŋ maɓi.»