Read South Giziga EZK 21 Bible Online

EZK 21 - South Giziga bible

EZK 21

¹Bumbulvuŋ a ɓiy ani:

²«Ka mburu, zuɓa hiri, bula bal bal tir vay ruwuyo, buca mizli misi tir vay ruwuyo, njika mingiɓi ɗu vur mizli ngi ɓuh ngir vay ruwuyo.

³Ki sa ɓa mizli ngi ɓuh vay ngi ruwuyo na: Cinaka mingiɓi ngi Bumbulvuŋ. Ya Bumbulvuŋ, Buymisemuŋ i ɓi na: Ani i sa bul vu a wuzla kumo. Dum tukuzo ati dum muˀulo gar na, vu a sa wura taŋ. Irne vu mihilɓiɓ anta sa muc pam le ta. Zle tir vay ruwuy ati vay muŋ gar na, a sa wura mizli gar.

⁴Akẽh na, mbur gar a sa pura, mubula vu nah i ya Bumbulvuŋ, yo vu nah anta sa muc pam le ta.»

⁵Dar ya mijiviɗ tuwa i ɓi: «Aw Bumbulvuŋ, Buymisemuŋ! Mizli tayna vuna a ɓam vur ya na: ‹Hana i mbur maɓi mikicuwuloy takwa.›»

⁶Bumbulvuŋ a ɓiy na:

⁷«Ka mburu, bula hiri bal bal ngir ti Zeruzaleme, buca mizli misi ar hay ngi Bumbulvuŋ, njika mingiɓi ɗu maɓi vur hirwuy Israyele.

⁸Ki sa ɓa mizli ngi si ruwuy Israyele: Bumbulvuŋ a ɓi na: I ra so lumukum akẽh. I sa muɗo maslalam tir haya, mbur mijeŋŋe ati mbur misi moˀore ngi si ruwuy kumoyo, i sa kiɗa taŋ.

⁹Ya masa muɗo maslalam tir haya vur mizli gar na, ngi kiɗa mbur mijeŋŋe ati mbur misi moˀore ngi si ruwuy kumoy, zle tir vay ruwuy hã sesẽŋ tir vay muŋ.

¹⁰Dar mizli gar a sa sinaka, i ya Bumbulvuŋ, mamuɗo maslalam tir haya, yo maslalama, naŋ anta mi ng'ar haya mata.

¹¹Ka mburu, tuwa ɓi ɗike, guɓ guɓ ti ɓi miɗalaka. Ki sa tuwa ɓi ɗike daˀ a mihiri mizli vuna si.

¹²Da taŋ misa cufuɗukuw le: ‹Ki tuwuy mike› na, kisa mbiɗa taŋ di: ‹I tuwuy labara mandilawa ani. Mevel a sa sla taŋ gar. Haŋ taŋhay a sa ndiram guluɓ guluɓ, mevel anta ar haya mata, popurokoy a sa tiɓam yam ciliw ciliw. Ani labara ara ndilawa, a gi le gisiŋ. I ya Bumbulvuŋ, Buymisemuŋ maɓi.›»

¹³Bumbulvuŋ a ɓiy ani:

¹⁴«Ka mburu, njika mingiɓi ɗu. Ki sa ɓa mizli na: Bumbulvuŋ a ɓi anihĩ: Maslalam ani! Maslalam mumbusa le, yo naŋ walak walak!

¹⁵I mumbusa le ngi ngizla mizli, naŋ walak walak ɓa a wucuɗ ka vuŋ.

¹⁶I vula ɓa a mbusaka mi naŋ, ɓa ngi ja hirnga naŋ wik ti haŋ. A mbusaka maslalama le, a sitaka le sat sat, ɓa a vulaka kaw asi haŋ ngi mbur mikiɗa hirnga.

¹⁷Ka mburu, widi, ɓi haɗa haɗa, maslalam ara ngum asi mizli ɗuwoyo cah, a wuzla buy Israyeleye gar na, ara ngum asi taŋ cah. A ndilam vu kuvbum ti maslalam ng'ar mizli ɗuwoyo. Tuko haŋ ar tuwal so.

¹⁸I ɓi ngi purukum. Da kaɓa ganday ngi buy, maburuɗ vu hana, naŋ anta mata na, masa gi i mike? I ya Bumbulvuŋ, Buymisemuŋ maɓi. [2]

¹⁹Ka mburu, njika mingiɓi ɗu da mizli, hana i mingiɓi nga ya Bumbulvuŋ, Buymisemuŋ. Humbuɗ haŋ. Kiɗ ti maslalam a sa gi makaw cuw, makaw makir. I maslalam makiɗ mizli vagay vagay, maslalam madiɗa makiɗ mizli vagay vagay, masa kiɗa taŋ vagay vagay i maslalam nah.

²⁰Ɓa didak a muɗa mizli gbeŋ gbeŋ, ɓa mizli a ndilam kuros kuroso. A mizlingre taŋhay gar na, i ki maslalam le ɓa ngi ngizla mizli. A mbusaka le ɓa a wucuɗ walak walak kaɓa vuŋ, a sitaka le sat sat ngi ngizla mizli.

²¹Ka maslalam mazum raɓ raɓa, ngum ti ka ti ka, tir vay ka mimbiɗi le pulaˀ gar si.

²²Ya kwana, i ra kiɗ ti haŋ ɗu turɓus turɓus, hã i ra kiɗa mi ngi ga mevel ɗu, Miɓi hana i ya Bumbulvuŋ.»

²³Bumbulvuŋ a ɓiy ani:

²⁴«Ka mburu, cin, cir jiviɗey cuw da buy madiɗa ngi Babiloŋ ɓa a sa coho ti maslalam naŋ tir taŋ. Anja jiviɗ mucuw tayna a boko ti ruwuy purla. Ar zli virzi ngi jiviɗ gar na, kisa gi gwat mabiga jiviɗ ngi ru ng'ar walahay.

²⁵Ki sa cir jiviɗ ɓa a sa cohoko ti maslalam nga hirwuy Raba, walahay hirnga ngi dideˀ ngi Amoŋhoy, waɗ nga Zeruzalem, walahay muguno le ti mohol, angi hirwuy Zuda.

²⁶Naɓa buy madiɗa ngi Babiloŋ naŋ da deŋ ar mazlaka jiviɗ mucuwoy tuwa, ɓa a gi ceregezleŋ. Vurˀe, ara wusa luvutoyo, ara cufuɗa kulihey, waɗ a pura mevel ngi gwat misãmihey, ɓa a bigakaŋ gwat.

²⁷Ceregezleŋ misi a haŋ hazum ngi buy madiɗa ngi Babiloŋ na, a diɗ ar Zeruzalem, dar a ɓi: ‹Anja ɓa mizli a pam masin ngi vurumoy sek sek a Zeruzaleme, anja a hizigam widi nga gi vurum, anja a tilam mi ngi zla gi vurum, anja a pam masin ngi vurumoy sek sek a mizlingreheye, anja a pam muyuŋ zikitiŋ zikitiŋ, waɗ a lam vigiɗey leˀ leˀe!›

²⁸Taŋ a sa puraka ɓi ngi ceregezleŋ mibiga na kaɓa i ɓi ngatara lambaˀa, asi a ɓaka taŋ le ɗaˀ le, a sa jiginaka taŋ. Amma buy madiɗa ngi Babiloŋ a biga taŋ di i malambaˀ taŋ migakaŋ, a sa jaka taŋ cummo.

²⁹Vurˀe, ya Bumbulvuŋ, Buymisemuŋ i ɓi na: ‹Ani mungra madiɗa kum magaka na, ki ra gaka ɓa a puyukiy hirnga ta, asi ki ra bigaka slikiɗa ɓi kumo njoy wãˀ, yo mungra kumoy ara puram ɓaˀ ɓaˀ ar li babara ar gwat ngi gi kumoy gar. Yo asi ɓi kum mapuyukiy hirnga ta tuwa na, a sa jukum tap tap ti haŋ.

³⁰Cin, buy Israyel, ka mbur miziriɗa mi, misi moˀore: hin ngi kuti ɗik a sa ndilo pas purla ati hin ngi mungra masa kiɗ mi na ya.

³¹Ya Bumbulvuŋ, Buymisemuŋ i ɓi na: Loppol ɗik ngi zana mutuwaɗ tuwaɗ a hirnga na, anja a pusukukuw di avra, yo loppol ɗik mutuwuɗa tuwaɗ tuwaɗ kulaˀ a hirnga na, anja a cikukuw di avra. Gwatay a sa tiram i taŋ mata. A sa slikiɗaka mizli mihiyãhaya ng'a muŋ, yo a sa maka mizli migidaŋhaya nga ruwuy!

³²Diŋ, diŋ, Zeruzaleme, i sa tiri di diŋ. Gwat migi kanah ɗaˀ anta ndiɗaˀ. I sa tiri di kanah, hã buy ngi kiita muso le, mbur misi ya mupula ɓi nah le asi haŋ naŋ.

³³Ka mburu, cin, njika mingiɓi ɗu da mizli. Ki sa ɓi na: Bumbulvuŋ, Buymisemuŋ a ɓi ani, vur dideˀ ngi Amoŋhoy waɗ vur singir taŋ ngi zi vu na. Ki sa ɓi: Maslalama, a muɗoko di le tir haya, i mumbusa le sat sat ngi ngizla vu, ngi sli ˀay ngi mizli, yo ɓa a wucuɗ walak walak kaɓa vuŋ.

³⁴Ɓa ngi sla ˀay ngi misi moˀorehey, mukuwahay, misi hin ngi kuti taŋ masa ndilo pas purla ati hin ngi mungra masa kiɗ mi na. Ani mizli ara puram ɓi migisiŋ ta, yo ara njikam ɓi ngi slirey lambaˀ vur kumo.

³⁵Ca maslalama ng'ar haya a muŋ. I sa guw kiita ar li taŋ mugukuw anga na, ar hirwuy ka mubo ti raˀa.

³⁶I sa vunaha mevel ɗu ng'ar ka. Himaˀ ɗu mivik vik ka vu na, i sa bulo di ng'ar ka. I sa vuluw asi haŋ ngi gilaw misinaka ngizla mizli.

³⁷Vu a sa zumuw, pumbus ɗik a sa pi asi ruwuyo. Anta sa wulkaka ɓi ɗike mata, asi maɓi i ya Bumbulvuŋ.»