Read South Giziga EZK 22 Bible Online

EZK 22 - South Giziga bible

EZK 22

¹Bumbulvuŋ a ɓiy ani:

²Ka mburu, cin, walahay hana i mikiɗa hirnga, anja ki gaŋ kiita, yo ki bigaŋ gi gwat naŋ malambaˀhay na.

³Ki sa ɓi na, Bumbulvuŋ, Buymisemuŋ a ɓi anihĩ: Walahay hana, mizli ngi raˀahay i mikiɗa hirngahay, ani hin ngi zizi naŋ ara ndilawa. A vuɗam kulihey a hay taŋ, mbak hã a ci ti taŋ ar dili.

⁴Ka makiɗ hirnga tuwa na, ki gi malambaˀ le. Ka mavuɗ kulihey na, ki ci le ar dili. Naŋ kine, ki kiroho hin ngi zizi ɗike le gweˀe, ki ndilo le ar kiɗa mi ngi vi ɗike. Vurˀe, i ra ga ɓa ki pi mesem avu sukwi ngi mizli gar, yo ɓa hirwuy gar a singir ar ka.

⁵Hirwuy mikileŋ kileŋhey malla migweˀ gweˀhey gar na, a sa singiram ar ka, asi ki hirya slimiɗ ɗike le, yo gi biyãˀ biyãˀ ɗike, naŋ fineˀ gidaŋ.

⁶Buy Israyel ngisi hirwuy ɗikeye, mbur gar na, ara biga gidaŋ naŋ, a kiɗ di hirnga.

⁷Asi hirwuy ɗike, mbur a hirsa cine ati mumuŋ, a guzuvuraka mbur moholoyo, a zumaka gwat ngi mutuhuhoy ati ngi wudigahaya.

⁸Gwat ɗuwoy mipal na, ki pura taŋ hiris le, ki hirya sabat ɗuwoyo.

⁹Asi hirwuy ɗike, ada jam ɓi gbiŋ gbiŋ lambaˀ ngi pa mi da mizli ɓa a kiɗam hirnga, ada zumam ɗaf ngi mikuli a muwãhay, ada gam gwat ngi mesem.

¹⁰Asi hirwuy ɗike, mbur a pura mbuŋ ngi cine naŋ, ko da ngwasa naŋ ti nguf kwana, a jakaŋ, a hinam di.

¹¹Asi hirwuy ɗike, mbur a gi gwat mukuyta wãˀ ti ngwas ngi cil naŋ. Mbur mekelem a hirya vu naŋ ti gi gwat ngi hazi ati ngwas ngi mangal naŋ. Yo asi hirwuy ɗike, mbur numuŋ a ja sukum naŋ, zuŋ ngi cine, a hin di.

¹²Asi hirwuy ɗike, a wurkaka mburo, ɓa ara kiɗ hirnga. Mbur a didiɗ gwat ɓa a sa mo di ti yam anga haɗa. Ki zuma gwat ngi cil ɗike ti gidaŋ, amma ya, ki puyuk hirnga le ti ya. I ya Bumbulvuŋ, Buymisemuŋ maɓi.

¹³Gwat ngi lum ɗike, ka mawuɗ yam naŋ fineˀ gidaŋ le, waɗ mungra madiɗaka maga na, pura, ya mahumbuɗ haŋ vurˀe.

¹⁴Tapas ya masa guw ɓi na, kisa lum gidaŋ a mevele, yo haŋ ɗikey a sa ndiram gidaŋ gidaŋ gu aruŋ kwa? Ya Bumbulvuŋ, yi ɓa ɓi, joˀ yi gaŋ.

¹⁵I sa zliɗukum hirnga mber mber nga wuzla sukwi ngi mizli, yo i sa wuhukum ng'asi ruwuy gar. Ɓi ngi dili ngisi ruwuy ɗik na, i sa kiɗa mi naŋ.

¹⁶I ka vuna mihirya hirnga ɗik a mihiri ngi sukwi ngi mizli, amma kisa si na yi Bumbulvuŋ.»

¹⁷Bumbulvuŋ a ɓiy ani:

¹⁸«Ka mburu, Israyeley a tiram le avu yakaɓa zayɓiri. Taŋ gar i ɓiri bara, ɓiri gaza, ndifri malla ɓiri muho gar, plom , milihiɗahay le ar li mapam di ɓiri.

¹⁹Vurˀe, ya Bumbulvuŋ, Buymisemuŋ i ɓi na: Ani ki tiram zayɓiri le, yawwa, i sa ra cikilukum zikitiŋ ar walahay Zeruzalem.

²⁰A cikilaka ɓiriheye zit, ɓiri bara, ɓiri gaza, ɓiri muho gar, plom, waɗ ndiffri ar li mapam di ɓiri, a kiɗaka kukutu aseˀe, hã naŋ muluwusl le. Naŋ kine, ya miji mevel ati ya muzuɓ himaˀ na, i sa cikilukum zit ar li mapam di ɓiri kanah ya, ɓa i luwuslukum.»

²¹I sa cikilukum zikitiŋ, yo i sa furo vu ngi himaˀ ɗu na fir fir asi kumo, joˀ kisa luwuslam a Zeruzaleme.

²²Ki sa luwuslam a Zeruzaleme kaɓa ɓiri bara maluwusl ar li mapam di ɓiri na ya. Dar kisa sinaka yi Bumbulvuŋ mipa himaˀ ɗu ar kumo.»

²³Bumbulvuŋ a ɓiy ani:

²⁴«Ka mburu, ɓa Israyeleye na, hirwuy taŋ a zuɓa dili naŋ avra ta, ti hin ya muzuɓ himaˀ na, a lum vuŋ lum le ta.

²⁵Mijiviɗ ngi si ruwuy naŋhay a juwam vu ti ɓi ngi gidiɓihey. A ra zumaka mizli, kaɓa mobor matuwuy ar li humbuɗa useˀ. A ra tiɓaka dala ati zliliheye. A ra gaka ɓa wudigahay a yam vu haɗa ar walahaya.

²⁶Migi mikuli naŋhay a ngilaka ɓimujuwa ɗu le, gwat ɗuwoy mipal na, a hiryaka taŋ le. A gwahaka wala ngi gwat mipala tivi gwat muho gara ta. Gwat misi dili ati gwat manja dili na, a wunkaka taŋ pal pal ta. A mbiɗaka duba le da ɓi ngi sabat ɗuwoyo, joˀ yi ndir yi mihirya le a wuzla taŋ.

²⁷Buy ngi raˀahaya, taŋ kaɓa kiriɓuhoy manguwam gwat ngi zum taŋ, taŋ weˀ weˀ vu ngi kiɗa hirnga, ngi ziza mizli ɓa a ciram tisi taŋ ngi luuma gwata.

²⁸Mijiviɗ taŋhay a puyaka taŋ gwat kor kor ɗum taŋ. A puram gwat ti kleŋ ngatara lambaˀ, yo a njikam ɓi ngi gi gilaw da mizli, a ɓam: ‹Bumbulvuŋ, Buymisemuŋ a ɓi kahana›, dambalaka i ya Bumbulvuŋ vuna miɓi ta ngbaŋ.

²⁹Mizli ngi si ruwuyoy a guzuvuraka mizli, a hulom, a zumaka mizli migeˀ ircecehey le ati misi murgahaya. Mbur moholoyo, ar gwat ɓa a ga zuy na, a guzuvurakaŋ.

³⁰I sipi mbur a wuzla taŋ, ɓa ngi ndira hiri ngi mohol a muŋ, ɓa a cici deŋ a mbuŋ ɗu ar mifiliw ngi moholo, ngi jigina hirwuyo, ɓa i waha walahaya ta, amma ko i lum ta.

³¹Dar i pa mevel ɗu ng'ar taŋ. I ngizla taŋ ti himaˀ ɗu misi ka vu na. Dudok ngi gwat ngi gi taŋ na, i pa taŋ zayɓi nah nga hirnga taŋ vuna. I ya Bumbulvuŋ, Buymisemuŋ maɓi.»