Read South Giziga EZK 23 Bible Online

EZK 23 - South Giziga bible

EZK 23

²Ka mburu, ngwasay ada zleˀe cuw, mumuŋ taŋ purla.

³A tiram sulomehey a Ezipte, ar diili taŋ kine aruŋ. Ɗuwa taŋ mijaka haŋ ɗaˀ avu taŋ ta na, a tutumaka taŋ di le a diga, a kaka taŋ haŋ le a didaka.

⁴Slimiɗ taŋhay ani: a zilaka modogomo Ohola, i Samari, mijinga naŋ a zilaka Oholiba, i Zeruzalem. Akẽh na, i zuɓa taŋ da ya ngi ngwas a yikiy ziri mizile ati mongosohoy le.

⁵Amma Ohola, i ngwas nga ya ngbaŋ, amma a tiri sulome. A biga may zil naŋ avu mangasl naŋhay waɗ avu Asiriheye:

⁶i soje ngi ɓuh miki zana gagaza ndezzehey, buy miwi li ati mizli madiɗa ngi ngomnahay, gar taŋ i gawlahay aruŋ, a gukuw may zemme, yo taŋ ti pilisey.

⁷Ohola a vula vu naŋ ngi gi sulome ati mizli madiɗa ngi si ruwuy Asiri gar. Hã a hirya vu naŋ ti huruk huruk a mbuŋ kuli taŋhaya, asi may zil naŋ tuwa.

⁸Gi sulome, naŋ muzlo virzi naŋ a Ezipte tuwa, ara ru di nga mbuŋ nga mbuŋ. Adiga, mizli a hinam di le ar diili naŋ kine aruŋ, ɗuwa naŋ mijaka haŋ ɗaˀ ava ta, a tutumakaŋ di le, yo a tiram di sulome le zleˀe.

⁹Vurˀe, yi pulaŋ mbak asi haŋ ngi mangasl naŋhaya, asi haŋ ngi Asirihey, naŋ mibiga may zil naŋ avu taŋ tuwa.

¹⁰Joˀ taŋ a pulakaŋ virzi ti mi, a hilaka ziri naŋ mizile ati mongosohoyo, a kiɗakaŋ ti maslalam. Ɓi migi ava gar na, ɓa ngwasay a purakaŋ. Mizli a gakaŋ kiita, a jaŋ le.

¹¹Hana gar na, sukum naŋ Oholiba a pura le ti hiri naŋ ngbaŋ, amma gar ti nah na, a hiryakaŋ le, hã may zil a fini gidaŋ ma. Gi sulome naŋ a gi le haɗa fineˀ ngi sukum naŋ Ohola tuwa jak ma.

¹²A biga may zil naŋ avu Asirihey: i buy miwi li ati mizli madiɗa ngingomnahay, soje ngi ɓuh miki zana mezlehey, misi pilisey, gar taŋ i gawlahay aruŋ, yo a gukuw zemzem.

¹³I pura na, a ci le ar dili: taŋ cuw taŋ a sipam di i jiviɗ mupurla.

¹⁴Oholiba a gi gwat mekelemey le bac nga mi sulome naŋ vuna ma: a pur foto ngi ziley migeˀ geˀ avu mohol, deŋ ngi mizli Babiloŋhoy migeˀ geˀ ti gwat gagaza.

¹⁵Vuhoy kaˀ kaˀ ti kanda, hirngahay tuwaɗ tuwaɗ ti loppol ngi zana, taŋ gar a bam vu ati buy ngi vurumoy, a bam vu ati Babiloŋhoy a Kalde, hirwuy miyaka taŋ anga.

¹⁶Naŋ mupura taŋ keɗ si na, a biga may zil naŋ avu taŋ ma. A slin mizli nga hirwuy taŋ Kalde.

¹⁷Dar Babiloŋhoy a soko ng'avaŋ, ɓa a hinam di, a cakaŋ ar dili ti gi sulome taŋ na. Naŋ mici ar dili asi taŋ tuwa na, a zla a pura taŋ kuy avu hiri mata.

¹⁸A biga gi sulome naŋ ngbay ar li babara, a biga vu naŋ gulndiŋ a mihiri mizli. Akẽh na, ko yi puraŋ kuy avu hiri mata, kaɓa ya mupura sukum naŋ mongoso zleˀe kuy avu hiri ta na ya.

¹⁹A ra ga sulome naŋ makaw mbeˀ mbeˀ, kaɓa ar hin ngi gi zuŋ naŋ, ti di naŋ migi sulome zleˀe a Ezipte tuwa.

²⁰A biga kwelegwer naŋ avu sulomehey, misi mbuŋ taŋ kaɓa ngi zunguhoy, yo vu taŋ a bo kaɓa ngi pilisey.

²¹Ki mo le ar sulome ɗik misi ti zuŋ na a muŋ, ti di Eziptehey matutumukuw ɗuwa ɗik mijaka haŋ ɗaˀ ava ta ati didak ɗik mikam haŋ ɗaˀ ara ta tuwa.

²²Naŋ kine Oholiba, ya Bumbulvuŋ, Buymisemuŋ i ɓi na: Ani i wuɗ i ga ɓa mangasl ɗikey a a mbiɗam hirnga avu ka, mizli gar, ka mapura taŋ kuy avu hiri ta na, ko taŋ a maka gar na, i sa ga ɓa a slikiɗam ɓi ti ka:

²³i Babiloŋhoy ati Kaldehey gar, mizli Pekotoy, Sowahay ati Kowahay, waɗ mizli Asiriheye jom ng'avi taŋ, gawla magam vu zemme, buy miwi li ati mizli madiɗa ngi ngomnahay, buyoy, mizli micawwahay, taŋ cek i misi pilisey.

²⁴Akẽh na, mizli vay muŋhoy a sa soko ti mota ngi vurumoy ati motahay ng'ar ka: i zigiduw haɗa teˀe. A sa cicam gun hirnga ɗike, ti mbaray meciɗek ati madiɗahay waɗ jiiku ngi gandafay kip kip a hirnga. I sa biga ɓi ɗike ngbay a mbuŋ taŋ, a sa gukuw kiitakaɓa ɓimujuwa taŋ mawuɗo.

²⁵I sa pa mevel ɗu ng'ar ka. A sa gukuw gwat ngi kwacay mombroŋ. A sa bukukuw irneˀ, slimiɗ, yo gwat ngi mizli ɗikey masa ndiram gar na, a sa kiɗaka taŋ ti maslalam. A sa hilaka ziri ɗik mizile ati mongosohoyo, yo gwat ɗikey masa ndiram gar na, i vu masa zuma taŋ.

²⁶A sa cikukuw zanahay avra, yo a sa hilaka gwat ngi wuya ɗikeye.

²⁷Kwelegwer ɗik ati sulome ɗik, ka miga a Ezipte na, i sa kiɗa mi taŋ. K'anta sa hĩyã mata, yo k'anta sa wulka Ezipte keŋ mata.

²⁸Asi mike na, ya Bumbulvuŋ, Buymisemuŋ i ɓi na: I wuɗ i vuluw asi haŋ ngi mizli, ka mahirsa taŋ, a haŋ mizli gar, ka mapura taŋ kuy avu hiri ta.

²⁹A sa gukuw gwat malambaˀ haɗa. Lum ɗik gar na, a sa hilaka ceke. A sa pulukuw gulndiŋ, vu ɓaˀ ti mi, dar vu ɗik ka magi di sulome tuwa, a sa ndir ɓaˀ ar li babaraŋ. I kwelegwer ɗik ati sulome ɗik na,

³⁰masa lumuw ɓi hana, asi ki gi sulome le ati sukwi ngi mizli, yo ki ci le ar dili ti huruk huruk ɗik a mbuŋ kuli taŋhaya.

³¹Ki zuɓ di i jiviɗ ngi sukum ɗik mongoso tuwa. Yawwa! Bonoy naŋ misa na, kisa si di i naŋ ya.

³²Ya Bumbulvuŋ, Buymisemuŋ i ɓi na: Bonoy ngi sukum ɗik misa na, kisa si di i naŋ ya, kisa sa ti sikiɗ mikirngiŋ, gujik gujik haɗa. Bonoy nah a sa singiram di ar ka, a sa ɓukuw di mi ngi wuya, asi gwatay ada haɗa a hur bonoy nah:

³³Ndurɓo hiri ati lika ɓi a sa wukuw kaɓa wi ti mbaazla. I bonoy ngi zuma hirnga, yo ngi pula vu ɗoɗok, i bonoy ngi sukum ɗik Samari.

³⁴Ki sa sa ɗer ti virzi naŋ wãˀ, kisa humbuɗa sikiɗe ngiraf ngiraf ti sliŋ, kisa cira ɗuwa ɗikeye ti kurkwasl naŋhay na, asi yi ɓa le. I ya Bumbulvuŋ, Buymisemuŋ maɓi.

³⁵Vurˀe, ya Bumbulvuŋ, Buymisemuŋ i ɓi na: Ani ki puyuk ti ya hirnga le, yo ki hizigiy le fuk nga dirba, naŋ kuy, kwelegwer ɗik ati sulome ɗik na, ka jijira zayɓi nah so.»

³⁶Bumbulvuŋ a ɓiy na: «Ka mburu, ki wuɗ ga kiita da Ohola ati Oholiba kwa? Malambaˀ taŋ mukuyta wãˀ na, njika taŋ di so.

³⁷Vur i migi madamahay, yo i mikiɗa hirngahay. A gam madama le ti huruk huruk taŋ a mbuŋ kuli taŋhaya, waɗ ma na, ziri taŋ miyikiy taŋ na, a gam taŋ mikuli le da kulihey vuna ɓa a humbuɗaka taŋ.

³⁸Gwat Ohola ati Oholiba migikiy di ani ma: Hay ɗu ati sabat ɗuwoyo, a hiryaka taŋ pas purla.

³⁹Ti taŋ migam mikuli ti ziri taŋhay da kulihey na, a cam le tapasa ng'ar hay ɗu, a hiryaka le. Gwat taŋ migaka a wuzla hay ɗu i nah.

⁴⁰Waɗ ma na, a slinam mbur nga zilo mizli ngir li mikileŋ kileŋhey, mizli tuwa mulumaka ɓi ngi misline lum si na, a ndiloko. I mizli misi ka mubun ceɗ ceɗ vur taŋ, ɓerem toh toh da hiri, waɗ ɗiyeˀ ɗiyeˀ vu.

⁴¹Waɗ ki cifi ar arngawo mimezle, tabul taˀ a mbuŋ, ki ka urdi ɗu ngi zlum ti zlumo ɓaˀ araŋ, waɗ mal ɗu taˀ araŋ.

⁴²ˀAy ngi zigiduw mamumul, malik neˀ ta, ara cin. Mizli musoko tir vay wuzlaɓuh mikirɗak kirɗak, jom ng'avi taŋ. A caka ɓalaŋhay a hirbazla ngwasay tuwa, waɗ loppol miwilik wilikey njiv njiv a hirnga taŋhaya.

⁴³Dar i ɓi ti kwacay ɗu vur ngwas mihirya le ti madama tuwa: Wurenna, ara vula vu naŋ ngi gi sulome vuna maso!

⁴⁴Mizli ara ram ng'ava kaɓa maram ng'avi ngwas sulome! Mizli maram ng'avi Ohola ati Oholiba, ngwas kwelegwerey na, kanah.

⁴⁵Amma mizli mijeŋŋehey a sa gaka taŋ kiita, i kiita maja ngwas migi madamahay ati ngwas mikiɗa hirngahay, asi i migi madamahay, yo haŋ taŋ jigiɓ jigiɓ ti pumbus ngi mizli.»

⁴⁶Vurˀe, ya Bumbulvuŋ, Buymisemuŋ i ɓi na: «Anja zigiduw a slikiɗ, ara luuma taŋ, anja mbak didak a muɗa taŋ, a vaka taŋ gwataya.

⁴⁷Anja zigiduw a hiziga taŋ ti ɗugur, a kiɗaka taŋ ti maslalam. Anja a kiɗaka ziri taŋ mizile ati mongosohoyo, yo anja a wuraka taŋ hayaya.

⁴⁸I sa kiɗa mi ngi kwelegwer ngi si ruwuyo. Ngwasay gar a sa ndiram, mumuyuŋ ngi zay sla ɓaˀ ɓaˀ a slimiɗe, yo t'anta sa sipaka kwelegwer kum na mata.

⁴⁹A sa pukum zayɓi ngi kwelegwer kum na, nga hirnga kum a muŋ. Mungra ngi kuli kumoy na, kisa jijiraka zayɓi nah. Dar kisa sinikiy, yi Bumbulvuŋ, Buymisemuŋ.»