Read South Giziga EZK 24 Bible Online

EZK 24 - South Giziga bible

EZK 24

¹A dirba mijaka mizli ng'ar beke, hin mukuruˀ naŋ, ngi kiya mukuruˀ ngi vi mungoltir naŋ na, Bumbulvuŋ a ɓiy mi naŋ ani:

²«Ka mburu, hin dana, hin misenna, toho toh toh angi ɗerewol, asi mike, i hin misi buy madiɗa ngi Babiloŋ mizla hirwuy Zeruzalem ngi kiɗa vu.

³Sukwi ngi mizli mislikiɗa ɓi tayna, wa taŋ ɓi ani ti wi. Ki sa ɓa taŋ, Bumbulvuŋ, Buymisemuŋ a ɓi na: Kirka misirgaɗ ar vu, kirka krik, pi yam ara.

⁴Pi useˀ muloŋ loŋhoy ng'araŋ, useˀ muloŋ loŋ mezlehey, ngi tuwal ati peperehey. Naha jok jok ti tesl mimezlehey.

⁵Ji tumuŋ mimezleŋ, pa tesleye jok jok ng'a hur misirgaɗa. Vuruɗo kuy kuy, ko tesley kwana, sey a dam kuy kuy.

⁶Vurˀe, ya Bumbulvuŋ, Buymisemuŋ i ɓi na: Kay, bonoy da walahay mikiɗa hirnga, naŋ kaɓa misirgaɗ ngi ɓiri, munduva le, misi nduv naŋ a bun ta. Bo ti useˀ ngi raˀa purla purla. Ko ki gi ceregezleŋ vurˀe ta.

⁷Asi pumbus ngi mizli naŋ mikiɗa taŋ na, naŋ da aruŋ. A pa pumbus nah vuna ar mandazlay mupurɗak ar li babara si, a pa a ruwuy ta, ko a pi muyuŋ a hirnga naŋ ta.

⁸Pumbus naŋ mipa ar mandazlay mupurɗak ar li babara na, yi pula mbak manja pi muyuŋ a hirnga naŋ, ɓa a slikiɗiy mevel ti gidaŋ, ɓa i pula cuwala.

⁹Vurˀe, ya Bumbulvuŋ, Buymisemuŋ i ɓi na: Kay, bonoy da walahay mikiɗa hirnga. I wuɗ i ɗiy vu ti dum ngiɗ ngiɗi.

¹⁰Ngil dum, ɗiyeˀ ɗiyeˀ hoŋ, bul vu aseˀeŋ, da useˀe, yo mahiri ngi di naŋ ava, paŋ gwat ngi luguɗo laray, anja tesley a zlizliram wãˀ.

¹¹Ɗuva misirgaɗ munjoŋ kine ar zayvu, ɓa a ji culok, anja ɓiri gaza naŋ na, a ji vu njulilili, anja gwat malambaˀ naŋhay na, a luwuslam a huroˀo luwasl luwasl, yo anja nduv naŋ na, a zlum zlam zlam.

¹²Slra migǝr gǝr vur nduv naŋ hana gar na, i ngataraŋ. Ko vu anta zuɓa nduv ngi vi misirgaɗ hana gu ta.

¹³Zeruzalem, mucuw ar dili i kwelegwer ɗik na. Ya muzuɓ mevel fõh fõh ar ka na, sey da ya mikiɗa mi naŋ le far ta na, dili ɗik anta zuɓ avra ta. Asi yi wuɗ zuɓa dili ɗike le avra zleˀe, amma ko ki ɗiy ta.

¹⁴Ya Bumbulvuŋ i ɓa le, gwat nah a sa ndilo kanah. I sa ga cummo, ti sefel ta, manja pur ircece, y'anta sa zil marava ta wãˀ. A sa gukuw kiita weˀe avu gi gwat ɗik, yo avu slra ɗik ka miga. I ya Bumbulvuŋ, Buymisemuŋ maɓi.

¹⁵Bumbulvuŋ a ɓiy mi naŋ ani:

¹⁶«Mangal ngi mbur, gwat ka mahĩyã, mavuluw mumul a mevel na, yi sa muɗuw di muroh avra. Amma ka so na, k'anta sa gi vagay ta, k'anta sa mbul mi ta, k'anta sa tuwuy ta.

¹⁷Ka niˀic ti mi teˀ teˀ si, ko k'anta sa gi mezegwel ngi vagayay ta. Tuwuɗa hirnga ti loppol ɗike, ca mapiya piya ɗikey a sar, ko ki ɗumo mazlamaya ta, ki zuma ɗaf ngi midigwi ɗikey masukuw di ng'ar vagaya ta.»

¹⁸Ngi miprike, i ɓa ɓi da mizli, amma ngi pastaˀ naŋ na, ngwas ɗu a mucu. Li naŋ muwun na, gwat miɓikiy di ɗaˀ ɗaˀ gar na, i ga kanah.

¹⁹Mizli a ɓikiy na: «Gwat ka maga hana, ki ɓa ndra pulaˀavra naŋ mata kwa?»

²⁰Dar yi ɓa taŋ: «Bumbulvuŋ a ɓiy mi naŋ ani:

²¹Ɓa Israyeleye na: Bumbulvuŋ, Buymisemuŋ a ɓi na: I wuɗ i hirya hay ɗu, gidaŋ kum majijaham di, cira hiri ati njaha hiri kum ar joˀ kum na vurˀe ngbaŋ. Ziri kum mizile ati mongosohoy, kum mupulaka taŋ a Zeruzalem na, a sa kiɗaka taŋ ti maslalam.

²²Dar kisa gam kaɓa ya Ezekiyel migi na ya: Kum anta sa ɗumoko mazlamayaya ta, kum anta sa zumam ɗaf ngi midigwi masukum di ng'ar vagaya ta.

²³Ki sa ndiram, hirngahaya tuwaɗ tuwaɗ ti loppol, yo mipiya piya kulaˀ kulaˀ a sar, kum anta sa gam vagay ta, yo kum anta sa kuɗumam tuwuy ta, amma kisa zãˀãm ar malambaˀ kumoyo, yo mbur gar a sa gidigil ti niˀic vur sukum naŋ.

²⁴Ezekiyel a sa ndir kaɓa gwat ngi bigi gwat avu kumo. Gwat naŋ miga gar na, kisa gaka ya. Da gwat nah a sa ndilo le na, kisa sinaka yi Bumbulvuŋ, Buymisemuŋ.

²⁵Ka mburu, cin, hay ɗu mavula taŋ gidaŋ, cira hiri ati gwat ngi wuya taŋ, mumul taŋ ti gwat taŋ mapuraka, cine ndum taŋ na, yi sa tika taŋ di, yo ziri taŋ mizile ati mongosohoyo, pas purla na, yi sa zuɓa taŋ di avra.

²⁶Tapasa, mizli milaham tir mendere na, a sa soko ng'avi ka, ɓa ki cine labara taŋ.

²⁷Tapasa, mizli milahamaya, ti taŋ misa ndiloko le avu ka na, kisa zla wuna mi, kisa ɓi ɓi muduba, k'anta sa ndir ngbimme mata. Ki sa ndir kaɓa gwat ngi bigi gwat avu taŋ. Dar a sa sinaka, yi Bumbulvuŋ.»