Read South Giziga EZK 25 Bible Online

EZK 25 - South Giziga bible

EZK 25

¹Bumbulvuŋ a ɓiy mi naŋ ani:

²Ka mburu, mbiɗi hiri ng'ar Amoŋhoy, ɓi maɓi ani a hirnga taŋ na, njika taŋ di.

³Ki sa ɓa Amoŋhoyo, ɓa a cinaka mi nga ya Bumbulvuŋ, Buymisemuŋ maɓa taŋ di ani na: Ɓa taŋ: Bumbulvuŋ, Buymisemuŋ a ɓi na, ti di hay ɗu mihiryi, ti taŋ muzumaka hirwuy Israyel, yo ti mijaka mizli Zudahay nga hirwuy mulak na, ki singir le kuɗok kuɗok ar taŋ.

⁴Vurˀe, y'ani i wuɗ i vuluw taˀ wãˀ asi haŋ ngi mijigin ngi si pas ngi miprikey: a sa paka walahay taŋ muguno ti mohol asi hirwuy ɗike, yo a sa cifam ti hay taŋhay ara. Yi ngi gwat ngi migam ngi si hirwuy ɗike, i taŋ masa zumaka taŋ, yo ɗuwa ngi si hirwuy ɗike, i taŋ masa sakaŋ.

⁵Raba, walahay hirnga kumo, i sa tiri di li zum ngi zlogomohoy, yo hirwuy Amoŋhoyo gar, li zum ngi tumuŋhoy. Kanah na, kisa sinaka gisiŋ yi Bumbulvuŋ.

⁶Asi ya Bumbulvuŋ, Buymisemuŋ i ɓi na: Ka miji salalay, ka muzluzluɓ, yo ka mumumul ti membezleŋ ngi vu ɗik wãˀ ti pura hirwuy Israyele hiris le na,

⁷y'ani i wuɗ i biga gidaŋ ɗu avu ka so. I sa vuluw asi haŋ ngi sukwi mekelemey, a sa vaka gwat ɗikeye. I sa guhuw ti wuzla mizli, i sa susuyumuw tisi ruwuyo, i sa kiɗa hilfa ɗike. Dar kisa si na yi Bumbulvuŋ.»

⁸Ya Bumbulvuŋ, Buymisemuŋ i ɓi ani: hirwuy Moˀap ati hirwuy Seˀire, asi taŋ miɓam: Puraka mizli Zudahaya, taŋ kaɓa sukwi mekelemey gar na,

⁹walahay madiɗahay ngi ˀay didik ngi ruwuy Moˀap majiginaka jiviɗ ngi co ng'ara gar na, y'ani i wuɗ i pula taŋ mbak, ɓa mizli a kiɗaka taŋ. Ko walahay mimezlehey naŋhay vuna, kaɓa ani: Bet-Yesimot, Baˀalmeyoŋ ati Kiriyatayim.

¹⁰I pula jiviɗ nah da mizli ngi si pas ngi miprikey, ɓa a zumaka Moˀapa kaɓa taŋ mazumaka Amoŋ na ma. I vula taŋ di ɓa a ndiram da taŋ, ɓa anta zilaka slimiɗ ngi Moˀapay ar sukwi ngi mizli mata.

¹¹I sa ga kiita da hirwuy Moˀapa, dar a sa sinaka yi Bumbulvuŋ.»

¹²Ya Bumbulvuŋ, Buymisemuŋ i ɓi na: «Edomoy muvulaka vu taŋ ngi pula cuwal ar mizli Zudahay, yo taŋ micam ar dili ti pula cuwal ar Zudahay na,

¹³ya Bumbulvuŋ, Buymisemuŋ i ɓi vurˀe na: y'ani i biga gidaŋ ɗu avu Edomo, i sa ngizla mizli ati gwat misãmiheye, i sa tiri di diŋ, zle a Temaŋ hã sesẽŋ a Dedaŋ. Mizli a sa ndilam kuros kuros ti kiɗ ti maslalam.

¹⁴I sa pula Israyel, mizli ɗuwoyo, ɓa a pulaka cuwal nga ya ar Edomoyo. A sa gam ti Edomoyo weˀe avu ya muzuɓ himaˀ na, dar a sa sinaka pula cuwal ɗu. I ya Bumbulvuŋ, Buymisemuŋ maɓi.

¹⁵Ya Bumbulvuŋ, Buymisemuŋ i ɓi na: Filistihey a vulaka vu taŋ le ngi pula cuwala manja pura ircece, yo ti membezleŋ ngi vu taŋ wãˀ, a si i mesene taŋhay misi zle ngadana tahay.

¹⁶Vurˀe, Ya Bumbulvuŋ, Buymisemuŋ i ɓi na: Y'ani i ra biga gidaŋ ɗu avu Filistiheye. I ra ngica mizli Kaftoroy avra, yo mizli mindiram ngi ciki mubuliye, i sa kiɗa hilfa taŋ kap avra.

¹⁷I sa pula cuwal ɗu ar taŋ, i cuwal madiɗa, i sa kuta taŋ ti himaˀ. Ti ya misa pula cuwal ɗu le ar taŋ na, a sa sinaka, yi Bumbulvuŋ.»