Read South Giziga EZK 26 Bible Online

EZK 26 - South Giziga bible

EZK 26

¹A dirba ji mizli ng'ar beke, hin muɓulaˀ, kiya mudumbuŋ naŋ, ngi vi mukuruˀ ngaŋ kaˀ naŋ na, Bumbulvuŋ a ɓiy mingiɓi naŋ ani:

²«Ka mburu, Tir a ɓi le a hirnga Zeruzaleme: ˀEy eh! ˀEy eh! Zeruzalem, mizlingre ngi mizli gar a mbizli le. Yawwa, mindir ngi gi zlili i ya asi, a tiri diŋ le.

³Vurˀe, ya Bumbulvuŋ, Buymisemuŋ i ɓi na: Hey Tir, y'ani i ra lumukuw akẽh! I sa ga ɓa sukwi mekelemey haɗi a slikiɗoko hiɗim hiɗim ng'ar ka, a curbuɗoko kaɓa mubuliy mangi diɓel.

⁴Taŋ a sa mbizlaka mohol ɗikeye, a sa mbizlaka hay ɗik madidiɗahaya, i sa slra hohoy ɗike slar slar, mbak mandazlay ɗike cay ar li babaraŋ.

⁵A sa tiri a hur mubuliye kaɓa li ngi sufa zuvahay. Asi i ɓa le. Sukwi mekelemey a sa vakaŋ gwataya. I ya Bumbulvuŋ, Buymisemuŋ maɓi.

⁶A sa kiɗaka ziri mongoso naŋ ngir prokoyo ti maslalam. Dar mizli a sa sinaka yi Bumbulvuŋ.

⁷Naŋ kine, ya Bumbulvuŋ, Buymisemuŋ i ɓi na: Ani i sa ga, ɓa Nabukodonozor, buy madiɗa ngi Babiloŋ, buy vay muŋ, buy mufuna buyoy, a slikiɗo a sa lumuw ka Tire, ti pilis naŋhay, ti mota ngi vurumoy, ti misi pilisey, ti sojehey hiɗim hiɗim, mizli haɗa, ko a sluf ta.

⁸A sa kiɗa ziri diili ɗik ngir prokoyo ti maslalam. A sa li vigiɗey a mbuŋ ɗike. A sa kus hirwuy kos kos ndit a mbuŋ ɗike, waɗ a sa jaha mbaray naŋ madiɗahaya a mbuŋ ɗike.

⁹A sa mbizla mohol ɗike ti masin naŋ ngi vurum, a sa waha hay ɗik madidiɗahaya ti jiga naŋhay.

¹⁰Pilis naŋhay misirgiɗim sirgiɗim haɗa tuwa na, lagwada taŋ a sa sirtuw sirit. Hurum ngi sar ngi pilisey makukuroko taŋ, ngi sar ngi mota ngi vurumoyo, hã a sa jijika mohol ɗikeye. Asi mike na, a sa cam ti mizlingre ɗikeye, kaɓa macam ng'ar walahay misi vurum a zuma le.

¹¹A sa sipa jiviɗ madiɗa ɗikeye tiɗeˀe ti pilis naŋhaya. A sa kiɗa mizli ɗikeye ti maslalam, ɗugur minga kaˀ ngi biga gidaŋ ɗik na, a sa diɗ a ruwuy.

¹²A sa hilaka zlili ɗike, kaɓa gwat ngir vurum, a sa vaka gwat ngi terere ɗikeye a sa mbizlaka mohol ɗikeye, hay ɗik mimezleheye, a sa wahaka taŋ nguɓoc nguɓoc, yo ɗugur taŋhay, dum ati hohoy taŋhaya, a sa zliɗaka taŋ yimak ng'asi yam.

¹³I sa tika dimis ɗikey ka mazla taŋ na, ko mizli anta sa cinam ˀay ngi gujuvur ɗikeye mata.

¹⁴I sa tiri ti ka mandazlay cay ar li babaraŋ. Ki sa tiri li sufa zuvahay. Anta sa maka hiri ngi ndir ɗike mata wãˀ. Asi miɓi i ya Bumbulvuŋ. I ya Bumbulvuŋ, Buymisemuŋ maɓi.

¹⁵Naŋ kine, ya Buymisemuŋ i ɓa Tire na: Ti ka masa diɗe, a sa ngizlaka mizli gar a hay ɗike, a sa cinaka niˀic ngi mizli mulumam waˀa ngi muc ngi mucoyo. Ti hin nah, mizli ngir matura mikileŋ kileŋhey a sa jijikam kirkir.

¹⁶Buy ngi ciki mubulihey gar a sa pam sar a ruwuy tir janga taŋ ngi buyoyo, a sa cukoko godo taŋhay avra, a sa surɓoko zana taŋ midira ˀayaya. Zluwun a sa ga taŋ haɗa, dar a cifam joa ruwuy. a sa ndiram ar li zluwun, didak a sa muɗa taŋ haɗi asi ɓi ɗike.

¹⁷A sa njiɗukuw dimis ti tuwuy, a ɓam: ‹Walahay ngi mizli musoko tir mubuliy tuwa, a susuyum le wãˀ sukwa gawlay! Walahay nah, migidaŋ haɗa tuwa! Gidaŋ nga naŋ ati ngi mizli naŋhaya, naŋ ar mubuliy. Walahay nah a gi zluwun ɓaˀ li zleˀe takwa gawlay?›

¹⁸Maturahay a roko jijikam asi ka midiɗ na. Hirwuy ngi ciki mubuliyeye, didak ara muɗa taŋ, asi ka mususuyum na.

¹⁹«Naŋ kine, ya Bumbulvuŋ, Buymisemuŋ i ɓi na: Ti ya masa tiri tika diŋ, kaɓa walahay manja mizli anga, yo ti ya masa pulo yam mijileŋ ngir mubuliy fuyõh ng'ar ka, ɓa nduw na,

²⁰i sa pi ti ka sar jom ati mizli ngir vigiɗey, ng'avi mizli misi zleˀehey, dar i sa cufuw ar mijileŋ ngi ruwuy. Kum jom ati mizli ngir vigiɗ misi ka li zizi ngi set na, kisa cifam a diga, mizli anta sa cufam ar ka mata. Amma i sa vula dudok ɗu da hirwuy ngi mizli misi ti siifahay.

²¹I sa tiri ti ka gwat ngi muɗa didak da mizli, asi anta sa puraka hiri ɗike mata. Mizli a sa ram ti supukuw, amma anta sa lumukuw mata ndiɗaˀ. I ya Bumbuvuŋ, Buymisemuŋ maɓi.»