Read South Giziga EZK 27 Bible Online

EZK 27 - South Giziga bible

EZK 27

¹Bumbulvuŋ a ɓiy mi naŋ ani:

²Ka, mburu, cin, zli dimis ngi tuwa Tir.

³Ki sa ɓa walahay Tire: Aw, walahay Tir ɗu, ka mipi a mi mubuliy, ka migi terere ati sukwi ngi mizli, waɗ mizli micifa ngir maturahay haɗi na, ya Bumbulvuŋ, Buymisemuŋ i ɓi na: Haˀaw Tir, ki ɓi zleˀe na: ‹Ya kuy haɗi teˀe›.

⁴Maakway ɗike hã a wuzla mubuliy, mizli mindir ɗikeye, a ndirukuw le kuy teˀe.

⁵A wuɗam dum ngi widis migidaŋ mimezle ngi ruwuy Senir, a ɗiyukuw dumvu ɗike gar ti naŋ. A wuɗam dum ngi miter ngi ruwuy Libaŋ ngi luwa zana himiɗ mahizigiɗuw ar yama ti naŋ.

⁶A ɗiyaka dum ngi kukur ɗike ti dum ngi widis madiɗahay ngi ruwuy Basaŋ. Li cifi ɗike, a ɗiyaka ti dum widis migidaŋ mimezle ngir matura ngi ruwuy Grekey geˀ geˀ taŋ wuya ti sliŋ ngi begene.

⁷Zana himiɗ mahizigiɗuw ti naŋ, i ngi gabaga mislirkeɗ ngi ruwuy Ezipte, midira dar dar ti gugumay, a sinukuw kutum ava, zle kileŋ. Misirit a hirnga ɗike, i gabaga miwitwit, waɗ mindezze ngir matura Sipre.

⁸Ki lum mizli ngir ɗikeye, i mizli Sidoŋ ati Arvatay. Haˀaw Tir ɗu, misi sinmijileŋ ɗikeye, i mizli madiɗa ngi mizli ngir ɗikey.

⁹Micawwa ngi ruwuy Biblosoy ati mizli naŋhay misina gi gwataya, i taŋ miɗiyaka li cir ɗikey na. Palalam madiɗa ngir mubuliyey, ati mizli ngir taŋhay gar na, a soko asi hirwuy ɗike, ɓa a hiɗikam gwat ngi terere ɗikey.

¹⁰Mizli Persehey ati Ludoy waɗ Putoyo, taŋ a wuzla soje ɗikey, i mizli ngi vurumoy. A luwaka mbaray taŋhay ati jiiku ngi ɓiri taŋhaya asi hirwuy ɗike, a tiram ti ka puɗaw haɗa.

¹¹Mizli Arvatay ati soje ɗikeye, t'ada gun hirnga mohol ɗike, waɗ mizli sek ngi jigina hay madidiɗa ɗikeye. A luwaka mbaray taŋhaya law law avu mohol ɗike, a tiram ti ka le kuy teˀ wãˀ ma.

¹²«Mizli Tarsisey ati mizli ɗikeye, a gam terere ngi gwatay wal wal haɗa. Ar deɗe ngi zlili ɗik mihaɗa na, taŋ a sukuw ti ɓiri bara, ɓiri ho gar, ndifri waɗ plom.

¹³Mizli Grekey ati Tubalay waɗ Mesekeye, a soko gam terere a hay ɗike. Taŋ a sukuw ti bekehey ati gwat ngi ɓiri gazahay ar deɗe ngi gwat ngi terere ɗikeye.

¹⁴Mizli Togormahaya, a sukuw di ar luuma ɗike, i pilis ngi hufoy, pilis ngi vurumoy ati zungu-pilisey.

¹⁵Mizli Dedaŋhay, a soko gam terere ati mizli ngi hay ɗikey. Hirwuy maturahay mbeˀ mbeˀ ada soko gam terere a hay ɗike. A wurkukuw buutu ti sliŋ ngi begene waɗ ti dum ngi eben. [3].

¹⁶Edomoy ada soko gam terere a hay ɗike. A hiɗikam gwat mihaɗa, ka miɗiya taŋ na. Taŋ a sukuw ti ɗugur kalaf kalaf, gabaga gagaza, zana midira ˀayay dar dar, zana ngi gabaga mislirkeɗey, ɗugur mingiliw ngiliw waɗ ɗugur mupuɗaw gagaza ndez.

¹⁷Zudahay ati hirwuy Israyel kwana, ada soko gam terere a hay ɗike ya. A sukuw ti alkamari ngi ruwuy Minit, magaya, mam, mal waɗ mukuturɓuy mazĩˀĩ ndum haɗa.

¹⁸Mizli Damasay, a hiɗikam a hay ɗike, i gwat ka maɗiya taŋ haɗa na ati zlili ɗikey miwal walay gar. Taŋ a sukuw ti mbaazla ngi ruwuy Helboŋ waɗ ngwic ngi tumuŋ ngi ruwuy Sahar.

¹⁹Sukwi Daŋ ati sukwi Yavana, a soko zle ti walahay Uzal. A sukuw ti ɓiri muvuɗahay, dum ati lavaɗ mazãˀãm ndum haɗa.

²⁰Mizli Dedaŋhay a gam terere a hay ɗike, a sukuw ti sarde ngi pilisey.

²¹Hirwuy Arabi ati buy Kedaray cek cek na, a gam terere tisi ka. Taŋ a sukuw ti ziri tumuŋhoy, zlengerekey waɗ bazuwayay.

²²Migi terere ngi ruwuy Sabahay waɗ ngi Rakmahaya, a gam terere a hay ɗike. A sukuw ti urdi mimezlehey, sukwi ngi ɗugur mupuɗaw puɗaway ati ngi ɓiri tapasl tapaslay gar.

²³Walahay Haraŋ ati Kane waɗ Eden, yo migi terere ngi ruwuy Sabahay, ngi Asuroy waɗ ngi Kilmatay gar na, a soko gam terere a hay ɗiki.

²⁴Taŋ a hay ɗike, a sukuw ti zana ngi slimiɗey, godo miwitwitey, zana midira ˀayay le dar dar, gabaga mungboɗoɗohoy, zeweɗ misira ti sir ati muslupa ti slupoy.

²⁵Palalam madiɗa ngi ruwuy Tarsisey ara jijirukuw gwat ngi terere ɗikeye.» «Ki nih le mbaf ti zlili, yo ki tiri le dudok haɗa a wuzla mubuliye.

²⁶Mukukur ɗikeye, a kukurukuw ar yam mijileŋ, mbak burkataŋ ngi si pas ngi miprike, a wuhuw kpah a wuzla mubuliye.

²⁷Zlili ɗik, cikili ngi gwat ɗik ati gwat ngi terere ɗikeye, migi slra ɗik ngir yamay ati madiɗa taŋhaya, mizli maɗiyaka ndisl ɗikey, mizli magukuw cikili ngi gwat ngi terere ɗikey, mizli ngi vurum ɗikey gar, yo mizli mikirmiɗ kirmiɗ asi ruwuy ɗik na gar, tapas mubuliy masa nduw yik na, a sa ndilam nga wuzla mubuliye.

²⁸Mizli ngi ciki mubuliyey a sa jijikam kpar kpar, ti widi ngi madiɗa ngi migi slra ɗikey ngir mubuliy na.

²⁹Dar mizli misi palalamay a sa pam sar tir palalam taŋhaya. Migi slra ngir yamay ati madiɗa taŋhay ngir mubuliyey gar na, a sa pam sar cak cak nga ruwuy.

³⁰A sa tuwukuw irslik irslik, a sa wudam widi mukuyta wãˀ. A sa pam murɓuk a hirnga, a putukulom burfuk burfuk ar fucu.

³¹A sa hijaka hirnga asi ka, yo a sa kam zana ngi vagay. A sa tuwukuw tuwuy mukuyta wãˀ ti memebezleŋ ngi vu taŋ, a sa tuwam tuwuy ngi vagay.

³²Angi bonoy taŋ na, a sa zlam dimis ngi tuwuy ɗike, a sa zlukuw dimis ngi tuwuy ngi vagay, a zlaka ani: ‹Ka Tire, ko walahay mindil ɗik zleˀe anta, ani wurenna, ki zizi yik a wuzla mubuliy mbri maka gawlay?›

³³Ti ka maslin ti gwat ngi terere tir mubuliy na, ki mbi sukwi ngi mizli le haɗi teˀe. Zlili ɗik mihaɗa fineˀ gidaŋ ati gwat ngi terere ɗikey na, ki ga zlili le da buy ngi si ruwuyoyo ti naŋ.

³⁴Ani wurenna yam ngir mubuliy a wuhuw le, yam mijileŋ a nduw le yik ng'aseˀeŋ gwat ngi terere ɗikey ati mizli ngisi hirwuy ɗikeye gar, a ndilam le yimak yimak nga aseˀeŋ.

³⁵Mizli ngi ruwuy maturahay gar na, a roko likam asi ɓi ɗike. Ko buy taŋhay kwana, zluwun a ga taŋ le, zluwun a bigi le a mihiri taŋ.

³⁶Migi terere ngi wuzla sukwi ngi mizli ara curɓom, a ɓam: asi ki tiri le, ki gwat ngi gi zluwun da mizli, k'anta mata ngi wãˀ.»