Read South Giziga EZK 28 Bible Online

EZK 28 - South Giziga bible

EZK 28

¹Bumbulvuŋ a ɓiy mi naŋ ani:

²«Ka mburu, ɓa buy Tire na: Ya Bumbulvuŋ, Buymisemuŋ i ɓi na: Ki njur vu njor njor, joˀ ki ɓi: ‹Yi kuli. I cifi le ar janga ngi buy ngi kulihey a wuzla mubuliy!› Ki pura vu ɗike kaɓa ki Buymisemuŋ. Amma na, ka ki mbur titraŋ, ki kuli vuna ta ngbaŋ.

³Ki wa kaɓa ka ti sinmijileŋ fineˀ Daniyele, kaɓa ɓi miyaŋ, manja ki si na na anta.

⁴Ki lum zlili le haɗa ti sin ɗik mijileŋ waɗ ti lesl ɗik na. Ki lum di zlili ngi ɓiri tapasl tapasl ati ngi ɓiri bara.

⁵Ka misi ti sinmijileŋ, ka misina gi terere haɗa na, Ki ska zlili ɗike le haɗa. Dar ki huhum vu ti zlili ɗik tuwa.

⁶Vurˀe, ya Bumbulvuŋ, Buymisemuŋ i ɓi na: Ka mapura vu ɗike, kaɓa ki kuli tuwa na,

⁷y'ani i ɓa mizli mulakay, ɓa a soko a lumukuw. I mizli misi moˀorehey mifineˀ sukwi ngi mizli gar. Gwatay ka miga taŋ ti sin ɗik mijileŋ gar na, maslalam a sa zuma taŋ, yo dudok ɗik na, a sa tiram di gwat lambaˀa.

⁸A sa hizigukuw ng'ar vigiɗ miseleleŋ, kisa muc a wuzla mubuliye, muc ngi mbur misi ti bonoy haɗa.

⁹Ko a mihiri ngi mbur masa kuɗuw vagay vuna kwana, kisa ɓi: ‹Yi kuli›, aruŋ na si kwa? Ki pura vu ɗike kaɓa ki Buymisemuŋ. Amma na, ka ki mbur titra ngbaŋ. Mbur ɗu, kisa ndir a haŋ mbur masa kuɗuw vagay na si.

¹⁰Ki sa muc a haŋ mizli mulakaya, muc ngi mizli manja ci mizaway. Asi yi ɓa le. I ya Bumbulvuŋ, Buymisemuŋ maɓi.»

¹¹Bumbulvuŋ a ɓiy mi naŋ ani ava ma:

¹²«Ka mburu, zli dimis ngi tuwa buy Tir. Ki sa ɓaŋ: Bumbulvuŋ, Buymisemuŋ a ɓi na: Vur kuy cummo na, a kiɗ mi zleˀe ar ka. Ka ti sinmijileŋ zleˀe haɗa, kay, kuy ɗik a zli ta wãˀ.

¹³Ka zleˀe a Eden, ar jarne ngi Buymisemuŋ. Ɗiyeˀ ɗiyeˀ vu ti sukwi ngi ɗugur mupuɗaw puɗaway mazilaka t'ani: ɗugur mupuɗaw gagaza ndez, ɗugur mu puɗaw tapasl tapasl ati ɗugur mupuɗaw gingiliw gingiliw, ɗugur kalf kalaf, ɗugur mupuɗaw kakayak kakayak ati ɗugur kalaf kalaf gagaza zlop zlop, ɗugur mupuɗaw ngil ngil, ɗugur mupuɗaw gagaza los los ati ɗugur meɗelek meɗelek. Badak ɗikey ati slalam ɗikeye i miga taŋ ti ɓiri tapasl tapasl, zle ti hin taŋ mugukuw.

¹⁴Ki kerubeŋ mijigina li zleˀe, kirpasl binjar binjar. Yi cufuw le, ka zleˀe a muwã mipal nga ya Buymisemuŋ. Ki ru ti digi zleˀe a wuzla ɗugur misi vu njulililihey.

¹⁵Ka zleˀe kaslsla ar gwat ngi gi ɗike, zle ti hin mugukuw, hã avu hin, ɓi malambaˀ mubo ti hur ɗik na.

¹⁶Gi terere ɗik misik haɗa tuwa na, hã ki tiri misi moˀore le haɗa, joˀ ki gi mungra. Vurˀe, kisa cifi a wuzla mizli mamicamay vuna ya. kileŋ avu muwã mipal nga ya Buymisemuŋ. Ka kerubeŋ mijigina li, yi susuymuw avra ti wuzla ɗugur misi vu njulilihey tuwa.

¹⁷Kuy ɗik tuwa, a guw a mevele, hã ki njur vu zlokokoko, ki hirya sin ɗik mijileŋ le, ti kuy ɗik mihaɗa haɗa tuwa. I hiziguɗuw nga ruwuy, i puluw mbak da buyoy a purukuw.

¹⁸Malambaˀ ɗik mihaɗa, yo gi terere ɗik ti jiviɗ mijeŋŋe ta na, mbak ki hirya li huruk huruk ɗike ti naŋ. Vurˀe, i wuɗ i bul vu a hay ɗike, ɓa a zlizliruw. I tiri ti ka fucu, a mihiri ngi mizli mupur ɗikey gar.

¹⁹A wuzla mizli gar na, misin ɗikeye, a sa likam asi ɓi ɗike. Ki sa tiri gwat ngi muɗa didak da mizli. Anta sa puraka hiri ɗike mata ndiɗaˀ.›»

²⁰Bumbulvuŋ a ɓiy mi naŋ ani:

²¹«Ka mburu, mbiɗi hiri ng'ar Sidoŋ, njika ɓi ɗu ani a hirnga naŋ.

²²Ki sa ɓaŋ, Bumbulvuŋ, Buymisemuŋ a ɓuw na: Y'ani i ra lumuw akẽh Sidoŋ. I sa biga dudok ɗu avu ka. Ti ya masa guw kiita na, i sa biga da mizli ya pal. Dar mizli a sa sinaka yi Bumbulvuŋ.

²³I sa slino jiji mozorbono ng'ar ka, i sa ga ɓa pumbus a ɓul ar jiviɗ madiɗa ɗikeye. Taŋ masa ngumukuw ti maslalam ti ka ti ka gar na, mizli ɗikey a sa ndilam a ruwuy, mumucahay kuros kuros. Joˀ mizli a sa sinaka yi Bumbulvuŋ.»

²⁴Naŋ kine, mizli Israyeleye, gwat masa zliga taŋ ka hadaw malla masa nguroho taŋ kaɓa mengrete ngrete na, anta mata. Ko mizli mugun hirnga taŋ kwana, anta sa hirsakaŋ mata. Dar mizli a sa sinaka yi Bumbulvuŋ.

²⁵Ya Bumbulvuŋ, Buymisemuŋ i ɓi na: Ti ya masa cikilo hirnga ngi Israyeley mizliɗam hirnga le suweˀ nga wuzla sukwi ngi mizli na, i sa biga ya mipal na avu taŋ, daˀ a mihiri ngi sukwi ngi mizli mekelemeye. Israyeley a sa cifam angi hirwuy nga taŋ muduba, i hirwuy ya muvula zleˀe da gawla ɗu Zakop.

²⁶A sa cifam anga ti setette, a sa ndiram hayay, yo a sa huvam gudubun. A sa cifam setette. Mizli mugun hirnga taŋ mahirsaka taŋ na, ti ya misa ga taŋ kiita le na, a sa sinaka yi Bumbulvuŋ.»