Read South Giziga EZK 29 Bible Online

EZK 29 - South Giziga bible

EZK 29

¹A dirba ji mizli ng'ar beke, hin mukuruˀ nga cuw, kiya mukuruˀ, ngi vi mukuruˀ naŋ na, Bumbulvuŋ a ɓiy mi naŋ ani:

²«Ka mburu, mbiɗi hiri ng'ar buy madiɗa ngi Ezipte, ɓa ki njika ɓi ɗu ani ar naŋ waɗ ar Eziptehey gar.

³Slufaŋ di, ɓaŋ: Ya Bumbulvuŋ, Buymisemuŋ i ɓaŋ na: Buy madiɗa ngi Ezipte, y'ani i ra lumuw akẽh. Ka kaɓa hurum madiɗa mihin le tup a wuzla mihaŋ ngi mizaw Nil. Ki ɓi na, mizaw Nil i ngi ɗiki, i ka miga, yo i ka miga vu ɗik tehhe ti haŋ ɗiki.

⁴Yawwa, i sa sliluhu ti ɓiri muhurtok avu mi. Kilif ngi mizaw ɗik na, i sa slupãˀã taŋ gar slupãˀ slupãˀ avu dubaˀ ɗiki. I sa ɗuɗo ka ti hur mizaw ɗike ng'avra, jom cek ti kilif ngi mizaw ɗik, masa slupãˀãm slupãˀ slupãˀ avu dubaˀ ɗik tuwa.

⁵I sa ɗiɗuw ɗiɗeˀ ɗiɗeˀ fuk nga wuzlaɓuh mikirɗak kirɗak, jom ti kilif ngi mizaw ɗikeye. Ko ka misa diɗ le ar guva tekeɗe kwana, anta sa zuɓukuw ta, yo anta sa dikukuw ta ma. I sa vuluw da gwat misãmihey waɗ da ɗiyuwoy a zumukuw.

⁶Mizli ngi si ruwuy Eziptehey gar, a sa sinaka yi Bumbulvuŋ. Asi mike na, taŋ zleˀe kaɓa mejegeɗ ngi lavaɗ, ngi jaha Israyeley.

⁷Ti taŋ muzuɓukuw paɗ ngi huruk huruk ti ka na, ki ngil ɓuluˀ asi haŋ taŋ, ki ga taŋ waˀa ar pepesle. Yo ti taŋ mijaham jah ti ka na, ki ngil tasl, hã ngizlaŋ taŋ a muɗu.

⁸Vurˀe, ya Bumbulvuŋ, Buymisemuŋ i ɓi na: Y'ani i wuɗ i pulo sojehey ɓa a soko lumukuw akẽh ti maslalam, mizli ati ginew ɗikeye, i sa kiɗa taŋ cek.

⁹Hirwuy Ezipte a sa tiri daŋ daŋ, i diŋ. Dar mizli a sa sinaka yi Bumbulvuŋ. Vur ki ɓi le: Mizaw Nil i ngi ɗiki, i k a miga.

¹⁰Vurˀe, y'ani i ra so lumukum akẽh ati mizaw ɗikey na. I sa tiri diŋ ti ruwuy Ezipte. Diŋ, daŋ daŋ, zle avu walahay Mikdol tir vay muŋ, sesẽŋ a Asuwaŋ, yo ar maakway ngi ruwuy Etiyopi, tir vay ruwuy.

¹¹Mbur malla ko ginew masa ɗuf sar cirek ngi liˀi ti kẽh anta. A sa ndir hã vi kukur mufaɗ, manja a pam anga.

¹²I sa tiri ti ruwuy Ezipte daŋ daŋ muwãˀ naŋ ngi wuzla hirwuy midaŋ daŋhay. Yo walahay ngi raˀahaya, a sa ndiram daŋ daŋ muwãˀ naŋ ngi wuzla walahay diŋhey, hã vi kukur mufaɗa. I sa zliɗa hirnga ngi Ezipteheye nga wuzla sukwi mekelemey, i sa waha taŋ purla purla ng'asi ruwuy mekelemey wal wal.

¹³Ya Bumbulvuŋ, Buymisemuŋ i ɓi na: Angi kiɗa mi ngi vi kukur mufaɗ na, i sa cikilo hirnga ngi Ezipteheye ti wuzla sukwi, taŋ mizliɗam hirnga ng'ar taŋ na.

¹⁴Mizli mijahay zleˀe ti Ezipte na, i sa mo ti taŋ a muŋ, i sa ru ti taŋ nga ruwuy Ezipte ngi ruwuy, hirwuy miyaka taŋ anga. A sa ɗuvam zumabuy meciɗek a diga.

¹⁵Zuma buy taŋ a sa ndir i zumabuy mimeciɗek ngi wuzla zuma buyoy gar. N'anta sa slikiɗ dum hirnga ngi sukwi mekelemeye mata. I sa ma gidaŋ taŋ nga ruwuy, ɓa t'anta sa waka sukwi mekelemeye mata.

¹⁶Mizli Israyeley anta sa pulaka vu taŋ mbak vur taŋ na mata. Malambaˀ taŋ migaka, ti taŋ mimbiɗam hiri ngir tivi Eziptehey zleˀe na, t'anta sa maka hiri naŋ mata. Dar a sa sinaka yi Bumbulvuŋ.»

¹⁷A dirba ji mizli ng'ar beke, hin muɓulaˀ, ngi kiya mudumbuŋ, ngi vi mukuruˀ ngaˀ tarnaˀ naŋ na, Bumbulvuŋ a ɓiy mi naŋ ani:

¹⁸«Ka mburu, Nabukodonozor, buy madiɗa ngi Babiloŋ, a tika ˀay le haɗa da soje naŋhaya, ɓa ara lumaka hirwuy Tire. Mbak soje naŋhaya gar na, hirnga ndoho ndoho, yo jeˀereye pulot pulot. Slra naŋ miga nga luuma hirwuy Tir na, ko a lum di migir neˀ da naŋ ta, da soje naŋhay ta ma.

¹⁹Vurˀe, ya Bumbulvuŋ, Buymisemuŋ i ɓi na: Ani i wuɗ i vula Ezipte da Nabukodonozor, buy madiɗa ngi Babiloŋ. A sa hila zlili ngi raˀahaya gar, a sa tiɓa gwat ngi lum naŋ ngi vurum ngi si ruwuyo tiɓeˀ tiɓeˀ wãˀ. A sa vula Ezipte da soje naŋhay ar deɗe ngi migir taŋ.

²⁰I sa vulaŋ Ezipte ar deɗe ngi migir ngi slra naŋ miga na. Asi slra, naŋ ati mizli naŋhay migaka na, a gaka da ya. I ya Bumbulvuŋ, Buymisemuŋ maɓi.

²¹Angi hin nah na, i sa ska gidaŋ ngi Israyeleye. Yo ka vuna Ezekiyel, i sa ga ɓa ki ɓi zuy a wuzla taŋ muduba. Dar a sa sinaka yi Bumbulvuŋ.»