Read South Giziga EZK 32 Bible Online

EZK 32 - South Giziga bible

EZK 32

¹A dirba mijaka Eziptehey ng'ar beke, hin ɓulaˀ, ngi kiya mukuruˀ nga cuw, ngi vi mukuruˀ nga cuw naŋ na, Bumbulvuŋ a ɓiy mi naŋ ani:

²«Ka mburu, kuɗma tuwuy ti buy madiɗa ngi Ezipte, kisa ɓaŋ na: ‹Ka a wuzla sukwi ngi mizli zleˀe ka zinga ngi mobor, kaɓa hurum ar mubuliy, ki slikiɗ rongoˀ rongoˀ ar yam a mizawa, ki duɓo yama ti sar ɗikeye, yam mangi diɓel na, ki tira birˀis birˀis.

³Ya Bumbulvuŋ, Buymisemuŋ i ɓi na: Ti ya misa kuso mizli le timbiɗim na, i sa hiziga zuva ɗu ng'ar ka, a sa ɗuɗoko ka ng'avra ti zuva ɗu.

⁴I sa hizuguw fuk, i kuw picikak a ruwuy. Waɗ i sa zilo ɗiyuwoy gar ɓa a cifam kiriɓ kiriɓ ar ka, joˀ gwat misãmi ngi si ruwuyoy gar a sa mbam ti useˀ ɗike.

⁵I saka useˀ ɗike ɓaˀ ɓaˀ a muwãhay, yo i sa naha sozohoyo gar ti is ngi useˀ ɗike.

⁶I sa luɓo hirwuy ka misi anga na ti pumbus ɗiki, hã muwãhaya sirit sirit, zlazlaraya mbaf mbaf.

⁷Da siifa ɗik misa kiɗ mi le na, i sa ga muŋ timbiɗim, i sa sirta wurzlaŋhaya, i sa ɗumo pasa ti gazlavay, ko kiya anta sa pusluɗa li mata.

⁸Gwat mupusluɗa lihey misi a muŋ gar na, i sa muca taŋ asi ɓi ɗiki. Waɗ i sa go luvuŋ asi hirwuy ɗike. I ya Bumbulvuŋ, Buymisemuŋ maɓi.

⁹Ti ya masa ɓa ɓi ngi labara ngi ruwuy ka misina ta hana, da sukwi ngi mizli na, i sa ga ɓa mizli haɗi a jam mevel.

¹⁰Gwat ya masa guw di na, a sa zluwun mizli haɗi. Ti ya misa puka maslalam ɗu le pak a mihiri taŋ na, didak a sa muɗa buy taŋhaya haɗa asi ɓi ɗike. Tapas diɗ ɗik na, mbur gar a sa zluwun hirnga naŋ.

¹¹‹Asi ya Bumbulvuŋ, Buymisemuŋ i ɓi na: Maslalm ngi buy madiɗa ngi Babiloŋ a sa ngumuw gbaˀa.

¹²I sa ga ɓa soje mukuwahay a kiɗaka zigiduw ngi si hirwuy ɗike kuros kuros. Misi moˀore ngi wuzla sukwi ngi mizli gar na, a sa hiryaka gwat Ezipte mahuhum di vu na, yo zigiduw ngi hur naŋ gar na, a sa ngizlam.

¹³Ginew naŋhay gar misi a ciki yam madiɗahay na, i sa ngizla taŋ pay. Ko sar ngi mbur malla ngi ginew anta sa ci cuzlom ngi duɓo yama mata.

¹⁴Dar i sa pula yama, a ɗumbur muduba, yo i sa ga ɓa yam ngi mizaway a ɓulom sekke vu kaɓa mal. I ya Bumbulvuŋ, Buymisemuŋ maɓi.

¹⁵Da ya misa tiri ti ruwuy Ezipte le daŋ daŋ, ya misa ga le, a hilaka gwat ngi si ruwuyo slar slar, yo ya misa ngizla mizli ngi raˀahaya le pay pay na, dar a sa sinaka, yi Bumbulvuŋ.›

¹⁶Hana i tuwuy, a sa kuɗumakaŋ. Anja ngwas ngi sukwi ngi mizli a kuɗumaka tuwuy misenna. Anja a kuɗumaka da Ezipte waɗ da zigiduw ngi raˀa gar. I ya Bumbulvuŋ, Buymisemuŋ maɓi.»

¹⁷A dirba ji ng'ar beke, hin mukuruˀ nga zlum ngi vi mukuruˀ nga cuw naŋ na, Bumbulvuŋ a ɓiy mi naŋ ani:

¹⁸«Ka mburu, tuwa zigiduw ngi si ruwuy Ezipte na. Naŋ ati ngwas ngi sukwi ngi mizli migidaŋhaya, pi sar ti taŋ ng'ar vigiɗ mijileŋ, Bam ti ngwasay mukuy teˀ na kwana, a sa ndilam ng'ar mijileŋ ngi ruwuyo, jom ati mizli mumucahaya.

¹⁹Ki fini wa ti kuyo ka? Pam sar ng'ar vigiɗ ati mizli manja ci mizawaya.

²⁰A sa ndilam kpis a wuzla mizli mikiɗahay ti maslalama. Wurenna a muɗaka maslalama le, ɓa ngi kiɗa zigiduw ngi si ruwuy Ezipte gar.

²¹Buy bugawlahay ati mijini taŋhaya, a sa ɓakaŋ baɗ ti wuzla li cifi ngi mizli mumucahaya: ‹Mizli manja ci mizaway, mungumahay ti maslalama, a pam sar le ng'ar zivi, t'ani tup tup ati ndra.›

²²Buy Asiri ati soje naŋhaya, t'ani, yo zivi taŋhay ani gun hirnga naŋ. Taŋ gar i mizli mikiɗahay ti maslalam.

²³Zivi taŋhaya i muɗuvahay a hur li cifi ngi mizli mumucahay a ruwuy. Soje naŋhaya, t'ani gun hirnga buyo. Taŋ gar i mizli mikiɗahay ti maslalam. Mayaka zluwun asi ruwuy ngi mizli misi ti siifahay i taŋ.

²⁴Zigiduw ngi Elam ati soje ngi raˀahay gar na, t'ani ti zivi taŋhay gun hirnga zivi ngi buyo. Taŋ gar i mizli mikiɗahay ti maslalam. Taŋ manja ci mizaway mayaka zluwun asi ruwuy ngi mizli misi ti siifahay na, a cam le nga hur li a ruwuy. A pam mesem le, rak rak ati mizli mumucahay mapam sar nga ruwuyo.

²⁵A ɗuvaka zivi ngi buy Elama a wuzla mizli mikiɗahay ar vurum. Zivi ngi zigiduw ngi raˀa gun hirnga ngi buyo. Mizli manja ci mizaw tayna, a kiɗaka taŋ gar ar vurum. Asi a ya ka zluwun le ar hirwuy ngi mizli misi ti siifahaya. Yo a pam mesem le, rak rak ati mizli mumuca mekelemey, mikiɗahay ti maslalama.

²⁶Buy Mesek ati buy Tubala, t'ada gar a diga ati zigiduw ngi raˀahaya, waɗ zivi taŋhaya gun hirnga taŋ. Mizli manja ci mizaw tayna gar na, a kiɗaka taŋ ti maslalam, asi a ya ka zluwun le asi ruwuy ngi mizli misi ti siifahaya.

²⁷Mizli manja ci mizaw mikiɗahay na, taŋ a dikaka taŋ jom ati buy vurumoy zleˀe na ta. Buy vurumoyo, a pam sar nga taŋ ng'ar li cifi ngi mizli mumucahay, jom ati gwat ngi vurum taŋhaya, waɗ maslalam taŋhaya tah tah hirnga ti taŋ. Taŋ na, mungra taŋ a ndir ar tesl taŋhaya, asi a ya ka zluwun le da mizli misi ti siifahayakaɓa buy bugawlahay na ya.

²⁸Amma kumo kwana Eziptehey, a sa kiɗukum a wuzla mizli manja ci mizawaya. A sa dikukum ati mizli mikiɗahay ti maslalam na ya.

²⁹Ani mizli Edomoy ati buy waɗ yarama ngi raˀahaya, ko ti gambara taŋ na kwana, a gam ti taŋ kaɓa mizli mikiɗahay ti maslalam na ya. A dikaka taŋ jom ati manja ci mizaway, mizli mumucahay mapam sar nga ruwuy na.

³⁰Buy misi tir vay muŋhoy gar ati mizli Sidoŋhoy gar na, t'ani a diga, a cam le ng'avi mizli mikiɗahaya. Ko ti taŋ miyaka zluwun da mizli ti gambara taŋ na kwana, a pam mesem le. Mizli manja ci mizaw tayna, a dikaka taŋ le jom ati mizli mikiɗahay ti maslalama. A pam mesem le jom ati mizli mumucahay mapam sar nga ruwuyo.

³¹Soje tayna gar, da buy madiɗa ngi Ezipte misa pura taŋ le na, a sa tisla mevele asi ɓi ngi mizli naŋhay mihaɗa na. Asi mike na, naŋ buy madiɗa ngi Ezipte vuna ati soje naŋhay gar na, a sa kiɗaka taŋ ti maslalam ar vurum. I ya Bumbulvuŋ, Buymisemuŋ maɓi.

³²Haˀaw, i pula buy madiɗa ngi Ezipte le zleˀe mbak, a ga zluwun da hirwuy ngi mizli misi ti siifahaya ɓula. Amma wurenna, naŋ vuna ati soje naŋ mikiɗahay ti maslalam ar vurum gar na, a sa dikaka taŋ jom ati mizli manja ci mizaway. I ya Bumbulvuŋ, Buymisemuŋ maɓi.»