Read South Giziga EZK 33 Bible Online

EZK 33 - South Giziga bible

EZK 33

¹Bumbulvuŋ a ɓiy ani:

²«Ka mburu, ɓa mizli Israyeleye na: Kaɓa ani, da i ra so ti vurum ng'asi ruwuy na, mizli ngi si ruwuyo, a zuɓam mbur a wuzla taŋ, a cifakaŋ ngi jigina taŋ li.

³Mbur mijigina li tuwa naŋ mupura le, vurum ara so ng'asi ruwuyo na, a fi tulum ɓa mizli a wam vu.

⁴Amma mbur micin ˀay ngi tulumo le, da a wi vu ta, akẽh vurum a so lumaŋ le, a kiɗaka le na, pumbus naŋ a mbiɗi nga hirnga naŋ.

⁵Asi a cine ˀay ngi tulumo le, amma a wi vu ta. Pumbus naŋ a mbiɗi nga hirnga naŋ. Mbur miwi vu le na, a sa laha hirnga naŋ.

⁶Da mbur mijigina li mupura le, vurum ara sawa, a fa tulumo ta, yo mizli a wam vu ta na, da vurum a so le, a kiɗam mbur ngi si ruwuyo le vagay na, naɓa a kiɗaka mbur nah asi malambaˀ ngi mbur mijigina li, i sa cufuɗa pumbus naŋ avu mbur mijigina li.

⁷Ka so na, mburu, i cifi mijigina Israyeleye i kaha. Ki sa cine mi mabo ti balam ɗu, joˀ kisa ɓa da Israyeleye ɓa a wam vu.

⁸Da ya misa ɓa mbur migi mungra le: ‹Ka mbur migi mungra, kisa mucu cummo›, amma ki ɓa da mbur migi mungra ɓa a wi vu vur gwat ngi gi naŋ na ta na, mbur migi mungra tuwa a sa muc asi mungra naŋ na gisiŋ, amma i sa cufuɗa pumbus naŋ avu ka.

⁹Amma da ki ɓa mbur migi mungra le ɓa a mbiɗi, a pula gwat ngi gi naŋ na, amma da a ngum pula gwat ngi gi naŋ na ta na, a sa muc asi mungra naŋ na, amma ka so na, ki laha hirnga ɗike le.»

¹⁰«Naka so na, mburu, ɓa Israyeleye, asi taŋ a ɓam na:

¹¹‹Slikiɗa ɓi ndra ati malambaˀ ndraˀahaya, t'ani hirisl hirisl ar ndra, ndra mamicam na vurˀe, ɓa i sa ndiram ti siifa zleˀe mbri mbrike?› Ɓa taŋ na: Kaɓa ya misi ti siifa gisiŋ na. I wuɗ ɓa mbur misi moˀore a muc ta, amma ɓa a mbiɗa gwat ngi gi naŋ, ɓa a ndir ti siifa jaka. Mbuɗoko hiri, pulaka gi gwat malambaˀ kumoyo. Kum Israyeley, ki wuɗam ɓa sey ki micam cummo na vur mike? I ya Bumbulvuŋ, Buymisemuŋ maɓi.

¹²«Ka so na, mburu, ɓa mizli ɗikeye: ‹Mbur mijeŋŋe, tapas naŋ misa gi mungra madiɗa le na, jeŋŋe naŋ misi zleˀe na, anta sa cukoŋ tir kiita ta. Da mbur misi moˀore mupula gi gwat malambaˀ naŋ na le kwana, moˀore naŋ misi zleˀe na, anta sa hizigiɗaŋ ar mungra ta ya. Naŋ kine, mbur mijeŋŋe, tapas naŋ misa gi mungra le na, jeŋŋe naŋ misi zleˀe na, anta sa cukoŋ tir kiita ta ya.

¹³Da ya misa ɓa mbur mijeŋŋe le, ki ndir ti siifa, da a pula vu naŋ le mbak vur jeŋŋe naŋ na si, a gi gwat mijeŋ ta na, slra naŋ mezle, naŋ miga taŋ zleˀe gar na, ko anta sa wulkaka ɓi nah keŋ mata, a sa muc asi gwat mijeŋ ta, naŋ miga na.

¹⁴Da ya miɓa mbur migi mungra le: Ki sa muc. Na, da a pula gi mungra naŋ na le, ara sipi ɓimujuwa mitaˀ gar, ara gi gwat mijeŋŋe,

¹⁵gwat mbur mijika le ava zleˀe, ara mi di da buy naŋ a muŋ, gwat naŋ muhulo zleˀe, ara mi di da buy naŋ a muŋ, ɓi miɓa ɗaˀ le mavul siifa na, ara sipa, gwat mijeŋ ta, naŋ anta ga ta na, a sa ndir ti siifa gisiŋ, naŋ anta sa muc ta.

¹⁶Mungra naŋ miga zleˀe na, ko mbur masa wulka ɓi naŋ keŋ anta mata, a sa ndir ti siifa, asi ara sipa ɓimujuwa mitaˀ gara, yo ara gi gwat mijeŋŋe.

¹⁷Mizli ɗikey a ɓam na: ‹Gwat ngi gi nga ya Bumbulvuŋ i mezle ta.› Na gwat ngi gi mezle ta na, inga taŋ jak.

¹⁸Da mbur mijeŋŋe a pula gi gwat mijeŋŋe naŋ na le, a gi gwat mijeŋ ta na, a sa muc vurˀeŋ.

¹⁹Da mbur migi mungra a pula gi mungra naŋ na le, ara sipa ɓimujuwa mitaˀgara na, ara gi gwat mijeŋ na, a sa ndir ti siifa vurˀeŋ.

²⁰Na, kum Israyeleye, ki ɓam jak na: gwat ngi gi nga ya Bumbulvuŋ i mezle ta! Hey, kum Israyeley, i sa gukum kiita, mbur gar na, weˀe avu gwat ngi gi naŋ.›»

²¹A dirba mijam ndra nga ruwuy mulak, hin zlum ngi kiya mukuruˀ naŋ, ngi vi mukuruˀ nga cuw naŋ na, mbur pal milih a wuzla mizli mijaka taŋ tuwa, a so ti Zeruzaleme, a ɓiy: «Walahay Zeruzaleme i muzuma le.»

²²Ngi pastaˀ naŋ, ti mbur milaha tuwa mindilo t'aruŋ na, naɓa haŋ ngi Bumbulvuŋ naŋ da taˀ angi ya si. Ti mbur tuwa muso ng'avi ya ngi miprik na, yi ɓi ɓi gu muduba, y'anta ngbimme mata.

²³Akẽh na, Bumbulvuŋ a ɓiy mi naŋ ani:

²⁴«Ka mburu, mizli mindiram ar diŋ ngi si ruwuy Israyeleye, a ɓam: ‹Abraham mipal naŋ zleˀe tekeɗe, a tiɓa hirwuyo le da naŋ. Sokkota ndra mihaɗa na jak kwa, hirwuy i muvula le ɓa a ndir da ndra.›

²⁵Vurˀe, ɓa taŋ: Ya Bumbulvuŋ, Buymisemuŋ i ɓa taŋ na: ki zumaka useˀe ti pumbuso kine, ki huruk hurukam a mbuŋ kuli kumoy, ki ra kiɗam hirnga ma na, ki wuɗam ɓa hirwuy a ndir da kum mbri mbrike?

²⁶Ki pulaka vu kumo mbak mbak vur maslalam kumoy. Kum ngwasaya, ki gam gwat mukuyta wãˀ, kum zileye, mbur gar a hin ti ngwas ngi cil naŋ ma na, ki wuɗam ɓa hirwuy a ndir da kum mbri mbrike?

²⁷Ki sa ɓa taŋ na, ya Bumbulvuŋ, Buymisemuŋ i ɓa taŋ na: ‹Kaɓa ya misi ti siifa gisiŋ na! Mizli mindiram ngir diŋhey na, a sa kiɗaka taŋ kuros kuros ti maslalam. Mbur misi a ɓuh na, i sa vulaŋ da gwat misãmihey a zumakaŋ, yo mizli misi a muwãhay ati misi angi butumoy na, i jiji mozorbono masa ngizla taŋ.

²⁸Hirwuy a sa ndir cay, daŋ daŋ, gidaŋ naŋ mahuhum di vu na, a sa kiɗ mi, muwã Israyeley a sa ndiram daŋ daŋ, ko mbur masa cuh tir taŋ anta.

²⁹Ti ya misa tiri ti ruwuyo le cay, daŋ daŋ, asi gwat mukuyta wãˀ taŋ migaka na, Israeley a sa sinaka, yi Bumbulvuŋ so.

³⁰«Ka mburu, cin ɗi, mizli ɗikey ara kiɗam ti ka slir a ciki moholoy, a miviŋ taŋhay, a ɓam ar wala t'ani: ‹Akum, i ra cinaka mingiɓi mabo ti vu Bumbulvuŋ na so!›

³¹Mizli ɗuwoyo, a sa joko kaw kaw ng'avi ka, a cifam joa mbuŋ ɗike. A sa cinaka mingiɓi ɗik na, amma t'anta sa gam di slra ta, asi a ɓam mi mideɗek ɓula, dambalaka a mevel taŋ a sipam di i jiviɗ ngi lum.

³²Ka ani avu taŋ kaɓa dimis mawuɗam haɗa ngi zli, misi ˀay mezle, hurum ngi gwat ngi kiɗ aseˀe i mezle. A ra cinaka mingiɓi ɗike, amma ko mbur pal magi di slra anta.

³³Gwat ka miɓa tayna, da taŋ misa ndiloko le na, na zle ara ndiloko vuna si, dar a sa sinaka, dambalaka mijiviɗ ada zleˀe a wuzla taŋ.»