Read South Giziga EZK 34 Bible Online

EZK 34 - South Giziga bible

EZK 34

¹Bumbulvuŋ a ɓiy mi naŋ ani:

²«Ka mburu, ɓa ɓi ani vur mijigina Israyeley, njika taŋ di. Njika da mijigina Israyeleye, ɓa taŋ na: Ya Bumbulvuŋ, Buymisemuŋ i ɓi na: Bonoy a hirnga mijigina Israyeley, majiginam hirnga taŋ tehhe a muŋ na. Mijigineye, sey a jiginaka tumuŋhoyo takwa?

³Ki sam ɗuwa, ki kam zana mija ti ngwic ngi tumuŋhoy, ki kiɗam ngi gi mikuli i ginew muzlumbrahay ɓula, amma tumuŋhoyo so na, ki jiginaka taŋ ta.

⁴Ginew muvusohoy na, ki vulaka taŋ gwat ngi zum ɓa a slikiɗam ta, misi jiji, ki vulakaŋ slalak ta, mingila sara le, ki kufakaŋ di ta, maru digi lambaˀa, ki moko di ta, miziza le, ki supoko ta, amma ki waka taŋ ti gidaŋ, ki gaka taŋ moˀore, waɗ ki guzuvuraka taŋ jaka.

⁵Ginewey mizliɗam hirnga bilyaˀ lambaˀ na, asi mijigin anta. A zliɗam hirnga le, a tiram le i gwat ngi zum ngi gwat misãmi ngi ɓuhoy gar.

⁶Ginew ɗuwoyo, a ram ti liˀi kiŋkiŋ lambaˀ a muwãhay gar, ar li miɗingir ɗingirey gar. Tumuŋ ɗuwoy a zliɗam hirnga le asi ruwuy gar, ko mbur maki slimiɗ ar taŋ malla maru ti supo taŋ anta.

⁷Vurˀe, kum mijiginey, cinaka mingiɓi nga ya Bumbulvuŋ.

⁸Kaɓa ya misi ti siifa gisiŋ na! mijigin misi anta tuwa na, mizli a vaka tumuŋ ɗuwoyo lambaˀ, gwat misãmi ngi ɓuhoy gar a jaka taŋ lambaˀ. Mijigin ɗuwoy anta kam slimiɗ neˀ le ar tumuŋ ɗuwoyo ta, mijigin ɗuwoy a jiginam di i hirnga taŋ tehhe a muŋ, ko t'anta jiginaka tumuŋ ɗuwoyo jigan le ta. I ya Bumbulvuŋ, Buymisemuŋ maɓi.

⁹Vurˀe, kum mijiginey, cinaka mingiɓi nga ya Bumbulvuŋ.

¹⁰Ya Bumbulvuŋ, Buymisemuŋ i ɓi na: Y'ani i ra luuma mijiginay vuna akẽh. I sa cufuɗa ɓi ngi ginew ɗuwoy avu taŋ. Y'anta sa pula taŋ a jiginikiy tumuŋ ɗuwoyo mata. A sa tiram i mijiginay mata. Tˀanta sa jiginaka hirnga taŋ tehhe a muŋ mata. I sa tuɓo tumuŋ ɗuwoy avu mi taŋ, ɓa t'anta sa humbuɗaka taŋ mata.

¹¹Asi ya Bumbulvuŋ, Buymisemuŋ i ɓi na: Ya vuna ti haŋ ɗu, i sa ki slimiɗ ar ginew ɗuwoyo, ɓa i sa pura taŋ bileŋ bileŋ.

¹²Ginewey mizliɗam hirnga le, mijigin masupo taŋ na, ya kwana, i sa sipa ɗuwoyo ginew kanah ya. I sa mo taŋ tir li taŋ mizliɗam hirnga ng'ara, ti hin ngi kutup misirta li le timbiɗim malla ti hin ngi vuŋ ti burkataŋ aseˀeŋ.

¹³I sa bo taŋ ti wuzla mizli, i sa cikilo hirnga taŋ ti ngi hirwuy wal wala, i sa mo taŋ ng'asi ruwuy taŋ. I sa jigina taŋ a muwã Israyeley, a mi zlazlaray waɗ angi li misi mizli ara ara gar.

¹⁴I sa jigina taŋ ar li mezleŋ. A sa zumam giziŋ taŋ a muwã ngi li miɗingir ngi si ruwuy Israyeley. A sa musukam vu a diga ar li jigin mezle, yo i sa jigina taŋ a muwã Israyeley, ar li zum mezle ngi ginewey.

¹⁵I ya ti haŋ ɗu masa jigina ginew ɗuwoyo, yo i ya ti haŋ ɗu masa ru taŋ ar li musuko vu. I ya Bumbulvuŋ, Buymisemuŋ maɓi.

¹⁶I sa ra supo tumuŋ miziza le, maru ti liˀi kiŋkiŋ lamabaˀa, i sa mo di, mingila sara le, i sa mbizaŋ di, misi jiji, i sa vulaŋ gwat ngi zum, ɓa a slikiɗi. Amma ginew muzlumburahay ati migidaŋ gidaŋhaya, i sa ngizla taŋ. Joˀ i sa jigina tumuŋ ɗuwoyo jeŋŋe ti jiviɗ naŋ.»

¹⁷«Na kum ginew ɗuwoy vuna kwana, ya Bumbulvuŋ, Buymisemuŋ i ɓi na: I sa sla kiita ar wala kumo, tumuŋ ati tumuŋ, yo ar wala ngi zlengrekey ati bazuwayay.

¹⁸Kum mazumam ar li mezle na, a kuɗukum may ta, hã ki kirpaka is ngi giziŋ ngir li zum kum na asi sar ma kwa? Kum masam yam miɗelele na, a kuɗukum may ta, hã ki duɓoko is ngi yama ti sar ma kwa?

¹⁹Naŋ kine, sey ginew ɗuwoy a zumaka gwat kum mukurpaka asi sar na, yo a saka yam kum muduɓoko na.

²⁰Vurˀe, ya Bumbulvuŋ, Buymisemuŋ i ɓukum na: Ya ti haŋ ɗu, i sa sla kiita ar wala ngi tumuŋ muzlumbura ati mizaha.

²¹Ginew muvusohoyo, ki mbizlaka taŋ ti sar waɗ ki dumbuslaka ti didak, yo ki kiɗaka taŋ ti durum tuwa, hã ki zliɗaka hirnga taŋ mber mber.

²²I sa kilo widi ngi ginew ɗuwoyo, ɓa anta sa vaka taŋ lambaˀ mata, yo i sa sla kiita ar wala ngi tumuŋ ati tumuŋ.

²³I sa ki mijigin purla masa ru taŋ nga zumo: i gawla ɗu Daviti. Naŋ, a sa ru taŋ nga zum, a sa tiri mijigin taŋ.

²⁴Ya Bumbulvuŋ, i sa tiri Buymisemuŋ taŋ, yo gawla ɗu Davite, a sa tiri yarama a wuzla taŋ. Ya Bumbulvuŋ i ɓa le.

²⁵I sa ga ɓa i slamˀay kiri ati ginew ɗuwoyo. I sa ziza gwat misãmi miji vu ngi ɓuhoyo gar tisi ruwuyo. Ginew ɗuwoy a sa cifam setette a wuzlaɓuh mikirɗak kirɗaka, a sa hinam a wuzla dum mingiriɗ.

²⁶I sa ɗuwula taŋ mi, ɓa a cifam asi ruwuy hana waɗ ar li mugun hirnga li miɗingir nga ya na. I sa go vuŋ ar hin naŋ, a sa tiri vuŋ ngi ɗuwula mi.

²⁷Widis ngi ɓuh a sa yi, yo hirwuy a sa gi gwat. Mizli ɗuwoy a sa ndiram setette ar li taŋhaya. Ti ya misa ngila galalaŋ ngi si ˀay taŋ na le avra, yo ya misa laha taŋ le tisi haŋ ngi mizli mitiram taŋ beke na, a sa sinaka, yi Bumbulvuŋ.

²⁸Sukwi ngi mizli anta sa vaka taŋ gwataya mata, gwat misãmi ngi si ruwuyoy anta sa humbuɗaka taŋ mata. A sa ndiram setette, ko mbur masa ga taŋ ngaˀa anta mata.

²⁹I sa vula taŋ guva mazil slimiɗ haɗa, t'anta sa sam bonoy ti may asi ruwuyo mata, yo sukwi ngi mizli anta sa paka taŋ mesem mata.

³⁰Dar taŋ Israyeley a sa sinaka, yi Bumbulvuŋ, Buymisemuŋ taŋ, y'ada ati taŋ, yo taŋ Israyeleye i mizli ɗuwoy. I ya Bumbulvuŋ Buymisemuŋ maɓi.

³¹Kum mizli titirahay, kum i tumuŋ ɗuwoy mitaˀ gezleŋ, tumuŋ ngir li zum mezle. Ya kwana, yi Buymisemuŋ kum. I ya Bumbulvuŋ Buymisemuŋ maɓi.»