Read South Giziga EZK 35 Bible Online

EZK 35 - South Giziga bible

EZK 35

¹Bumbulvuŋ a ɓiy mi naŋ ani:

²«Ka mburu, ɗuva hiri kini ng'ar muwã Edom, njika ɓi ɗu ani a hirnga mizli ngi digahaya.

³Ki sa ɓa taŋ na, ya Bumbulvuŋ, Buymisemuŋ i ɓi na: Kum mizli ngi muwã Edomoy, y'ani i ra lumukum akẽh. I sa biga gidaŋ ɗu ar kum, i sa tiri ti kum ɓuh midaŋ daŋ.

⁴Walahay ɗikeye, i sa tiri taŋ diŋhey. Ka Edom vuna, kisa tiri wuzlaɓuh kirɗak kirɗaka. Dar kisa sina, yi Bumbulvuŋ.

⁵Ki gi mesene ti Israyeleye mbak le ta. Ar hin ngi bonoy taŋ, ti di mungra taŋ mindilakaslsla ɓa a gaka taŋ kiita muduba na, ki kiɗa taŋ ti maslalam.

⁶Vurˀe so na, kaɓa ya misi ti siifa gisiŋ na! I sa kiɗuw vagay, kiɗa hirnga a sa supuw. Ka muwuluk neˀ le ar kiɗa hirnga ta na, vurˀe, kiɗa hirnga a sa supuw. I ya Bumbulvuŋ, Buymisemuŋ maɓi:

⁷Hirwuy muwã Edomo, i sa tiri di ɓuh kirɗak kirɗak, daŋ daŋ. Mizli macohom ti raˀa gar na, i sa ngizla taŋ.

⁸I sa sirta muwãhaya sirit sirit ti vagay ngi mizli naŋhay mikiɗahay. Mizli masa kiɗaka taŋ ti maslalam na, vagay taŋhay a sa ndilam saɓalak nga muwãhay, ar sozohoy waɗ ng'ar zlazlar ɗikeye.

⁹I sa tiri ti ka wuzlaɓuh mikirɗak kirɗak, hã ngi sete, yo mizli anta sa cifam ar walahay ɗikeye mata. Dar kisa sina, yi Bumbulvuŋ.

¹⁰Asi ki ɓi na: ‹Sukwi mucuw ati hirwuy mucuwoy na, a sa ndiram da ka, kisa tiɓa taŋ›, dambalaka ya Bumbulvuŋ, y'ada akẽh vuna.

¹¹Vurˀe so na, kaɓa ya misi ti siifa gisiŋ na! mevel ati suloŋ ɗik, ka migi di mesene avu taŋ na, i sa gi ti ka weˀe ava ya. I sa biga vu ɗu avu taŋ ti jiviɗ ya masa guw kiita na. I ya Bumbulvuŋ, Buymisemuŋ maɓi.

¹²Dar kisa sina, yi Bumbulvuŋ. Ka miza muwã Israyeley na, yi cine le gar, ki ɓi: ‹A tiram wuzlaɓuhoy le kirɗak kirɗak! A vulaka ndra taŋ le ngi li zum ngi ginew ndrahay!›

¹³Ki ɓiy mi mididal hirnga ɗu, ki ɓiy mi ngi huhumo vu. I cine le kuy kuy!

¹⁴Ya Bumbulvuŋ, Buymisemuŋ i ɓi na: Da hirwuy gar ara mumul na, i sa tiri ti ka wuzlaɓuh mikirɗak kirɗaka.

¹⁵Ti ka mupura hirwuy Israyel ngi mizli ɗuwoy, mitiri diŋ na, ki mumul le vurˀe, na i sa tiri ti ka diŋ kanah ya. Muwã Edom a sa tiri wuzlaɓuh mikirɗak kirɗak, hirwuy Edom keɗeɗe. Dar mizli a sa sinaka, yi Bumbulvuŋ.»