Read South Giziga EZK 36 Bible Online

EZK 36 - South Giziga bible

EZK 36

¹«Ka mburu, cin, njika mingiɓi ɗu ani ar muwã Israyeley, kisa ɓa taŋ na: Muwã Israyeley, cinaka mingiɓi ngi Bumbulvuŋ ani.

²Bumbulvuŋ, Buymisemuŋ a ɓi na: Mesene kum a ɓi vur kumo na: ‹Yawwa! Muwã Israyel misi zlezle ngi set hanayna, a tiram ngi ndrahay le so!›

³Yawwa, njika ɓi ɗu, kisa ɓi: Ya Bumbulvuŋ, Buymisemuŋ i ɓi na: Naŋ kanah, a zumaka hirwuy kumo le ti ka ti ka, a gam suloŋ le ti kum, ki cam le asi haŋ ngi sukwi mekelemey gar. A zukum le, yo a singiram le ar kum a wuzla mizli gar.

⁴Vurˀe, kum muwã Israyeley, cinaka mingiɓi ngi Bumbulvuŋ, Buymisemuŋ: Ya Bumbulvuŋ, Buymisemuŋ i ra ɓi ɓi da muwãhay, li miɗingir ɗingirey, zlazlaray, sozohoy, diŋ mikirɗak kirɗakay, walahay mupulahay le mbak, sukwi mekelemey mugun hirnga taŋ mihilaka gwat ngir taŋhaya le, yo a singiram le ar taŋ.

⁵Ya Bumbulvuŋ, Buymisemuŋ i ɓi na: Hadam, ya maɓi ti mevel vik vik ka vu ar sukwi mekelemey gar waɗ ar Edom keɗeɗe na, vur a tiɓaka hirwuy ɗu le da taŋ. Asi taŋ mitiɓaka gwat ngir li zum ti ginew ngi si ruwuy ɗu na, a mumulom le haɗa vurˀe, yo taŋ ti hiris hã ar membezleŋ ngi vu taŋ.

⁶Vurˀe, njika mingiɓi ɗu ar hirwuy Israyele. Muwãhay, li miɗingir ɗingirey, zlazlaray waɗ sozohoyo, ɓa taŋ na: Ya Bumbulvuŋ, Buymisemuŋ i ɓi na: Y'ani! I ra ɓi ti himaˀ, mevel vik vik ka vu, asi sukwi mekelemey mupukum mesem na.

⁷Vurˀe, Ya Bumbulvuŋ, Buymisemuŋ i ɓi na: Hadam ti haŋ paɗ a muŋ: Sukwi mekelemey mugun hirnga kum vuna a sa pam mesem aya.

⁸Ti pas nah, ar muwã Israyeleye, widisey a sa ɗuɗoko mihaŋ taŋhay, yo a sa yam da kum Israyel mizli ɗuwoyo, asi kisa ra moko gweˀ ng'ar hirwuy muyukum ara.

⁹Haˀaw, i ra ru ng'avu kum, i ra mbiɗi hiri ng'avu kum. I sa ga ɓa a huvam asi ruwuy kumo, yo a sa zligam gwat ara.

¹⁰Mizli, Israyeley taˀ gar, a jam haɗi asi ruwuy kumo. Walahayay a sa pam, a sa ndiram hayay ar diŋhey a muŋ.

¹¹I sa ga ɓa mizli ati ginewey a jam haɗa. A sa sikam, a sa yam. I sa ga ɓa ki paka li kaɓa misi zleˀe. I sa vulukum zlili kaɓa ar zli virzi naŋ zleˀe. Dar kisa sinaka, yi Bumbulvuŋ.

¹²I sa ga ɓa Israyel mizli ɗuwoy a laˀam ar ka, joˀ kisa ndir da taŋ. Ki sa ndir ki gwat taŋ, yo k'anta sa pulaŋ ɗoɗok manja zuŋ mata.

¹³Ya Bumbulvuŋ, Buymisemuŋ i ɓi na: Mizli ar wala kum maɓam: ‹Ki hirwuy mazum mizli, ki pula sukwi ɗike le ɗoɗok manja zuŋ› na,

¹⁴yawwa, k'anta sa zum mizli mata, k'anta sa ga ɓa mizli ɗikey a ndilam ar mungra mata. I ya Bumbulvuŋ Buymisemuŋ maɓi.

¹⁵Sukwi mekelemey mupukuw mesem na, y'anta sa puluw ɓa ki cine ɓi nah mata, yo y'anta sa puluw ɓa mizli a zukuw mata. K'anta sa ga ɓa mizli ɗikey a ndilam ar mungra mata. I ya Bumbulvuŋ, Buymisemuŋ maɓi.»

¹⁶Bumbulvuŋ a ɓiy mi naŋ ani:

¹⁷«Ka mburu, cin, Israyeley micifam angi hirwuy taŋ na, a hiryaka le ti gwat ngi gi taŋ ati slra taŋ. Gwat ngi gi ngi Israyeleye naŋ a mbuŋ ɗu kaɓa dili ngi ngwasa.

¹⁸Ya muvunaha mevel ɗu ng'ar taŋ na, asi taŋ mikiɗam hirnga asi ruwuyo haɗa, yo asi taŋ mihiryaka hirwuy ti kulihey na.

¹⁹I zliɗa hirnga taŋ le mber mber nga wuzla sukwi mekelemey, a waham le purla purla fuk si ruwuy gar. I ga taŋ kiita le weˀe avu gwat ngi gi taŋ ati slra taŋ.

²⁰Mizli ɗuwoy miram a wuzla sukwi mekelemey tuwa na, a hiryaka slimiɗ ɗu mipala le a diga. Asi mike na, mizli a ɓam a diga vur taŋ: ‹I mizli ngi Bumbulvuŋhay ngbaŋ, amma taŋ asi ruwuy nga naŋ ta.›

²¹Dar ya i ki slimiɗ ar slimiɗ ɗu mipala , asi a wuzla sukwi Israyeley miram le a diga gar na, a hiryaka le.

²²Vurˀe, ɓa Israyeleye: Ya Bumbulvuŋ, Buymisemuŋ i ɓi na: Kum Israyeley, ya magi na vur kum ta, amma i gi vur slimiɗ ɗu mipal , kum mihiryaka a wuzla sukwi mekelemey, kum miram a wuzla taŋ na.

²³Slimiɗ ɗu madiɗa mipal na, ki hiryaka le a wuzla sukwi mekelemeye. Ti nah gar kwana, yi sa biga taŋ di, yi Buymisemuŋ gisiŋ. I sa biga taŋ di tisi kum. Dar a sa sinaka, yi Bumbulvuŋ. I ya Bumbulvuŋ Buymisemuŋ maɓi.

²⁴Naŋ kine, i sa bo ti kum ti wuzla sukwi ngi si ruwuy kum misi anga gar na, i sa kuso hirnga kumo, dar i sa mi ti kum nga hirwuy kum a muŋ.

²⁵I sa kicukum yam miɗelelle, ɓa kisa ndiram manja dili. Dili kumoy ati ɓi ngi huruk huruk kum a mbuŋ kuli kumoy na, i sa zuɓukum taŋ avra.

²⁶I sa vulukum mevel nawayaŋ, yo i sa cukum ˀUf nawaya a hur kumo. Mevel misi ka ɗugur ngi hur kum na, i sa zuɓa avra, dar i sa vulukum mevel mukuɗ kuɗu.

²⁷I sa ci ˀUf nga ya a hur kumo, i sa ga ɓa ki sipaka jiviɗe kaɓa ɓimujuwa ɗu mawuɗo, yo sirik ɗuwoyo, ɓa ki jaka taŋ a hirnga, ki gam taŋ slra.

²⁸Hirwuy, ya muvula da dideˀ kumoy na, kisa cifam anga. Ki sa ndiram kum i mizli ɗuwoy, ya i sa ndir yi Buymisemuŋ kum.

²⁹I sa luhukum avu gwat ngi dili kumoy na. I sa pula jiviɗ ɓa alkamari a gi, a sa gi haɗi teˀe. Y'anta sa slino may ɓa a gi avu kumo mata.

³⁰I sa ga ɓa widisey a yam haɗa, guva a gi gwat haɗa, ɓa kum anta sa pam mesem ti may a wuzla sukwi mekelemeye mata.

³¹Sipi jiviɗ malambaˀ kum ati slra kum mezlehey ta zleˀe tuwa gar na, kisa wulkaka taŋ keŋ. Mungra ati gwat malambaˀ mukuyta wãˀ, kum migaka taŋ na, a sa gukum mesem.

³²Ya magi gar na vur kum ta, sey ki sinaka sin le, Israyeley, gwat ngi gi kum na, anja ki pam di mesem, a gukum gigisl. I ya Bumbulvuŋ Buymisemuŋ maɓi.

³³Ya Bumbulvuŋ, Buymisemuŋ, i ɓi na: Tapas ya misa zuɓa mungra kumoyo le avra gar na, i sa ga ɓa walahay a pi haɗa, yo a sa ndiram hayay ar diŋhey a muŋ.

³⁴Hirwuy midaŋ daŋ tuwa a sa huvakaŋ, mizli masa cohom gar na, anta sa puraka i wuzlaɓuh mikirɗak kirɗak mata.

³⁵Joˀ mizli vuna a sa ɓam: ‹Hirwuy midaŋ daŋ zleˀe tuwa, a tiri le kaɓa guva a Eden, yo walahayay mitiram diŋhey, daŋ daŋ, muwahahay le tuwa, i mugunohoy le ti mohol, yo mizli a pam le ar taŋ.›

³⁶Dar mizli masa ndiram gun gun hirnga kum na, a sa sinaka, walahay muwaha zleˀe na, mandira hiri naŋ a muŋ i ya Bumbulvuŋ, yo guvahay mikirɗak kirɗak zleˀe na, mahirva hiri ngi gwat a muŋ ar taŋ i ya. Ya Bumbulvuŋ, i ɓi ani, i ga ani.

³⁷Ya Bumbulvuŋ, Buymisemuŋ i ɓi na: gwat ya masa gi ani ma: I sa pula jiviɗe ɓa Israyeley a lumikiy, ɓa i sa jiniˀis asi taŋ. I sa ska taŋ kaɓa ginew taˀ gezleŋ.

³⁸Naŋ kine, walahay a sa nih ti mizli heɓe heɓe kaɓa ginew mitaˀ gezleŋ, rak rak kaɓa ginew ar hay nga ya Bumbulvuŋ, ginew maram taŋ nga Zeruzalem tapas muguzlum. Dar mizli a sa sinaka muduba, yi Bumbulvuŋ.»