Read South Giziga EZK 37 Bible Online

EZK 37 - South Giziga bible

EZK 37

¹Gidaŋ ngi Bumbulvuŋ naŋ da angi ya, ˀUf naŋ a zuɓiy fangal, ara kiy ɓaˀ ar sozo. Sozo nah vuna tesl salawaɗ hũyõf.

²A liˀi ti ya ar wala ngi tesleye gun gun zlar. Taŋ hũyõf haɗa ar sozo. I tesl salawaɗ mikpazlaŋ kpazlaŋhay.

³A ɓiy na: «Ka mburu, tesl hanayna a slikiɗam ti siifa gu aruŋ kwa?» I mbiɗaŋ di: «Bumbulvuŋ, Buymisemuŋ, misina i ka!»

⁴A mbiɗiy di: «Njika mingiɓi ɗu ya maɓa a hirnga tesl hanayna, ɓa taŋ na: Tesl salawaɗ mikpazlaŋ kpazlaŋhay, cinaka mingiɓi ngi Bumbulvuŋ ani.

⁵Bumbulvuŋ, Buymisemuŋ a ɓukum, kum tesl hanayna na: I wuɗ i pulo musuwun ng'ar kum, ɓa ki ndiram ti siifa.

⁶I sa juɓukum dimbasl avu kum, i sirtukum useˀ, i sirtukum kuturkuy, i cukum musuwun, ɓa kisa ndiram ti siifa. Dar kisa sinaka muduba, yi Bumbulvuŋ.»

⁷Akẽh na, yi njika mingiɓi tuwa kaɓa muvulikiy jiviɗ naŋ. Ti ya mira njika aruŋ sina, i cin hurum ngi gwat, i pur gwatay mawusam: Tesley tuwa a cikilam hirnga arleˀe.

⁸I pura na, dimbasl ara juɓo taŋ, useˀ ara giɗawa, yo kuturkuy ara sirta taŋ, amma musuwun anta ɓula.

⁹A ɓiy na: «Njika mingiɓi ɗu a hirnga musuwun, ka mburu, njika mingiɓi ɗu, ɓa musuwuno na, Bumbulvuŋ, Buymisemuŋ a ɓuw na: ‹Musuwun, so tisi diˀis wal wal, ci ng'ar dumvu hanayna, ɓa a lumam siifa.»

¹⁰I ra njika mingiɓi kaɓa muvulikiy jiviɗ naŋ tuwa, musuwun a ci angi taŋ, joˀ taŋ ti siifa, a slikiɗam dedeŋ. I vurum madiɗa taˀa.

¹¹A ɓiy na: «Ka mburu, tes salawaɗ hanayna i Israyeley. A ɓam na: ‹Tesl ndra i tesl salawaɗ mikpazlaŋ kpazlaŋhay, njaha hiri ndr'anta mata, i zizam le wãˀ.›

¹²Vurˀe, njika mingiɓi ɗu, ɓa taŋ: Ya Bumbulvuŋ, Buymisemuŋ i ɓi na: I sa wuna mi ngi zivi kumoyo. Kum mizli ɗuwoyo, i sa bo ti kum tir ziviheye, i sa mi ti kum ng'ar hirwuy kum a muŋ.

¹³Kum mizli ɗuwoy, ti ya misa wuna mi ngi zivi kumoy na le, yo i bo ti kum le tir zivi kumoyo na, kisa sinaka, yi Bumbulvuŋ.

¹⁴I sa ˀufo musuwun ɗu a hur kumo, ɓa kisa lumam siifa a muŋ. I sa cufukum ar hirwuy kum a muŋ, dar kisa sinaka muduba, yi Bumbulvuŋ, i ɓa ɓi le na, i ga gwat nah. I ya Bumbulvuŋ maɓi.»

¹⁵Bumbulvuŋ a ɓiy mi naŋ ani:

¹⁶«Ka, mburu, zuɓ dum, toho anga ani: ‹Da Zudahay ati dideˀ ngi Israyeley mujom ng'avaŋ.› Yo zuɓ mekelem ma, toho anga: ‹Da Zozef, malla Efrayim waɗ jum ngi Israyeley mujom ng'avaŋ.›

¹⁷Zlra mi ngi dumoy vuna arleˀe, ɓa a tiram dum purla, a sa tiram a haŋ ɗike dum purla.

¹⁸Mizli ɗikey a sa cufuɗukuw, ɓa ki ɓa taŋ pulaˀavra ngi gwat ka maga nah vuna.

¹⁹Dar kisa ɓa taŋ: Ya Bumbulvuŋ, Buymisemuŋ i ɓi na: Dum ngi Zozef misi a haŋ Efrayim ati sukwi Israyel mujom ng'ava na, i sa hila taŋ, i sa zlira taŋ ati dum ngi Zuda. I sa tiri taŋ dum purla, a sa ndiram, taŋ purla a haŋ ɗu.

²⁰Dumoy ka mutoho gwat ar taŋ tuwa na, a sa ndiram a haŋ ɗike, taŋ gar a sa purakaŋ.

²¹Ɓa taŋ, ya Bumbulvuŋ, Buymisemuŋ i ɓi na: I sa hulukum, kum Israyeleye ti wuzla sukwi, kum miram nga wuzla taŋ na. I sa kuso hirnga kumo tir li gar, i sa ru ti kum nga hirwuy kum a muŋ.

²²I sa tiri ti kum sukwi purla asi ruwuy, waɗ a muwã Israyeleye. Buy purla a sa cifi buy kum gar. Kum anta sa ndiram sukwi cuw mata, yo kum anta sa wunkam zumabuy wal wal cuw mata.

²³Kuli kumoy ati gi gwat kum mukuyta wãˀ, malla ko slikiɗa ɓi kum na, anta sa ar dili mata. I sa loho kum tir li kum misi ara gar, li kum migam mungra ara. I sa zuɓa dili kumoy avra, joˀ kisa tiram mizli ɗuwoy, yo ya kwana, i sa tiri Buymisemuŋ kum.

²⁴Gawla ɗu Davit a sa zum buy ar kum, mijigin purla vur kum gar. Kisa gaka gwata kaɓa sirik ɗu mawuɗo, kisa jaka ɓimujuwa ɗuwoy a hirnga, yo kisa gam taŋ slra.

²⁵Ki sa cifam angi hirwuy, ya muvula da gawla ɗu Zakop, i hirwuy dideˀ kumoy mucufam zleˀe angaŋ. Kum ati ziri kumoy waɗ dideˀ kumoyo, kisa cifam anga wãˀa. Gawla ɗu Davit a sa ndir i buy kum ngi wãˀa.

²⁶I sa cica ɓi ngi ngiɓiˀay ati kum. A sa tiri i jumoˀay misi hã ngi sete. I sa cufukum ar li kum a muŋ, i sa sukukum. I sa ɗuva hay ɗu a wuzla kum ngi wãˀa.

²⁷Li cifi ɗu a sa ndir a wuzla kum. I sa ndir yi Buymisemuŋ kum, yo kumo, kisa ndiram i mizli ɗuwoy.

²⁸Ti ya misa ɗuva hay ɗu le a wuzla kum ngi wãˀ na, sukwi mekelemey a sa sinaka, yi Bumbulvuŋ mitiri ti Israyeleye pal vur slra ɗu.»