Read South Giziga EZK 38 Bible Online

EZK 38 - South Giziga bible

EZK 38

¹Bumbulvuŋ a ɓiy mi naŋ ani:

²«Ka mburu, ɗuva hiri kini ng'ar Gok, buy madiɗa ngi mizli Tubal ati Mesekey, angi hirwuy Magok, njika mingiɓi ani vur naŋ.

³Ki sa ɓaŋ, ya Bumbulvuŋ, Buymisemuŋ i ɓi na: Gok, ka buy madiɗa ngi Mesek ati Tubalaya, y'ani i ra lumuw akẽh.

⁴I sa cuw ɓiri muhurtokko kik a balama, i sa ɗiɗuw gbor gbor, i bi ti ka jom ati soje ɗikeye: Pilisey ati misi pilisey, zana mezlehey ɓaˀ ɓaˀ avu vu waɗ zigiduw ˀurnok ˀurnok haɗa ti mbaray meciɗek ati madiɗahay, taŋ gar taŋ ti maslalam asi haŋ asi haŋ.

⁵Soje Perse ati Etiyopi waɗ Putoyo, a sa juwam vu ti mbarayay ati jiiku ngi ɓirihey a hirngahaya, a sa bam asi ka.

⁶Soje ngi ruwuy Gomerey ati ngi ruwuy Bet-Togorma ar kiɗa mi ndok vay muŋ waɗ mizli haɗa a sa ram asi ka.

⁷Ka juw vu kuy kuy ati zigiduw ka mukuso taŋ avu ka na, masa jigina taŋ i kaha.

⁸Nga mbuŋ na, i sa puluw jiviɗ ɓa ki zuma hirwuy Israyele. Mizli ngi si ruwuy Israyele, a dirba taŋ munguroko vi haɗa ti gi vurum na, a bam le tisi ruwuy wal wal, taŋ misi zleˀe angi taŋ na, ara kusom hirnga a muwã Israyeley misi i diŋhey zlezle na. Zle ti taŋ muwunkam wunak ati mizli ngir sukwi mekelemeye na, a cufoko le setette.

⁹Ka ati soje ɗikey waɗ mizli mihaɗa asi ka na, kisa ra zlaka taŋ, kisa ra lumaka taŋ ɓuyoh kaɓa burkataŋ, kisa sirtaka taŋ ngbulum kaɓa gazlavay masirta li.

¹⁰Ya Bumbulvuŋ, Buymisemuŋ i ɓi na: Tapasa, kisa wuluk slra ngi gi ngi gihey haɗa a mevel ɗike, joˀ kisa kiluwo slra masukum ti ɓi malambaˀ.

¹¹Ki sa ɓi: I sa kiɗam vu ati mizli ngi ruwuy manja micika vu ar taŋ, mizli muroko zuyzuy, setette na, i sa ra luuma taŋ: taŋ gar i mizli micifa ngir walahay manja moholoy, yo mizlingreheye, i manja miviŋhey, manja magandaŋhay.

¹²I sa ra tiɓa zlili taŋ muluma ar vurumo, i sa hila gwat taŋhaya, yo diŋ mipahay a muŋ na, i sa ngizla taŋ, i sa ra luuma mizli muboko ti wuzla sukwi majiginaka ginew taŋhay ati zlili taŋhay, micifam a wuzla duniya na.

¹³Mizli Sabahay ati Dedaŋhay waɗ migi terere ngi Tarsisey ati prok naŋhay gar a sa ɓukuw: ‹Ki so ngi hila zlili muluma ar vurum kwa? Ki kuso mizli ɗikeye ɓa ngi hila gwatay kwa? Malla ɓa ngi hila ɓiri bara ati ɓiri tapasl tapasl, ginew ati gwat ngi lum waɗ ngi tiɓi zlili haɗa ar vurum kwa?›

¹⁴Vurˀe, ka mburu, njika mingiɓi ɗu, kisa ɓa Goko: Ya Bumbulvuŋ, Buymisemuŋ i ɓi na: Tapas Israyel, mizli ɗuwoy misa cifam le setette na, kisa si na takwa?

¹⁵Ka ati mizli haɗa asi ka, kisa soko ti ruwuy vay muŋ wãˀ. Ki sa gam zigiduw haɗa, vurum madiɗa taˀa, gar kumo gilaˀ gilaˀ pilisey.

¹⁶Ki sa ra luuma Israyel, mizli ɗuwoyo, hã hirwuyo sirit wãˀ kaɓa gazlavay masirta li. Hana a sa gi sey hin naŋ mindila le. Ka Gok, ti ya misa biga ya mipal na le a mihiri mizli tisi ka na, i sa puluw jiviɗ ɓa ki ra zuma hirwuy ɗu, ɓa sukwi mekelemey a sinaka, yi Buymisemuŋ gisiŋ.

¹⁷Ya Bumbulvuŋ, Buymisemuŋ i ɓuw na: Zlezle zleˀe, ya miga ɓa gawla ɗu mijiviɗ Israyeley a ɓam na vur ka. Ti hin tayna, a njikaka mingiɓi ɗu le, a gam di le vi mbeˀ mbeˀe. I sa pula jiviɗe da ka masa ra luuma taŋ.

¹⁸Tapas hin ka Gok masa ndil angi hirwuy Israyel na, kay Gok, i sa ji mevel haɗa. I ya Bumbuluŋ, Buymisemuŋ maɓi.

¹⁹Vur himaˀ ɗu mufõh fõk, yo mevel vik vik ka vu na, hadam: ti hin nah na, hirwuy a sa jijik ngbir ngbir a Israyele.

²⁰Kilifey, ɗiyuwoy, gwat misãmi ngi ɓuhoy, gwatay maram ti kwacay waɗ mizli titrahay gar asi ruwuyo, a sa jijikam ngbar ngbar a mbuŋ ɗu. Muwãhay a sa cifam virzi, mandazlay muwãhay a sa luwuslam, yo moholoy gar a sa mbizlam.

²¹I sa gi vurum ti ka a muwã ɗuwoyo Gok. Soje ɗikey a sa kiɗam vu vagay vagay ar wala taŋ. I ya Bumbulvuŋ, Buymisemuŋ maɓi.

²²I sa guw kiita ti slino jiji mozorbono ati kiɗ vagay vagay. I sa go vuŋ, a zuɓ mekepel, a sa gi ti yam waɗ i sa po vu waɗ baruudu ar ka ati soje ɗikeye waɗ ar mizli mihaɗa masa ram asi kahaya.

²³I sa biga, yi madiɗa, ya pal , yo i sa biga vu ɗu a mihiri sukwi haɗi. Dar a sa sinaka, yi Bumbulvuŋ.»