Read South Giziga EZK 39 Bible Online

EZK 39 - South Giziga bible

EZK 39

¹«Ka mburu, njika mingiɓi ani vur Gok, kisa ɓi: Ya Bumbulvuŋ, Buymisemuŋ i ɓaŋ na: Ka Gok, buy madiɗa ngi mizli Mesek ati Tubalaya, y'ani i ra lumuw akẽh.

²I sa ɗuɗuw, i ru ti ka, i sa bo tika tir vay muŋ wãˀ, i sa ru ti ka nga zla kiɗa vu ati muwã Israyeley.

³I sa kiɗuw ɓa lek ɗik a diɗ tisi haŋ gula ɗike, yo ɓa luvut ɗikey a ndilam tisi haŋ hazumo.

⁴Ka ati soje ɗikey waɗ mizli misi asi kahay gar na, kisa ndilam a muwã Israyeley. I sa vuluw da muluhoy a zumukuw, da ɗiyuwoy gar waɗ da gwat misãmi ngi ɓuhoy.

⁵Ki sa diɗ ɓaˀ a ɓuh, asi yi ɓa le. I ya Bumbulvuŋ, Buymisemuŋ maɓi.

⁶I sa wura Magok ati mizli micifa ngir maturahay muroko setette na, dar mizli a sa sinaka, yi Bumbulvuŋ.

⁷I sa biga slimiɗ ɗu mipal na a wuzla Israyel, mizli ɗuwoyo, yo y'anta sa pula jiviɗ ɓa a hiryakiy slimiɗ ɗu mipal na mata. Dar sukwi ngi mizli a sa sinaka, yi Bumbulvuŋ mipal a Israyele.

⁸Ani gwat nah ara ndilawa, a ndilo le vuna si, i hin ya miɓa ɓi naŋ na. I ya Bumbulvuŋ, Buymisemuŋ maɓi.

⁹Akẽh na, mizli ngir walahay Israyele a sa bam, a sa ɗiyam vu ti gwat ngi vurum ngi mesene taŋhay mupulaka taŋ hũyõf na, hã a gam di vi tarnaˀa: i mbaray meciɗek ati madiɗahay, lek ati luvutoy, ziwit ngi ɓirihey ati ziwit ngi dumoy,

¹⁰Tˀanta sa giram vu nga juwo dum a ɓuh malla ko nga nguma widisey a ɓuh mata, asi a sa ɗiyaka vu ti gwat ngi vurum tayna vuna si. A sa vaka gwat ngi mizli mivaka taŋ gwatay zleˀe na ya, yo a sa hilaka gwat ngi mizli mihilaka taŋ gwatay zleˀe na ya. I ya Bumbulvuŋ Buymisemuŋ maɓi.

¹¹Angi hin nah na, i sa ɗuva zivi ngi Gok asi ruwuy Israyele, i sozo ngi mizli macohom ng'asi pas ngi miprik ngi mubuliy mumuca. Sozo nah vuna ada tika jiviɗ ngi mizli macohomo. Gok ati mizli naŋhay zigiduw taˀ na, a sa dikaka taŋ a diga. Joˀ a sa zilaka sozo nah vuna: ‹Sozo ngi mizli ngi Gokoy zigiduw taˀa›.

¹²Sey Israyeley a gam kiya tarnaˀ ar li dik taŋ, ɓa dili ngi si ruwuy a zuɓ avra.

¹³Masa dikaka taŋ na, i mizli ngi si ruwuy gar, tapas masa vulikiy dudok na, taŋ a sa jijaham asi ɓi nah. I ya Bumbulvuŋ, Buymisemuŋ maɓi.

¹⁴Angi kiɗa mi ngi kiya mitarnaˀ naŋ na, ada sa pam mizli hĩˀĩ sek ndrehhe ngi bula hirwuyo, a sa dikaka vagay ngi mizli mindiram manja dikay na, jom ati jini ngi mizli muzuɓa mulakay na, ɓa dili ngi si ruwuy a zuɓ avra.

¹⁵Mubula lihey tuwa, taŋ masa bulaka hirwuyo, da taŋ mupuram tesl ngi mbur le na, a sa kusom ɗugur kos kos a ciki tesle ɓa ngi biga, ɓa mili vigiɗey a dikaka taŋ angi Sozo ngi mizli ngi Gokoy zigiduw taˀ tuwa.

¹⁶Walahay ada, a sa zilaka Hamona, a mbiɗeˀvra: Zigiduw. Taŋ masa bam ti dili ngi si ruwuy avra na, kahana so.»

¹⁷Ka mburu, cin, ya Bumbulvuŋ Buymisemuŋ i ɓi na: «Ɓa ɗiyuwoy ati gwat maslikiɗam ti zlara gar, waɗ gwat misãmi ngi ɓuhoyo na: Soko, cikiloko tir lihey gar, kusom ɓa ki zumam gwat ngi mikuli ya masa gukum di, mikuli madiɗa a muwã Israyel. Ki sa zumam useˀe, kisa sam pumbusu.

¹⁸Ki sa zumam useˀ ngi bugawlahay, yo kisa sam pumbus ngi buy ngi si ruwuyoy. I sli di i ˀay ngi zlengerekey, ziri tumuŋhoy, bazuwayay, gusoŋhoy. Taŋ gar i gwat misãmi muzlumbra ngi Basaŋhay.

¹⁹Ki sa sluɓam mungulo hã ki mbam pecek, kisam pumbuso hã a wukum: hana i mikuli, ya mugukum di.

²⁰Ar muguzlum ɗu, kisa mbam ndus ndus ti useˀ ngi pilisey ati ngi gwat misãmi ngi ɓuvoy, ti ngi bugawla ngi vurumoy waɗ ti ngi migi vurumoy gar. I ya Bumbulvuŋ Buymisemuŋ maɓi.

²¹I sa ga ɓa sukwi gar a vulikiy dudoko. Sukwi ngi mizli gar na, a sa puraka kiita ya masa ga taŋ di ati ya masa ja haŋ avu taŋ na.

²²Akẽh na, zle tapasa ati nga mbuŋ gar na, Israyeley a sa sinaka, yi Bumbulvuŋ Buymisemuŋ taŋ.»

²³Buymisemuŋ a ɓi na: «Sukwi ngi mizli a sa sinaka, Israyeley mijaka taŋ nga hirwuy mulak na, asi mungra taŋ, asi taŋ micifam teŋteŋ avu ya ta. Vurˀe, yi ɗum ɗum avu taŋ, waɗ i vula taŋ taˀ a haŋ mizli mazliram ti taŋ ta, a kiɗaka taŋ gar ti maslalam.

²⁴Yi gi ti taŋ weˀe avu ci taŋ ar dili ati slikiɗa ɓi taŋ na. Ya muɗum ɗum avu taŋ na vurˀe.

²⁵Amma ya Bumbulvuŋ Buymisemuŋ i ɓi na: Gwat masa gi avu mizli ngi Zakopoy na, i sa mbiɗa, i sa pura ircece da Israyeleye, yo slimiɗ ɗu mipal na, i sa wuɗ suloŋ suloŋ.

²⁶Pi mesem taŋ ati cifi taŋ teŋteŋ ta avu ya, ti taŋ micifam setette asi ruwuy taŋ, ko mbur miga taŋ zluwun anta na, a sa puykoko hirnga naŋ.

²⁷Ya masa bo ti taŋ ti wuzla mizli mekelemey na, yi sa kuso taŋ kileŋ avu hirwuy ngi mesene taŋhaya. Ya mipal na, i sa biga da sukwi ngi mizli mihaɗa tisi taŋ.

²⁸Dar a sa sinaka, yi Bumbulvuŋ Buymisemuŋ taŋ. Asi a dirba ya mija taŋ nga wuzla sukwi mekelemey ruwuy mulak na, y'anta sa pula taŋ a diga mata, amma yi sa kuso hirnga taŋ ng'asi ruwuy nga taŋ.

²⁹Y'anta sa ɗum avu taŋ mata, asi mike na, i pa ˀUf ɗu le ar Israyeleye. I ya Bumbulvuŋ Buymisemuŋ maɓi.»