Read South Giziga EZK 40 Bible Online

EZK 40 - South Giziga bible

EZK 40

¹HAY NGI BUMBULVUŊ MASA SO TUMBUŊ A dirba ji ndra nga hirwuy mulak, ar zli virzi ngi vi mizli ngir cuw nga zlum naŋ, ngi hin mukuruˀ naŋ ngi kiya mudumbuŋ, i vi mukuruˀ nga mufaɗ naŋ a dirba walahay Zeruzalem mici asi haŋ ngi mulakaya. Kasl ti hin nah vuna si na, gidaŋ ngi Bumbulvuŋ naŋ da ar ya, aru ti ya nga Zeruzalem a diga.

²I pur ti kleŋ, keɗ na, a zuɓiy fangal nga hirwuy Israyel. Ra cifiy a hirnga muwã migila suyom. Tir vay ruwuy naŋ, gwatay ada kaɓa hay ngi walahay mindira ndar ndar.

³Aru ti ya ng'avi hayay tuwa, keɗ na: mbur, a bam vu ati ɓiri gaza. Gwat ka zeweɗ ngi gugumay mislirkeɗ waɗ ganday ngi wi gwat kaw a haŋ. Naŋ deŋ a mizlingre.

⁴Mbur tuwa a ɓiy na: «Ka mburu, pur kuy kuy, yo cin kuy kuy. Gwat ya masa buguw di ɓa ki pura na, ki slimiɗ ara kuy kuy, asi taŋ musoko ti ka ng'aka na, ɓa ki pura taŋ. Gwat ka masa pura gar na, kisa slufa ɓi nah da Israyeley.»

⁵Keɗ na, mohol gun gun hirngi hay ngi Bumbulvuŋ. Ganday metir makir ngi wi gwat, kaw a haŋ mbur tuwa, reta metir gar na, a funa reta metir muho gara le ti haŋ taˀ purla. A wa ɓiɓir ngi moholo weˀ na: a wi ganday ɓaˀ purla, gil naŋ: ganday ɓaˀ purla.

⁶Aru kini nga mizlingre mupuɗak ng'asi pas ngi mipriki. A jiɗ tir li migaˀ gaˀ ngi ci ngi haya. A wa li ɗuva sar mitaˀ a miviŋ na, sliprik naŋ ganday ɓaˀ purla.

⁷Viŋ ngi mijigina mizlingreheye, purla gar na, jek naŋ ganday ɓaˀ purla, sliprik naŋ, ganday ɓaˀ purla. Wala ngi hayaya, ganday ɓaˀ ɓaˀ cuw ti reta. Li ɗuva sar mitaˀ a miviŋ ngi jawleeru ngi mizlingre, zle a huroˀo: ganday ɓaˀ purla.

⁸A wa jawleeru ngi mizlingre weˀ weˀna,

⁹metir mufaɗa, ɓamtalaya, purla gar na: metir purla. jawleeru ngi mizlingre, naŋ nga huroˀo.

¹⁰Hay ngi mijigina mizlingrehey misi tisi pas ngi miprike: taŋ makir ti ka makir ti ka, merkeɗ taŋ a wam i misi purla, yo ɓamtalay ti ka ti ka gar kwana, ɓiɓir taŋhay i misi purla.

¹¹A wa sliprik ngi li ci ngi haya weˀ na: metir zlum. Jek naŋ: metir kuruˀ ngaŋ kaˀ ti reta.

¹²Hay ngi mijigina mizlingreheye, wala taŋhaya, reta metir reta metir. Hay gar, giluw naŋ ti ka ti ka gar na: metir makir makir.

¹³A wa sliprik ngi miviŋ, zle a hur viŋ purla ngi mijigina liheye, hã a hur viŋ vay mekelem mupuɗak ar miviŋ mekeleme na, a wi metir kuruˀ nga cuw ti reta. Miviŋ ngi viŋ gar na, puɗak ar miviŋ mekelem.

¹⁴A wa jawleeru: metir kuruˀu. Amma jawleeru ngi mizlingre na, wazlaray gun hirnga naŋ.

¹⁵Zle a mbuŋ mohol ngi mizlingre hã a mbuŋ jawleeru ngi huroˀo, metir kuruˀ nga cuw ti reeta.

¹⁶Hay ngi mijigina lihey ati ɓamtalaya, fenetirey gun gun avu taŋ ti huroˀo, yo avu jawleeru kwana, fenetirey gun gun ava ti huroˀo ma. Ɓamtal gar na, a gakaŋ wuya geˀ geˀ ti mihaŋ ngi dibinojehey.

¹⁷Mbur tuwa a ci ti ya kulaˀ nga wazlaray vay ngi vra, keɗ na: viŋhey kukur makir, midirkahay le, ɗiyeˀ ɗiyeˀ, gun wazlaraya.

¹⁸Li midirka ngi huroˀo, ngi vi miviŋheye, taŋ rak rak ati sliprik ngi miviŋheye.

¹⁹A wa li misi a mbuŋ mizlingre mudumbuŋ hã avu li ngi mbuŋ wazlaray ngi huroˀo: metir kukur zlum. Hana i li misi kini tir vay si pas ngi mipriki. Amma tir vay muŋ,

²⁰a wa jek ati sliprik ngi mizlingre mupuɗak ng'ar vay muŋ, a wazlaray ngi vra.

²¹Hay ngi mijigina liheye, makir ti ka, makir ti ka, ɓamtal naŋhay ati jawleeru naŋ, wi taŋ i misi purla ati ngi misi a mizlingre mudumbuŋ. Jek naŋ: metir kukur cuw nga zlum, sliprik naŋ: metir kuruˀ nga cuw ti reeta.

²²Fenetir naŋhay ati jawleeru naŋ waɗ wuya ti mihaŋ ngi babazla naŋhaya, wi taŋ i misi purla ati ngi misi a miviŋ mupuɗak ng'asi pas ngi pastaˀa. A jiɗam ngi ci nga mizlingre tir li migaˀa gaˀ gaˀ tarnaˀa, jawleeru, naŋ a mbuŋ.

²³Mizlingre ada a wazlaray ngi huroˀo, puɗak ng'ar miviŋ vay muŋ, kaɓa misi tir vay sipas ngi miprik tuwa ya. Mbur tuwa a wa zle a mizlingre vay ka, hã a mizlingre vay diga na: metir kukur zlum.

²⁴Aru ti ya kini tir vay ruwuy, keɗ na: mizlingre ada, mupula kini tir vay ruwuy. A wa ɓamtal naŋhay ati jawleeru naŋ weˀ weˀ na: i misi purla ati ngi mekelemeye.

²⁵Mizlingre ati jawleeru, fenetirey avu taŋ gun gun zlar, rak rak ati fenetir mekelemeye. Jek naŋ: metir kukur cuw nga zlum, sliprik naŋ: metir kuruˀ nga cuw ti reta.

²⁶Li migaˀa gaˀ gaˀ ngi jiɗ, ngi ci ng'ara tarnaˀ a mbuŋ jawleeru vuna. Geˀ geˀ wuya ti mihaŋ ngi dibinojehey ti ka ti ka avu ɓamtal naŋhaya.

²⁷Mizlingre ngi wazlaray ngi huroˀo, naŋ kini tir vay ruwuy. A wa wala taŋ weˀ weˀ na: metir kukur zlum.

²⁸A ci ti ya nga wazlaray ngi huroˀo tir miviŋ vay ruwuy, a wa mizlingre: wi naŋ i misi purla ati ngi mizlingre mekelemeye.

²⁹Viŋ ngi mijigina lihey, ɓamtal naŋhay ati jawleeru naŋ: wi taŋ i misi purla ati ngi mekelemeye. Miviŋ ati jawleeru naŋ, fenetir gun gun avu taŋ zlar. Jek naŋ: metir kukur cuw nga zlum, sliprik naŋ: metir kuruˀ nga cuw ti reta.

³⁰jawleeruhoy gun gun hirnga naŋ. Jek taŋ: metir kuruˀ nga cuw ti reta, sliprike: metir cuw ti reta.

³¹jawleeru ara kiɗo mi a wazlaray vay ngi vra, wuya ti mihaŋ ngi dibinojehey geˀ geˀ avu ɓamtal naŋhaya, ti ka ti ka. Li migaˀa gaˀ gaˀ ngi jiɗ ng'ara dangafaɗa.

³²A ci ti ya nga wazlaray ngi huroˀo tir miviŋ vay ngi si pas ngi mipriki. A wa mizlingre weˀ na: wi naŋ i misi purla ati ngi mekelemeye.

³³Viŋ ngi mijigina lihey, ɓamtal naŋhay ati jawleeru naŋ: wi taŋ i misi purla ati ngi mekelemeye. Mizlingre ati jawleeru naŋ, fenetir gun gun avu taŋ zlar. Jek naŋ: metir kukur cuw nga zlum, sliprik naŋ: metir kuruˀ nga cuw ti reta.

³⁴jawleeru ara kiɗo mi a wazlaray vay ngi vra, wuya ti mihaŋ ngi dibinojehey geˀ geˀ avu ɓamtal naŋhaya, ti ka ti ka. Li migaˀa gaˀ gaˀ ngi jiɗ ng'ara dangafaɗa.

³⁵Aru ti ya kini tir mizlingre vay muŋ. A wa weˀ weˀ na, i misi purlaka ngi mekelemeye.

³⁶Naŋ ti viŋ ngi mijigina lihey, ɓamtalay ati jawleeru, waɗ fenetirey avu taŋ gun gun zlar. Jek naŋ: metir kukur cuw nga zlum, sliprik naŋ: metir kuruˀ nga cuw ti reeta.

³⁷jawleeru ara kiɗo mi a wazlaray vay ngi vra, wuya ti mihaŋ ngi dibinojehey geˀ geˀ avu ɓamtal naŋhaya, ti ka ti ka. Li migaˀa gaˀ gaˀ ngi jiɗ ng'ara dangafaɗa.

³⁸Viŋ ada, miviŋ naŋ kini ng'ar jawleeru ngi mizlingre tuwa. Ginew ngi mikuli mizlam zlam na, a bunaka a diga.

³⁹Tabuloy ada ar jawleeru ngi mizlingre tuwa, cuw ti ka cuw ti ka. Ginew ngi mikuli mizlam zlam ati mikuli vur mungra waɗ mikuli ngi ɗiya ɓi na, a slaka ˀay taŋ ar taŋ.

⁴⁰A ciki jawleeru, ti vra na, tabuloy ada cuw ti ka cuw ti ka da mizli macoko tir mizlingre vay muŋ.

⁴¹Tabul mufaɗ ti ka, mufaɗ ti ka a mizlingre: jom gar na, dangafaɗa, a slaka ˀay ngi ginewey ar taŋ.

⁴²Tabul ngi ɗugur miciɗa ti ciɗey ada mufaɗ ngi gi mikuli mizlam zlam. Giluw naŋ ti ka ti ka gar na: santimetir kukur tarnaˀ nga zlum, kukur tarnaˀ nga zlum. Gil naŋ: santimetir kukur zlum. Gwat ngi sli ˀay ngi ginew ngi mikuli mizlam zlam ati mikuli mekelemey ti taŋ na, a paka taŋ sek ar taŋ.

⁴³Mivay ngi hur tabuloyo, a ɗiyaka taŋ ceŋ ceŋ, a waka puɗaˀ haŋ purla, gun gun zlar, gun gun zlar. Useˀ ngi mikuliheye sek ar taŋ.

⁴⁴Zar avu mizlingre ngi huroˀo ma na, viŋhey ada da mizli mazlam dimis a wazlaray ngi huroˀo. Viŋ mekeleme tir mizlingre vay muŋ, puɗak ng'ar vay ruwuy, yo numuŋ tir mizlingre vay ruwuy, puɗak ng'ar vay muŋ.

⁴⁵Joˀ mbur tuwa a ɓiy na: «Viŋ hana mupuɗak ng'ar vay ruwuy na, i ngi masayay magam slra ar hay misenna.

⁴⁶Yo viŋ mupuɗak ng'ar vay muŋ na kwana, i ngi masayay magam slra ar li ngi gi mikuli. I ziri ngi Sadokoy a wuzla dideˀ ngi Leviheye tewle makirohoko ng'avu Bumbulvuŋ ngi gaŋ mezegwele.»

⁴⁷Mbur tuwa a wa wazlaraya weˀ weˀ: Giluw naŋ ti ka ti ka mufaɗ taŋ gar i misi purla: metir kukur zlum, kukur zlum. Li gi mikuli, naŋ kaˀ a mbuŋ hay ngi Buymisemuŋ.

⁴⁸A ci ti ya ng'ar jawleeru ngi hay ngi Buymisemuŋ. A wa ɓamtal ngi jawleeruhoyo weˀ weˀ na: Jek naŋ tir vay ka: metir cuw ti reta, tir vay diga: metir cuw ti reta. Sliprik ngi mizlingre: tir vay ka: metir pal ti reta, tir vay diga: metir pal ti reta.

⁴⁹Jek ngi jawleeru: metir kuruˀu, sliprik naŋ: metir merkeɗe. Li migaˀa gaˀ gaˀ kuruˀ ngi jiɗ ng'ara. Ɓamtalay ada cuw gweˀ avu ɓamtal muzlumbaˀ zlumbaˀ ngi vu moholoyo, kaˀ tir vay ka, kaˀ tir vay diga.