Read South Giziga EZK 41 Bible Online

EZK 41 - South Giziga bible

EZK 41

¹Mbur tuwa a ci ti ya ng'ar viŋ madiɗa. A wa ɓamtalaya, sliprik taŋ: metir merkeɗ tir vay ka, metir merkeɗ tir vay diga.

²Sliprik ngi li ngi ci ngi haya: metir zlum, mivay ngi ciki naŋhay ti ka ti ka gar na: metir cuw ti reta cuw ti reta. A wa jek ngi viŋ: metir kukur cuw, sliprik naŋ: metir kuruˀu.

³A ci kulaˀ nga huroˀo, a wa ɓamtal mikaˀ a miviŋ ngi ci ngi haya: metir pal, mi ngi li ci ngi haya: metir makir. Mivay ngi huroˀ ngi ci ngi haya: metir makir ti reta.

⁴A wa viŋ meciɗeke mupuɗak ar viŋ madiɗa: giluw naŋ ti ka ti ka gar i misi purla: metir kuruˀ kuruˀu. Joˀ a ɓiy: «Hana i li mipal wãˀ.»

⁵A wa dalam ngi hur hay ngi Bumbulvuŋ: ɓiɓir naŋ metir makir. Hayay mujom ng'avi hay ngi Bumbulvuŋ, gun gun hirnga naŋ na, ɓiɓir ngi dalama: metir cuw.

⁶Hay mujom ng'avi hay madiɗa tayna a ndiraka taŋ a hirnga cala a hirnga cala, jirngasl jirngasl makir. Hay mijirngasl gar na, viŋhey ara kukur makir. Viŋ tayna a cam le kulaˀa kulaˀa ng'ar dalam ngi mohol mugun gun hay ngi Bumbulvuŋ, amma a cam ng'ar dalam ngi hay ngi Bumbulvuŋ ta ɓula.

⁷Viŋ tayna, ar jirngisl ngi hay gar na, ara wun pitikayya, gun hirnga ngi hay ngi Bumbulvuŋ. Vurˀe, haya nga muŋ naŋ na, a wun le. Zle avu hay mijirngasl ngi ruwuyo, a jiɗam ng'ar mijirngasl ngi wuzla, a dirba nah na, ng'ar ngi muŋ.

⁸Si virzi ngi hay ngi Bumbulvuŋ, i pura na, i midirka le gun gun zlar, zle avu viŋ mujumoko ng'ava jom tuwa, gil naŋ metir makir.

⁹Ɓiɓir vay ngi vra ngi dalam ngi viŋ mujom ti jom na: metir cuw ti reta. Li mupula firndiw kine misi ar wala ngi viŋ mujumoko ng' avu hay ngi Bumbulvuŋ

¹⁰ati viŋ mekelemey mugun gun na: metir kuruˀu.

¹¹Li ci ng'ar viŋ mujom ng'avi hay ngi Bumbulvuŋ, taŋ tir li mupula firndiw kine tuwa: purla tir vay muŋ waɗ purla tir vay ruwuy. Sliprik ngi li mupula firndiwe: metir cuw ti reta, gun gun zlar.

¹²Hay ada puɗak ar wazlaraya, tir vay si pas ngi pastaˀa: sliprik naŋ, metir kukur makir nga zlum. Ɓiɓir ngi dalam ngi hay vuna: metir cuw ti reta, gun gun zlar. Jek naŋ: metir kukur mufaɗ nga zlum.

¹³Mbur vuna a wa haya, jek naŋ: metir kukur zlum, li mupula firndiw kine, hay ati mohol naŋhaya: metir kukur zlumo ma.

¹⁴Sliprik ngi mbuŋ hay ati li mupula firndiw kine tisi pas ngi miprike: metir kukur zlum.

¹⁵A wa jek ngi hay misi a mbuŋ li mupula firndiw ti duba hay ngi Bumbulvuŋ, waɗ li ngi cuhoy ti ka ti ka gar na: metir kukur zlum. Viŋ madiɗa ngi huroˀo, jawleeru mupuɗak nga wazlaraya,

¹⁶li ɗuva sar ngi miviŋheye, fenetirey munjororo ati li cuhoy mugun gun hay mijirngisla makir, mupuɗak ar li ɗuva sar ngi miviŋ na, i miga taŋ ti dum, zle a ruwuyo gun gun zlar, ko fenetirey kwana i misirta taŋ ti dum.

¹⁷Miviŋ ngi hay ngi Bumbulvuŋ, zle a muŋ ti vra naŋ, hã ti huroˀo, yo ɓaˀa moholo gun gun ti huroˀo, ti vra gar na, a ɗiyam li le ɗiyeˀ ɗiyeˀ,

¹⁸ngi gi wuya ti kerubeŋ ati mihaŋ ngi dibinojehey, mihaŋ ngi babazla geˀ ar wala ngi kerubeŋhey cuwo. Kerubeŋ gar na, mihiri ava cuw.

¹⁹Mihiri ngi mbur, pulaˀ hiri ng'avi mihaŋ ngi babazla vay ka, yo mihiri ngi mobor, pulaˀ hiri ng'avi mihaŋ ngi babazla vay diga. A gaka taŋ kanah kanah gun gun hay ngi Bumbulvuŋ zlar.

²⁰A gam kerubeŋhey ati mihaŋ ngi dibinojehey geˀ geˀ avu miviŋ ngi dalam ngi viŋ madiɗa, zle a ruwuy hã a muŋ.

²¹Dum ngi miviŋ ngi viŋ madiɗa, giluw naŋ ti ka ti ka gar na rak rak. A mbuŋ li mipal na, gwat a puro kaɓa

²²li gi mikuli miɗiya ti dum, gil naŋ, metir pal ti reta, jek naŋ, metir pal. Zlirɗiy naŋhay, sar naŋ ati hur naŋ gar na, i miga taŋ ti dum. Mbur tuwa a ɓiy: «Hana i tabul ngi mbuŋ Bumbulvuŋ.»

²³Viŋ madiɗa ati li mipala, miviŋhey avu taŋ cuw.

²⁴Miviŋ tayna, palalam ngi miviŋhey avu taŋ cuw cuw, cuw avu hana cuw avu hana.

²⁵Avi miviŋ ngi viŋ madiɗa na, a gam kerubeŋ ati mihaŋ ngi dibinojehey ceɗ ceɗ avu taŋ, kaɓa migaka taŋ zleˀe avu dalam tuwa ya. A mbuŋ jawleeru vay ngi vra naŋ na, palak ngi dum zuɗukko zlumbaˀ ng'avaŋ.

²⁶jawleeru ati viŋhey mujom ng'avi hay ngi Bumbulvuŋ waɗ palak ngi dum muzuɗukko a mi jawleeru tuwa na, fenetir njororo avu taŋ waɗ wuya ti mihaŋ ngi dibinojehey geˀ geˀ avu taŋ ti ka ti ka gar.