Read South Giziga EZK 44 Bible Online

EZK 44 - South Giziga bible

EZK 44

¹Mbur tuwa a mi ti ya tir mizlingre ngi hay Bumbulvuŋ, vay ngi vra naŋ, mupuɗak ng'asi pas ngi mipriki, i migica le giceˀe.

²Bumbulvuŋ a ɓiy na: «Mizlingre hana naŋ da ndir giceˀe, anta wunaka wun le ta, mbur anta ci ti ra ta, asi ya Bumbulvuŋ, Buymisemuŋ ngi Israyele, i ci le ti raˀa, vurˀe, naŋ da ndir giceˀe.

³Amma buyo, vur naŋ misi i buy na, a sa cifi ngi zuma ɗaf a mbuŋ ɗu, ya Bumbulvuŋ. A sa ci tir jawleeru ngi mizlingre, yo a sa bi tir jiviɗ nah a muŋ.»

⁴Mbur tuwa a ci ti ya tir mizlingre vay muŋ, a mbuŋ hay ngi Bumbulvuŋ. I ra pur hiri, keɗ na, dudok ngi Bumbulvuŋ a naha hay ngi Bumbulvuŋ tuwa le. Yi huruk huruk a ruwuy.

⁵Bumbulvuŋ a ɓiy: «Ka mburu, jika slimiɗe, pur, yo cin kuy kuy. Ɓi ya mawuɗ i ɓuw di a hirnga ɓi ya miɓa ɗaˀ le gar vur hay nga ya Bumbulvuŋ, waɗ vur mezegwel ngi gi vurˀe gar na, cine kuy kuy ti slimiɗ ɗike. Mbiɗeˀvra ngi ci ngi hay ati ngi bi tir hay ɗu gar na, kisa ki slimiɗ ara kuy kuy.

⁶Israyel, mizli mislikiɗa ɓi tayna, kisa ɓa taŋ: Ya Bumbulvuŋ Buymisemuŋ i ɓi na: Israyeley, kay, gi gwat malambaˀ kum mukuyta wãˀhay na, a mbiy kwacay le muduba.

⁷Ti kum mira vulikiy ɗaf ɗu, mungul waɗ pumbus ar hay ɗu na, mizli mulakay misi micam mizaw ta ma na, ki cam ti taŋ ng'ara, ɓa a ndiram ara, ɓa a hiryaka hay ɗu. Mbak hã jumoˀay ɗu ati kumo, ki ngilaka le ti gi gwat kum malambaˀ kum mukuyta wãˀhay na.

⁸Ki kam slimiɗ ɓaˀ le ar gwat ɗu muvuku vu taŋ na ta, amma ki cifam mulakay ar deɗe kumo ar hay ɗu mipala, ɓa a gukum slra nah.

⁹Vurˀe, ya Bumbulvuŋ, Buymisemuŋ i ɓi na: mbur manja ci mizaw, ko purla masa ci ar hay ɗu anta, ko mbur mulak manja ci mizaw misi a wuzla Israyeley tekeɗe kwana, purla masa ci anta.

¹⁰Amma Levihey mubaˀam le kileŋ avu ya, ti hin mizli Israyeley mingizlam jiviɗ a wuzlaɓuh mikirɗak kirɗak, ɓa a ram ti sipi kulihey na, taŋ a sa jijiraka zayɓi ngi mungra taŋ na.

¹¹A sa ndiram a hay ɗu, ngi jigina mizlingre, waɗ ngi jigina hay ɗu. Mikuli ti ginew ngi zlum ti zlum ati mikuli mekelemey, mizli Israyeley masa gaka gar na, masa slaka ˀay ngi ginewey i taŋ, yo masa cicam a mbuŋ mizli Israyeley ngi ga taŋ slrakahana i taŋ.

¹²Asi a gam slra misi kahana le ti taŋ mihuruk hurukam a mbuŋ kulihey, yo a caka Israyeleye le ar mungra. Vurˀe, i sa hudumvur taŋ haŋ paɗ a muŋ, a sa jijiraka zayɓi ngi mungra taŋ. I ya Bumbulvuŋ Buymisemuŋ maɓi.

¹³Tˀanta sa soko a mbuŋ ɗu neˀ le ngi gi slra ngi mikuli mata, yo gwat ɗu muvuku vu taŋ ati li ɗu mipal wãˀ na, t'anta sa kirohoko neˀ le ng'avi taŋ mata. Slra ngi pi mesem taŋ ati gi gwat taŋ mukuyta wãˀ na, a sa jijiraka zayɓi naŋ.

¹⁴I sa cifa taŋ ngi gi slra ar hay ɗu, slra ngir hay ɗu ati slra misi i ngi gi ngi gi cek si.

¹⁵Amma Levi masayay angi tizer ngi Sadok, migam slra zleˀe a mbuŋ ɗu ti jiviɗ naŋ ar hay ɗu, ti hin Israyeley mingizlam jiviɗ kileŋ avu ya na, masa gam slra ngi mezegwel a mbuŋ ɗu i taŋ. Masa soko a mbuŋ ɗu ti mungul ati pumbus na i taŋ. I ya Bumbulvuŋ Buymisemuŋ maɓi.

¹⁶Masa coko ngi hay ɗu i taŋ. Masa soko ng'avi tabul ɗu, ɓa ngi giy mezegwel waɗ ngi ki slimiɗ ar slra ɗu i taŋ.

¹⁷Ti taŋ masa cam tir mizlingre ngi wazlaray ngi huroˀo na, a sa kam zana ngi gugumay mislirkeɗe. Ti taŋ masa gam slra a mizlingre ngi wazlaray ngi huroˀo waɗ ar hay ɗu na, t'anta sa kam zana mija ti ngwic ngi tumuŋ ta.

¹⁸A sa tuwuɗaka hirnga ti loppol ngi gugumay mislirkeɗe, yo a sa cam gejere ngi gugumay mislirkeɗe ma. Tˀanta sa juwaka vu hirlak ti kanda ta, asi liiriɓi.

¹⁹Ti taŋ masa bam nga wazlaray ngi vra, ng'avi mizli Israyeleye na, zana taŋ migam taŋ slra na, a sa cukoko taŋ avra, a paka taŋ ar viŋ ngi hay ɗu. A sakam di i zana mekelemey, asi t'anta sa zuɓaka mungra ngi mizli avra ti zana tayna ɓaˀ ɓaˀ avu vu ta.

²⁰Tˀanta sa hijaka hirnga ta. Tˀanta sa pulaka himac hirnga dibizik ta, amma a sa slaka a ndir ndecece kuy kuy.

²¹Masay gar, muwuɗ le ɓa a sa ci nga wazlaray ngi huroˀo na, naŋ anta si mbaazla seˀ le ta.

²²Masayaye, ngwas wudiga malla muɓula le ti ɓul na, t'anta zuɓaka ta, a zuɓam sey diili Israyel mungbuˀo kine aruŋ. Amma da wudiga i ngwas ngi masay zleˀe na, a ngilaka zuy ɓula.

²³A sa dubunam da mizli ɗuwoyo, ɓa a slaka wala ngi gwat mipal ati gwat muho gara, yo a sa bigaka taŋ sli wala ngi gwat manja dili ati gwat misi dili.

²⁴Da a mbiɗi le ngi gi kiita na, sey maslaka kiita i taŋ, a sa gaka kiitakaɓa ɓimujuwa ɗu mawuɗo. Gwat ya mujuwa le a mevel ɗu ati ɓi ya ɓi micica le gar na, a sa jaka ɓi nah a hirnga ar muguzlum ɗuwoyo gar, yo a sa tiram ti hin ngi sabat ɗuwoyo pal.

²⁵Mbur mumuc le na, a cam a hay naŋ ta, vur taŋ masa ndiram ti dili. Amma da mbur mumuco, i cine, mumuŋ, mangal malla zuŋ naŋ mongoso, sukum naŋ mongoso malla mizile, ko sukum naŋ mongoso mici ɗaˀ a hay zil t'aruŋ na, naŋ anta ndir ti dili ta ɓula.

²⁶Da a ci le a hay mbur mumuca ho gar, a zuɓa dili naŋ le avra na, a sa slufakaŋ hin tarnaˀ ɓa a sa zuɓa slra naŋ a muŋ.

²⁷Waɗ so na, tapas naŋ misa ci le nga gi slra ar hay ngi Bumbulvuŋ, a wazlaray ngi huroˀo na, a sa gi mikuli vur mungra ngi hirnga naŋ kwaɗay. I ya Bumbulvuŋ Buymisemuŋ maɓi.

²⁸A sa lumam mi nga taŋ, i ya vuna si. Kum anta sa vulaka taŋ li da taŋ asi ruwuy Israyele ta, li taŋ i ya vuna si.

²⁹Gwat ngi migam ngi mikuli malla ginew ngi mikuli vur mungra ati mikuli ngi ɗiya ɓi na, masa zumaka i taŋ. Gwat mingizla ngi ga dudok da Bumbulvuŋ asi ruwuy Israyel gar na, a sa ndiram da taŋ.

³⁰Micikiɗeffe ngi gwat ngi migam kumoy ati gwat kum mavulikiy taŋ avu gwat kumoy gar na, i ngi masayay. Hapa kum mimezle ngi gi maɗaf ngi gwat ngi zum kumoyo vulaka da masayay, ɓa i sa ɗuwulukum mi ar hay kumo.

³¹Gwat misãmi mumuc le ti muc, malla gwatay mijaka le ti ji gar na, masayay a zumaka ta, ko i ɗiyuw malla gwat misãmi.»