Read South Giziga EZK 45 Bible Online

EZK 45 - South Giziga bible

EZK 45

¹«Ti kum masa wuɗkaka hirwuyo na, kisa wam vu ti li weˀ da Bumbulvuŋ. A sa ndir i li mipal , misla avu hirwuy. Jek naŋ: kilometir kuruˀ nga cuw ti reta, yo sliprik naŋ: kilometir zlum. Li nah a sa ndir asi ruwuy naŋ, ko a maka gar na, i li mipal.

²A hur li nah vuna, li ngi hay da Bumbulvuŋ a sa ndir ara, giluw naŋ ti ka ti ka gar na, metir skat skat cuw ti kukur zlum, skat skat cuw ti kukur zlum, yo gun gun ciki naŋ gar ma na, li a sa ndir firndiw ngi metir kukur cuw nga zlum.

³Angi li kum mislaka, jek naŋ kilometir kuruˀ nga cuw ti reta, yo sliprik naŋ, kilometir zlum tuwa na, hay ngi Bumbulvuŋ, li mipal wãˀa, a sa ndir araŋ.

⁴Li mipal nah mislaka avu hirwuy na, a sa ndir da masayay magam slra ar hay ngi Bumbulvuŋ, da mizli masoko nga mbuŋ ɗu, ya Bumbulvuŋ, ɓa ngi giy mezegwele. Naŋ kine, masayay a sa lumam li cifi ti hay taŋhay anga waɗ hay da Bumbulvuŋ.

⁵Li mekelem pal ma, jek naŋ, kilometir kuruˀ nga cuw ti reta, yo sliprik naŋ, kilometir zlum, a sa ndir da Levihey magam slra ar hay ɗu. A sa pam walahay da taŋ anga.

⁶Ɓaˀa ciki giluw ngi hay ngi Bumbulvuŋ nah vuna ma na, kisa vulaka li da Israyeley gar kanah ya, li ngi kilometir zlum tir sliprik naŋ, yo kilometir kuruˀ nga cuw ti reta tir jek naŋ.

⁷A sa vulam li da buyo avu li misi a ciki hay ɗu ti ka ti ka gar, yo misi avu walahaya ti ka ti ka gar, weˀe avu jek ngi hay ɗu waɗ weˀe avu jek ngi walahaya, kini ngir ti vu mubuliy, yo kini ngir tisi pas ngi mipriki, zle ar maakway muzlo zle a mubuliy, hã ar maakway mira kiɗo mi asi pas ngi mipriki.

⁸Nah na, a sa ndir i li ngi buy asi ruwuy Israyele. Kanah so na, naɓa buyoy anta sa guzuvuraka mizli ɗuwoyo mata. A sa vulam li da Israyeleye, da sukwi ngi mburo, da sukwi ngi mburo.

⁹Ya Bumbulvuŋ Buymisemuŋ i ɓi na: «Kum buy Israyeley, kayya ɓi kum a mbiy kwacay le muduba! Pulaka gi moˀore ati hila gwat ngi mizli ti gidaŋ na, gam gwat mikaslsla ati gwat mijeŋŋe, ki tiɓaka gwat ngi mizli ɗuwoyo mata. I ya Bumbulvuŋ Buymisemuŋ maɓi!

¹⁰Zuɓam ngi wi gwata i kilo mijeŋŋe, agwada mijeŋŋe, [4]. Yo zuŋ skiɗ [5] mijeŋŋe ngi wi gwat mikilere.

¹¹Anja agwada ati zuŋ skiɗe, hur taŋ i misi purla. Anja agwada a gi i mukuruˀ ngi daram, [6]. Yo zuŋ skiɗe kwana a gi i mukuruˀ ngi daram. Daram purla na, naɓa a wi agwada kuruˀ, malla zuŋ skiɗ ngi wi gwat mikilere kuruˀu.

¹²Ngi hiɗika gwata kwana: suloy bara purla na, a sa gi i suloy kukur cuw, suloy kukur merkeɗ na, a sa gi i min purla [7].

¹³Kum masa zuɓam ar gwat ngi migam kumoy ngi vul ngi mikuli na, anihĩ: alkamari kumo, angi agwada kukur merkeɗ na, kisa zuɓam anga agwada purla, yo daw giziŋ kumo, angi agwada kukur merkeɗ kwana, kisa zuɓam agwada purla.

¹⁴Ɓi ɓi micica vur mal na, kisa waka mala ti zuŋ skiɗ, mukuruˀ ngi daram purla malla ngi kor purla tuwaŋ.

¹⁵Angi gezleŋ ngi tumuŋ malla aw misi ara skat skat cuw a Israyel gar na, a jam purla ngi vul ngi mikuli, mikuli ngi zlum ti zlum, waɗ mikuli ngi jumoˀaya, ɓa ngi gi mezegwel ngi vula jiviɗ ngi pula mungra ngi mizli. I ya Bumbulvuŋ, Buymisemuŋ maɓi.

¹⁶Mizli ngi si ruwuy gar a sa vulaka gwat taŋ da buy Israyel.

¹⁷Ti di zuɓa mulak vur Bumbulvuŋ, ti kiya muslo le, tapas sabatay, ti hin ngi muguzlum ngi Israyeley gar na, i buy masa vula gwat ngi gi mikuli ngi zlum ti zlum ati mikuli ti gwat ngi migamay waɗ pusla gwat ti puslo. Mikuli ngi pula mungra ati mikuli ngi zlum ti zlum waɗ mikuli ngi jumoˀay ngi gi mezegwel ngi vula jiviɗ ngi pula mungra ngi Israyeley gar na, masa ga i naŋ vuna ma.

¹⁸Ya Bumbulvuŋ Buymisemuŋ i ɓi na: hin mudumbuŋ ngi kiya mudumbuŋ naŋ na, kisa jam gusoŋ manja hereweɗ ava, jo kisa gam di mikuli ngi zuɓa dili ngir hay ɗu.

¹⁹Masay a sa wuɗ pumbus ngi ginew migam di mikuli ngi pula mungra tuwa, a sa ga avu dum ngi mivay ngi miviŋ ngi hay ɗuwoyo angi zlirɗiyey mumufaɗ misi sar ngi li gi mikulihey ara, waɗ avu dum ngi mivay ngi miviŋ ngi wazlaray ngi huroˀo.

²⁰Waɗ ar hin tarnaˀ ngi kiya nah vuna ma na, vur mbur migi mungra tir manja sin naŋ malla tir naŋ muwuɗ ta nna, kisa gaka kanah ma.

²¹Hin mukuruˀ nga mufaɗ ngi kiya mudumbuŋ, kisa gam di muguzlum Pak, i muguzlum ngi hin tarnaˀ, a zumam di ɗaf manja is araŋ.

²²Tapasa, buy a sa ji gusoŋ, a gi di mikuli ngi pula mungra ngi hirnga naŋ ati ngi mizli Israyeley gar.

²³Angi hin mitarnaˀhay ngi muguzlum nah na, buy a sa gi mikuli ngi zlum ti zlum da Bumbulvuŋ ani: vur hin gar na, gusoŋ tarnaˀ waɗ zlengerek tarnaˀ manja hereweɗ avu taŋ, waɗ mikuli ngi pula mungra, bazuway purla vur hin gar.

²⁴Vur gusoŋ purla, yo vur zlengerek purla gar na, a sa vul hapa asi taŋ agwada agwada, waɗ mal litir merkeɗ merkeɗe.

²⁵Angi hin mukuruˀ nga zlum naŋ ngi kiya mitarnaˀ naŋ, ti hin ngi muguzlumo, a sa ga kanah ma, hã hin tarnaˀ. Mikuli ngi pula mungra i misi purla, mikuli ngi zlum ti zlum i misi purla, mikuli ti gwat ngi migamay i misi purla waɗ mal ngi vulo i misi purla.