Read South Giziga EZK 47 Bible Online

EZK 47 - South Giziga bible

EZK 47

¹Mbur tuwa aru ti ya tir li ci ng'ar hay ngi Bumbulvuŋ, keɗ na, yam ara bo vilvil tisi li ɗuva sar a miviŋ ngi haya, kini tisi pas ngi miprik naŋ, asi mbuŋ ngi haya, naŋ kini tisi pas ngi mipriki. Joˀ yam tuwa a pi sar ng'asi virzi ngi haya, tir vay hazum, vay ruwuy ngi li gi mikuli.

²A bi ti ya tir mizlingre vay muŋ. Akẽh a gun ti ya ti vra gun gun, hã avu mizlingre ngi mamay mupulaˀ hiri ng'asi pas ngi mipriki, keɗ ma na, yam ara ɓul tir vay hazumo.

³Ti mbur tuwa mibi kini ngir tisi pas ngi miprik, ti zeweɗ kaw a haŋ na, a wa weˀ weˀ na, metir skat skat zlum, a tuwuɗ ti ya yama, yama naŋ ti ya weˀ avu hiri sar.

⁴A wa weˀ weˀ, metir skat skat zlum ma, a tuwuɗ ti ya yama, yama naŋ ti ya weˀ a popurok. Akẽh na, a wa weˀ weˀ ava ma, metir skat skat zlum, a tuwuɗ ti ya yama, yama naŋ ti ya weˀ ti virzi.

⁵A wa weˀ weˀ ma na, metir skat skat zlum ma ni, yam tuwa i mizaw muduba, i tuwuɗa gu mata, asi yama naŋ jileŋ, sey ngi ki ti ki. I mizaw ngi tuwuɗ ta.

⁶A ɓiy na: «Ka mburu, ki pura le takwa?» Aru ti ya, a mo ti ya nga mi mizawa.

⁷Naŋ mumo ti ya na, keɗ na, widisey ngriɗ a ˀaydidikeye, ti ka ti ka cuw taŋ.

⁸A ɓiy na: «Yam misenna a ɓul kini ng'asi pas ngi mipriki, ara pi sar ng'ar sozo ngi mizaw Zurdeŋ, ɓa ara ci ng'ar mubuliye. Naŋ mici le ar mubuliy na, naɓa a tiri le i yam mezle.

⁹Dar akẽh na, li misi mizaw mici le ng'ara gar na, gwat misãmihey miwenewene ngi raˀa gar, a sa ndiram titiri. Kilifey a sa jam haɗa, asi yam nah a ndil sesẽŋ ar li ngi yam mezle. Ar li naŋ mapi ng'ara gar na, ara vula siifa da gwat ngi raˀahaya.

¹⁰Akẽh na, miji kilifey a sa cicam a mi mizawa, zle a En-Gedi, hã a En-Eg layim ɓa ngi sufa zuva taŋhay. Sukwi ngi kilif a sa ji haɗi kaɓa ar mubuliy.

¹¹Amma yam madiɗahay, muyuŋ misla taŋ le ati yam mijileŋ jileŋ tahaya, a sa ndiram i yam mezlehey ta, a sa pulaka taŋ ngi mandaŋ.

¹²Sukwi ngi widis ngi zumoy a sa gilam a mi mizawa, a ˀaydidikeye, ti ka ti ka cuw taŋ. Kalaf taŋhay anta sa ɓutom ɓut le ta, yo yi taŋhay kwana anta sa kiɗam mi pas le ta. Vur kiya gar na, a sa yam, asi yam ngi mizawa, a bo tir hay ngi Bumbulvuŋ. Yi taŋhay a sa ndiram ar deɗe ngi ɗafa, yo kalaf taŋhaya kwana ar deɗe ngi slalaka.»

¹³Ya Bumbulvuŋ Buymisemuŋ i ɓi na: «Kum masa wuɗkaka hirwuy da sukwi mukuruˀ nga cuw ngi Israyel na, maakway nah ani: Zozefe, a sa lum nga naŋ, li taˀ taˀ cuw.

¹⁴Ki sa wuɗkaka li rak rak, mbur gar ti nga naŋ ti nga naŋ, asi i hudum le haŋ paɗ a muŋ ngi vula da cine kumoyo. Hirwuy hana a sa ndir i mi ngi kum.

¹⁵Tir vay muŋ, maakway ngi ruwuyo, a sa bi ani: a zli a mubuliy Mediterane, sipeˀe buwal macuh nga Hetloŋ, aru nga Lebohamat, hã nga Sedat.

¹⁶Yo a bi tir walahay Berota ati Sebrayim misi ar hirwuy Damas ati hirwuy Hamat, yo tir walahay Hasertikoŋ, migweˀ avu hirwuy Horaŋ.

¹⁷Waɗ ma na, maakway a bi baɗ a mubuliye, hã nga Hasarenaŋ, a tika hirwuy Damasa tak ti muŋ naŋ waɗ hirwuy Hamata. Hana i maakway vay muŋ.

¹⁸Tisi pas ngi miprike, kisa waka maakwaya a bi tir wala ngi walahay Damas ati Horaŋ, tir wala ngi hirwuy Galaˀat ati hirwuy Israyel. Mizaw Zurdeŋ a sa ndir i maakway ɓaˀa ar wala, hã a mubuliy mumuca. Hana i maakway vay si pas ngi mipriki.

¹⁹Tir vay ˀayzaw ti ruwuyo, maakway a sa zli zle a Tamar, hã a miyam Meriba, a Kades, bal ti mizaw Ezipte, kini ngir ti vu mubuliy Mediterane. Hana i maakway vay ˀayzaw kini ti ruwuy.

²⁰Maakway tir vay si pas ngi pastaˀa, a zli ti mubuliy Mediterane, zle ar maakway vay ruwuyo hã taˀ hiri ar Lebohamat tir vay muŋ. Hana i maakway vay si pas ngi Pastaˀa.

²¹Ki sa wuɗkaka hirwuyo ar wala kum sukwi Israyel mukuruˀ nga cuwo.

²²Ki sa wuɗkaka hirwuy ar wala kumo ti ceregezleŋ, kum ati mizli mulak mucufa ngi wuzla kumoy, miyam ziri mizilehey le a wuzla kumo. Ki sa puraka taŋ a wuzla kumo kaɓa zuŋ ngi hay a wuzla Israyeleye. A sa lumam hirwuyo jom ati kumo ti gi ceregezleŋ a wuzla sukwi Israyeleye.

²³Mbur mulaka, kisa vulakaŋ li da naŋ angi sukwi naŋ misi anga na. I ya Bumbulvuŋ, Buymisemuŋ maɓi.»