Read South Giziga EZK 5 Bible Online

EZK 5 - South Giziga bible

EZK 5

¹Ka mburu, cin, zuɓ maslalam mazum raɓ raɓa, gi di slrakaɓa sliwiɗ hamac, hija hirnga ati mazlamay ɗike. A dirba nah, zuɓ kilo, wa ngwic ɗik ka mihija avra tuwa, wunka taˀ taˀ mbeˀ mbeˀ.

²Da hin ngi ndaha hirnga ngi walahaya mikiɗ mi le na, ngwic ɗik tuwa, wunka taˀ taˀ makir, zuɓ purla, ki wura a wuzla walahaya. Mucuw naŋ, ki kiɗa ti maslalam, gun gun walahaya. Yo mimakir taŋ, ki hira har har da himiɗi, joˀ ya, i sa sipa taŋ ti maslalam.

³Amma so na, kisa hil njilem kini, waɗ ki ɗumo ɗum ar zana ɗiki.

⁴Ki sa wuɗ mekelem ma, ki pa ar vu, ki wuraŋ. Vu a sa bawa, a wura Israyeleye gar.

⁵Ya Bumbulvuŋ, Buymisemuŋ i ɓi na: «Puraka, Zeruzaleme! I ɗuvaŋ a wuzla sukwi mekelemeye, hirwuyoy gun hirnga naŋ.

⁶Amma ɓi ya mujuwa taŋ a mevel ɗu na, Zeruzalem a slikiɗ ɓi vurˀe, fineˀ sukwi mekelemeye, yo ɓimujuwa ɗuwoyo, a slikiɗ ɓi vurˀe fineˀ hirwuy mugun hirnga naŋhay vuna jak ma. Asi ɓi ya mujuwa taŋ a mevele, a zliɗaka taŋ le avra, a sipaka jiviɗe kaɓa ɓimujuwa ɗu mawuɗo ta.

⁷Vurˀe, ya Bumbulvuŋ, Buymisemuŋ i ɓi na: Asi cin ta kum mifineˀ ngi mizli mugun hirnga kum na, ki sipaka jiviɗe ka ɓimujuwa ɗu mawuɗo ta, gwat ya mujuwa taŋ a mevel na, ki gaka taŋ ta. Ko ki gam gwat kaɓa sirik ngi sukwi ngi mizli mugun hirnga kum vuna ta ma.

⁸Vurˀe, ya Bumbulvuŋ, Buymisemuŋ i ɓi na: Ya kwana, i so nga mbuɗuw hirnga da ka walahay Zeruzalem. I ga kiita ɗu a wuzla walahay ɗike, daˀ a mihiri ngi sukwi ngi mizli.

⁹I guw gwat ya miga ɗaˀ ta ngi mbuɗuw hirnga, asi gi gwat malambaˀ ɗikey na. I gwat misi y'anta sa ga mata ndiɗaˀ wãˀ.

¹⁰Naŋ kine, cine ngi ziri a sa humbuɗaka ziri ngir walahaya, yo ziri kwana, a sa humbuɗaka cine taŋhaya. Kiita ɗu mujuw na, i sa mbuɗuw hirnga, yo gwat masa ndiruw gar na, i sa zliɗa hirnga taŋ lambaˀa.

¹¹Vurˀe, kaɓa ya misi ti siifa gisiŋ na, i ɓukum: kum mihiryaka hay ɗu ti gwat ya mahirsa taŋ ati gi gwat malambaˀ kumoy mukuyta wãˀ na, yi sa fuca walahaya fec fec leɗeɗ, y'anta sa pur mbur kuy loŋ a mihiri ɗu ta, y'anta sa pur ircece ko neˀ ta. I ya Bumbulvuŋ, Buymisemuŋ maɓi.

¹²Ar walahay ɗike, mizli micah mudumbuŋhoyo, i sa ngizla taŋ ti jiji matiɓi vu malla ti may, mucuw naŋ, i sa kiɗa taŋ ti maslalam gun walahay ɗiki, yo mimakir taŋ, yi sa zliɗa hirnga taŋ lambaˀ da himiɗ, i sa muɗ maslalam kwak waɗ ya ɓaˀ asi taŋ.

¹³I sa ru ti mevel fõh fõh, hã ar kiɗa mi naŋ, i sa kiɗa may ngi himaˀ ɗu ar taŋ, yo i sa pula cuwal ɗu. Kanah na, a sa sinaka, yi Bumbulvuŋ, ya miɓi na, asi gi teŋteŋ taŋ ta na, i ɓusa ɓi nah gu ta, hã i ndil di ar kiɗa mi ngi himaˀ ɗu angi taŋ.

¹⁴I sa tiri ti ka diŋ waɗ gwat ngi mesem a wuzla sukwi mugun hirnga ɗik na, a mihiri ngi mizli macohom a jiviɗ gar.

¹⁵Ti ya masa guw kiita ɗu ngi mbuɗuw hirnga ti mevel, ti himaˀ fõh fõh waɗ ti mbuɗuw hirnga haɗa kuyta wãˀ na, kisa tiri avu sukwi mugun hirnga ɗikeye, ki gwat ngi mesem, gwat ngi singir muwãˀ naŋ, gwat ngi dubuna ɓi ati ngi zluwun. I ya Bumbulvuŋ maɓi.

¹⁶Ti ya masa slino may malambaˀ ng'ar taŋ kaɓa mamulam luvutu, yo ya masa kiɗa hilfa kum na, i sa ga ɓa may a gi haɗa ti vendeke, yo i sa susuyumo ɗaf kumoy kum muwam taŋ vu na.

¹⁷I sa slin ti may ati gwat ngi ɓuh majam vuhoy, a sa jukum ziri, ki ndiram ɗoɗok ɗoɗok kine. Jiji mitiɓi vu ati vurum a sa gi asi ruwuy kumo, i sa ga ɓa mizli a sa kuɗukum ti maslalam. I ya Bumbulvuŋ maɓi.»