Read South Giziga EZK 8 Bible Online

EZK 8 - South Giziga bible

EZK 8

¹A dirba ji mizli ng'ar beke, hin muzlum naŋ, ngi kiya mimerkeɗ naŋ, ngi vi mimerkeɗ naŋ na, i ro a hay ɗu, waɗ mizli micawwa ngi Zudahay joˀ a mbuŋ ɗu na, Bumbulvuŋ, Buymisemuŋ a jiy kaw.

²I pur hiri, keɗ na, gwat kaɓa mbur. Zle avu li misi kaɓa li juwa gwat ngi duba naŋ, waɗ nga ruwuyo i vu. Yo zle avu li juwa gwat ngi duba naŋ, waɗ nga muŋ kwana, sukwi ngi wucuɗ ngi gwat, kaɓa wucuɗ ngi ɓiri jiriy jiriy.

³A tilo gwat kaɓa haŋ til ng'avi ya, waɗ a jiy kaw avu ngwic ngi hirnga. Akẽh na, ˀUf ngi Bumbulvuŋ a zuɓiy faw nga makapal muŋ, i pur gwat ngi Bumbulvuŋhoy ti kleŋ. Aru ti ya nga Zeruzalem, a mizlingre ngi huroˀo, misi hiri pulaˀ tir vay muŋ, ar li kuli ngi suloŋ, maslikiɗ suloŋ na.

⁴Dudok ngi Buymisemuŋ ngi Israyel ada angi li nah vuna, a bam vu ati gwat, ya mupura taŋ ar sozo zleˀe tuwa.

⁵Buymisemuŋ a ɓiy na: «Ka mburu, zuɓa hiri, pur kini tir vay muŋ so.» Yi zuɓa hiri paɗ, keɗ na, gwatay anihĩ: a mizlingre, tir vay muŋ naŋ na, li gi mikuli anga, waɗ kuli ngi suloŋ nah tuwa, naŋ da a jiviɗe.

⁶A ɓiy ma: «Ka mburu, k'ada pura gwat mizli magaka na ya? Gwat madiɗa mukuy tahay wãˀ, Israyeley magaka taŋ aka, ɓa i kirih kileŋ avu hay ɗu na, k'ada pura ya? Ki sa pur gwat makelem madiɗa mukuy tahay wãˀ vuna ma.»

⁷Aru ti ya nga mizlingre ngi ci nga wazlaray ngi hay ngi Buymisemuŋ, keɗ na, vigiɗ avu moholo.

⁸A ɓiy na: «Ka mburu, inga slina moholo.» I slina moholo mbilif na, mifiliw njoŋ ava.

⁹A ɓiy na: «Ci ɓa ki pura gwat mukuyta wãˀ mamuɗ didak, taŋ magaka aka na.»

¹⁰I ci kulaˀ, keɗ na, sukwi ngi gwat mukurmuɗ ti kwacay ati gwat misãmihey, gwat mihiris lihey, waɗ kuli Israyeley gar mutohoko taŋ doh doh avu mohol.

¹¹Mizli micawwa ngi Israyeley kukur tarnaˀ, waɗ Yazaniya, mangal ngi Safaŋ, deŋ a wuzla taŋ. Taŋ gar dedeŋ dedeŋ a mbuŋ kuli tayna, mbur gar ti gojogoɗ ngi zluma urdi avu haŋ avu haŋ, cunju ngi urdi ara ngis sẽwwe nga muŋ tir gojogoɗoy tuwa.

¹²Buymisemuŋ a ɓiy na: «Ka mburu, mizli micawwa ngi Israyeleye, gwat taŋ magaka angi luvuŋ, mbur gar angi viŋ ngi kuli naŋ na, k'ada pura taŋ ya? Asi a ɓam na: ‹Bumbulvuŋ anta pura ndra gu ta, a muɗ haŋ le avu hirwuyo.›»

¹³A ɓiy ma: «Gwat madiɗa mekelem mukuy tahay wãˀ, taŋ magaka na, kisa pur aruŋ ma.»

¹⁴Aru ti ya a mizlingre ngi ci ngi hay Bumbulvuŋ, misi pulaˀ hiri tir vay muŋ na, keɗ na, ngwasay joˀ a diga, ara tuwam Tamus. [1]

¹⁵A ɓiy: «Ka mburu, ki pura le takwa? Gwat madiɗa mekelem mukuy tahay fineˀ hanayna, kisa pur ma.»

¹⁶Aru ti ya a wazlaray hur hay ngi Bumbulvuŋ, keɗ a mizlingre ngi ci ngi hay Bumbulvuŋ, ar wala ngi jawleeru ati li gi mikuli na, mizli mizilehey, a gi gwat ngi kukur cuw nga zlum a diga, duba pulaˀ pulaˀ da hay ngi Bumbulvuŋ waɗ hiri pulaˀ pulaˀ ngir tisi si pas ngi miprik, ara huruk hurukam a mbuŋ pas, ng'asi pas ngi mipriki.

¹⁷A ɓiy ma: «Ka mburu, ki pura le ya? Gwat mukuyta wãˀ, mizli Zudahay magaka aka na, naŋ pireˀ kwa? A nahaka hirwuyo le ti gi moˀore, ani a zlaka slikiɗikiy mevel le si ma, ara bigaka gidaŋ taŋ ti mevel fõh fõh.

¹⁸Ya kwana, yi ga gwat ngi mevel ɗu ya so. Tˀanta sa gikiy ircece geˀ le ta, na zle y'anta pur ircece ta si. A sa hizigoko widi ngirzliŋŋe nga slimiɗ ɗu, amma y'anta sa cine taŋ di ta.»