Read South Giziga DAN 10 Bible Online

DAN 10 - South Giziga bible

DAN 10

¹Angi vi mimakir naŋ ngi Sirus buy Perse mazum buy na, Buymisemuŋ a njik ɓi le da Daniyel mazilaka Beltasara. Mingiɓi nah naŋ kaslsla, yo a ɓi di i ɓi ngi bonoy madiɗa. Daniyel a ja ɓi nah le, a sla wala nah ar naŋ mupura ti kleŋ.

²Ti hin nana, ya Daniyele, naɓa i gi le luuma makir ar li vagay.

³Y'anta zum gwat mezle ko neˀ ta, ko ˀuse, ko mbaazla, anta ci a balam ɗu ta. Y'anta gi urdi avu vu ta, hã luuma makir a kiɗ mi.

⁴Angi hin mukuruˀ nga mufaɗ ngi kiya mudumbuŋ na, naɓa ya deŋ a mi mubuliy madiɗa mazilaka Tigre.

⁵I zuɓa hirnga paɗɗa, keɗ na, mbur deŋ ti zana ngi gugumay mislirkeɗ, kanda ngi ɓiri tapasl tapasl pal naŋ wak a dingiriŋ.

⁶Vu naŋ, naŋ kaɓa ɗugur marva, mihiri naŋ kaɓa wucuɗ ngi vuŋ, hiri naŋ kaɓa dali i vu, haŋ ati sar naŋhaya, a wucuɗam kaɓa ɓiri gaza mingirzla kuleɗ kuleɗ, mingiɓi naŋ, kaɓa i zigiduw taˀ.

⁷I ya Daniyel pal ɗu, mupura gwat mubugo vu hana, mizli misi ati yahaya, a puraka ta. Amma didak a muɗa taŋ cek, a kilam nga ɗum.

⁸Yi ndir pal ɗu ar li pura gwat madiɗa mubugo vu na. Gidaŋ anta avu ya mata wãˀ. Kuturkuy ngi vu ɗu a mbiɗi, ko i lum gidaŋ neˀ mata.

⁹I ra cine ˀay naŋ maɓi. Da ya mira cine ˀay ngi mingiɓi naŋ na, i ɓurusl ɓurusl, ya durus a ruwuy.

¹⁰Akẽh na, haŋ ngi mbur a sa wusiy, a slikiɗiy, a puliy dilak ti miliwis, haŋ jah jah da ruwuy, i ra jijik.

¹¹Dar mbur tuwa a ɓiy: ‹Daniyel, ka mbur Buymisemuŋ mihĩyuw haɗa, cici deŋ ar li ɗike, yo cine mingiɓi ya maɓuw di na, asi wurenna, a slinoko ya le ng'avi ka.» Ti naŋ maɓiy ɓi nah na, i slikiɗ deŋ, i wus jaɓ jaɓ.

¹²A ɓiy na: ‹Ki zluwun ta Daniyel, asi mingiɓi ɗik a ndil le sesẽŋ avu Buymisemuŋ, zle ti ka mija a mevel ɗike, ɓa ki sla wala ngi ɓi, yo ki hin hirnga a mbuŋ Buymisemuŋ na, ya muso na, vur ɓi nah.

¹³Yerima misi i modro ngi ruwuy Perse, a cici kaŋ kaŋ avu ya, hã hin kukur cuw ngaŋ kaˀa. Amma pura Misel, ngi wuzla modro mudumbuŋhoy, a so jiniy, joˀ yi sa ndir a ciki buy Perse.

¹⁴Yi so na, ɓa ngi ɓuw ɓi ngi gwat masa gi tumbuŋ avu mizli ɗikey, asi ar hin masa gam tayna na, gwat ngi pur ti kleŋ ada pal aruŋ.›

¹⁵Ti naŋ maɓiy kanah na, yi jika hirnga jik nga ruwuy, dar i taˀa mi.

¹⁶Amma mbur, kaɓa mburu, a sa wusiy avu mi, i wuna mi, i ra ɓi. I ɓa mbur mideŋ a ciki ɗu tuwa: «Kumani, gwat mubugo vu na, a muɗiy didak le haɗi, yo gidaŋ ɗu anta mata.

¹⁷Ya gawla ngi buyo, gidaŋ anta avu ya ta, yo musuwun a tiki le ma na, i ɓam ati kumani ɗu mbri mbrike?»

¹⁸Akẽh na, gwat mubam vu ati mbur titira tuwa, a wusiy ma, dar a vuliy gidaŋ.

¹⁹Joˀ a ɓiy: ‹Ki zluwun ta, ka mbur Buymisemuŋ mahĩyuw haɗa! Anja ki ndir zuy zuy. Tum vu! Cici gidaŋ gidaŋ!› Ti naŋ maɓiy kanah na, i lum gidaŋ, i ɓaŋ: ‹Ka ɓiy so kumani, asi ki vuliy gidaŋ le.›

²⁰Naŋ a ɓiy: ‹Ya muso ng'avi ka na vur gwat mike, ki si na le kwa? I wuɗ i mahiri ngi kiɗa vu ati yarma modro ngi Perse wurenna, amma ti ya mabi nga kiɗa vu na, pura yarma, modro ngi Grek ara sawa.

²¹Amma yi sa tiluw mi ti ɓi ngi gwat mutoho ar Ɗerewol ngi ɓi mikaslsla. Mbur masa jiniˀis asi ya anta, sey Misel yarma, modro kum na tewle.