Read South Giziga DAN 11 Bible Online

DAN 11 - South Giziga bible

DAN 11

¹Na ya, ar vi mudumbuŋ naŋ ngi Dariyus mbur Medi mazum buy na, i vulaŋ gidaŋ le, yo i jinaŋ le.

²Wurenna, i wuɗ i ɓuw ɓi mikaslsla so. Pura buyoy a sa boko makir a ruwuy Perse, amma mumufaɗ taŋ a sa cikil zlili haɗa wãˀ fineˀ nga taŋ gar. Da naŋ misa lum gidaŋ le ti zlili nah na tuwa so na, a sa slikiɗ ɓi avu zumabuy ngi ruwuy Greke.

³Amma buy migidaŋ a sa bo tir ruwuy Greke, a sa zuma buyo ka naŋ muwuɗu.

⁴Da naŋ misa cifi le kuy kuy ar buyo na, gidaŋ nga naŋ ngi zuma buyo a sa kiɗi, zumabuy naŋ a sa wuɗkaka asi gazlavay kuɗgulum gar. Anta i dideˀ naŋhay masa zumaka li naŋ ta, anta sa ndilaka gidaŋ nga naŋ miwi di mizli zleˀe na ta, asi zumabuy nga naŋ a sa kiɗi, anta sa mo ng'asi haŋ taŋ mata.

⁵Buy vay ruwuy a sa tiri gidaŋ, amma mbur pal a wuzla yarma naŋhaya a sa tiri gidaŋ fineˀ naŋ, yo a sa wi li mufuk fuk fineˀ nga naŋ.

⁶Vi neˀ a dirba nah, a sa jumom ˀay. Zuŋ ngi buy vay ruwuy a sa ɗuv zuŋ ngi buy vay muŋ ɓa ngi jumoˀaya. Amma ko zuŋ vuna, naŋ anta sa ndir gidaŋ gidaŋ ta, yo tizer naŋ, naŋ anta sa ndir ti siifa ta. Ti di nana, a sa vulakaŋ jom ati mizli musoko di vuna, jom ati mangal naŋ waɗ mijini ˀis naŋ.

⁷Mbur ngir tiser naŋ a sa bawa ar li naŋ. A ci ng'ar li muguno ti mohol ngi soje ngi buy vay muŋhoy, a zliram didak ati taŋ, a sa lum bugawla.

⁸Ko kuli taŋhay, foto ngi kuli taŋhay mipa ti ɓiri muluwusla, yo gwat mupuɗaw puɗaw ngi ɓiri bara ati ngi ɓiri tapasl tapasl, a sa hila taŋ nga Ezipte. A dirba nah, a sa cifi kileŋ avu buy vay muŋ ngi vi neˀe.

⁹Buy vay muŋ, a sa ci ng'ar zumabuy vay ruwuyo, a sa mi nga ruwuy naŋ a muŋ.

¹⁰Ziri naŋhay a sa juwam vu nga kiɗa vu: a sa kusom zigiduw taˀ taˀ mbeˀ mbeˀ. Pal a wuzla taŋ a sa bi nga kiɗa vu, a sa ndaham ati soje naŋhay, a tuwuɗaka maakwayakaɓa mekepel mazuɓ. Joˀ a sa moko nga ruwuy taŋ a muŋ, a ram ti kiɗa vu hã sesẽŋ ar li ngi mesene naŋhay, walahay muguno ti moholoy tuwa.

¹¹Buy vay ruwuyo a sa zuɓ himaˀ fõh fõh. A sa bi nga kiɗa vu ati buy vay muŋ. Buy vay muŋ a sa so ti zigiduw haɗi, amma zigiduw ngi mbuŋ taŋ na, a sa vulakaŋ di asi haŋ naŋ.

¹²Buy vay ruwuyo naŋ mulum bugawla ar zigiduw na, a huhum vu. A kiɗ sojehey durmuk mbeˀ mbeˀ, amma ko a lum bugawla vurˀe ta na si.

¹³Buy vay muŋ a sa mawa, a hil sojehey haɗa fineˀ mudumbuŋ. A zikam neˀ, gwat ngi vi njiraˀ a dirba nah na, a sa so ti sojehey hiɗim hiɗim, ti gwat mupuɗaway ngi gi vurum.

¹⁴Ti hin nana, mizli haɗa a sa slikiɗam hirkim ng'ar buy ngi ruwuyo. Ka Daniyele, mizli migidaŋ ɗikey, a sa zuɓam himaˀ, ɓa gwat ka mupura ti kleŋ tuwa, a gi kwana, amma ko a lumam bugawla vurˀe ta na si.

¹⁵Buy vay muŋ a sa sawa, a sa ɗiyi li miɗingir ngi tika hiri, a tiɓa walahay muguno ti moholo da naŋ. Soje vay ruwuyoy ati gaw ngi wuzla mizli naŋhaya, anta sa lumam gidaŋ gu mata.

¹⁶Mbur muso le ngi zlir didak ati naŋ na, a sa gi di kaɓa wuɗ naŋ. Mbur masa cici a mbuŋ naŋ gu ko pal anta. A sa cici deŋ a ruwuy mimezle haɗi, gwat ngi ngizla vu kaw a haŋ.

¹⁷A sa wuɗ so ti gidaŋ ngi zumabuy naŋ wãˀ, a saɗiyi ɓi ngi jumoˀay ati buy vay ruwuyo. A sa vulaŋ zuŋ naŋ ngi ngwasa, ɓa a zizaŋ. Amma gwat nah anta sa gi ta, anta sa ndilaŋ gu ta.

¹⁸Akẽh na, a sa mbiɗa hiri pulaˀ ngir tivi maturahay, a sa tiɓi haɗa asi taŋ. Amma buy pal a sa kiɗa mi ngi zi vu naŋ na, manja naŋ a mbiɗaŋ di.

¹⁹Dar a sa mbiɗi hiri ngir tivi walahay muguno ti moholoy misi angi hirwuy naŋ tehhe a muŋ. Amma a sa slir kããk, a diɗ, ko anta sa lumaka mata.

²⁰Mbur mekelem a sa cifi ar li naŋ, a sa slino ti mbur ɓa avagwat ng'ir li mupuɗaw puɗaw ngir zuma buyo, amma a sa kiɗaka vagay angi hin neˀkini si. Anta vur a ro ti mevel fõh fõh ta, vur vurum ta.

²¹Mbur mekelem mihiris le, a sa cifi ar li naŋ, ko anta sa puraka ka mbur ngi zumabuy ta. A sa cifi ar li muro setetete. A sa tiɓa hirwuyo ti gidiɓi.

²²Mizli matiɓaka hirwuy ti gidaŋ na, a sa ngizlam pay a mbuŋ naŋ, jom ati buy ngi mizli mujumom ˀay le.

²³A sa jumˀay ati buy nah tuwa, ɓa a tikin vu. A sa zli mizli ngi kiɗa vu, amma a sa lum bugawla ti mizli naŋhay mineˀ vuna.

²⁴Ti ruwuy muro setete na, naŋ a sa ru ng'ar li vay magi gwat, li buy miwi li miwaŋ, gwat cine ati dideˀ naŋhay migaka ɗaˀ ta na, naŋ a sa ga. Gwat mutuɓo taŋ ar vurum, naŋ muzumo hay ngi mizli waɗ gwat ngi slraˀahaya, a sa wuɗka taŋ da mizli naŋhay, a sa gi gidiɓi ngi zla kiɗa vu ati walahay muguno ti moholoy. Na so na, anta ngi zik haɗa ta.

²⁵A sa wa vu naŋ gidaŋ, yo a tum vu gu ngi kiɗa buy vay ruwuy misi sojehey haɗa na. Buy vay ruwuy a sa ru ng'ar vurumo ti sojehey sikinih, yo miwirwirey fineˀ gidaŋ, amma gar ti nah kwana, anta sa kiɗa gu ta na si, asi a gam gidiɓi le ar naŋ.

²⁶Naŋ kine, i mizli taŋ mazumam ar sikiɗ purla masa kiɗakaŋ vagaya, soje naŋhay a sa waham, mizli a sa micam haɗa.

²⁷Buy mucuwoy na, a sa zliram ar zuma gwat ar sikiɗ purla, taŋ muroko ti moˀore ndus ndus a kwacay tuwa, a sa gam slir tewle. Amma anta sa gi ta, asi hin ngi kiɗa mi na, sey a ndila hin nah.

²⁸Buy vay muŋ, a sa mi nga ruwuy naŋ ti zlili haɗa. Sukwi ngi Buymisemuŋ mujum ˀay ati taŋ, naŋ a muro ti wuluk malambaˀ ar taŋ tuwa na, a wuɗ a ga wãˀ muduba, a sa mi nga hirwuy naŋ a muŋ.

²⁹Da hin naŋ a ndilo le na, a sa so ngi kiɗa vu ati buy vay ruwuy, amma anta sa gi ar kiɗa mi naŋ, kaɓa ar zli virzi naŋ ta mbula.

³⁰Mizli ngi si pas ngi miprik a sa soko nga zlir dibiɗ ati naŋ, amma a sa gaŋ vagas. A sa zuɓ huma fõh fõh ng'ar sukwi Buymisemuŋ mujum ˀay ati taŋ tuwa ma.

³¹A sa slino mizli, a tiɓaka hirwuyo. A sa hiryaka hay ngi Buymisemuŋ muguno ti moholo. A sa tikaka mikuli misi ti hin gara, a gam gwat mukuy ta muwãˀ ngi ngizla vu.

³²Buy vuna ti haŋ naŋ, a sa tikina mizli ɓa a hizigaka Jumoˀay avra, amma sukwi ngi mizli misinaka Buymisemuŋ taŋ le na, a sa cicam gidaŋ gidaŋ ar gwat ngi gi taŋ.

³³Misi lesl ngi wuzla taŋhaya, a sa dubunam gwat da mizli haɗa, amma neˀ a dirba naŋ sina, a sa kiɗaka cah mekelemeye vagay vagay ti maslalam, ti vu, a jam ti ji ng'ar beke waɗ a vaka gwat ngi mekelemeye.

³⁴Taŋ mamicam kanah na, a sa lumam migir neˀkini si, amma mizli mekelemey haɗa a sa cam ng'asi taŋ ti kwacay cuw cuw.

³⁵A wuzla misi lesley na, mekelemey a sa micam, ɓa pumbus taŋ a bi ti malambaˀavra, a buna mungra, a pusluɗa taŋ ndazl ndazl hã avu kiɗa mi ngi hin, asi a sa ndilo sey angi hin naŋ.

³⁶Buy a sa gi kaɓa naŋ mawuɗo. A sa zluzluɓ, a njur njor njor fineˀ kulihey gar. A sa ɓi ɓi malamɓaˀ a hirnga Buymisemuŋ mufuna kuliheye. A sa lum bugawla, hã himaˀ ngi Buymisemuŋ a gi. Asi gwat Buymisemuŋ ɓi micica ɓi naŋ na, a sa gi muduba.

³⁷Buy anta sa cin mi da kuli ngi dideˀ naŋhay ko pal ta, ko anta sa cin mi da kuli ngwasay mawuɗam na ta, ko da kuli loŋ ta, a sa ga vu naŋ fineˀ gwat gar.

³⁸Naŋ jak na, a sa ɗuva hirnga da kuli majigina walahay muguno ti moholoyo, kuli dideˀ naŋhay misinaka zleˀe ta, a sa ɗuva taŋ hirnga ti ɓiri tapasl tapasl ati ɓiri bara, ɗugur mupuɗaw puɗaway ati gwat hirnga mekelemey.

³⁹Kuli mulakay a sa jinakaŋ, ɓa a sa zliram dibiɗ ati walahay muguno ti moholoyo. Mizli misa tiɓaka ɓi ngi kuli nah na le na, a sa naha taŋ ti dudoko. A sa cufa taŋ a hirnga mizli haɗa, yo a sa vula taŋ li ar deɗe ngi migir taŋ.

⁴⁰Ar kiɗa mi ngi nah na, buy vay ruwuy a sa zliram didak ati naŋ, amma buy vay muŋ a sa ru cir ng'ar naŋ ti mota ngi vurum naŋhay, ti pilis naŋhay waɗ ti palalam madiɗa naŋhay mikwesle kwesle na. A sa cam ɓuyoh ng'asi ruwuyoy gar, hã tuwɗeˀ maakwaya.

⁴¹A sa ci ng'asi ruwuy mimezlehey, mizli haɗa a sa ndilam. Amma Edomoy, Mohaˀapay ati modogom ngi Amoŋhoy a sa laham tisi haŋ naŋ.

⁴²A sa tuluma hirwuyoyo tilam tilam, ko Ezipte kwana, anta sa ndir ta.

⁴³A sa cifi madiɗa ngi zlili ngi Ezipte, ti ɓiri tapasl tapasl, ɓiri bara ati gwat hirnga mekelemey. Hirwuy Libi ati Etiyopi a sa ram ti seˀe.

⁴⁴Amma labara masa ndilo tisi pas ngi miprik ati tir vay muŋ na, a sa muɗaŋ didaka. A sa bo gur ti mevel, a ngizla zigiduwo sulih.

⁴⁵A sa nga guɗuk nga naŋhaya, ar wala ngi mubuliy ati muwã mipal , mimezle ngisi ruwuyo. Naŋ a sa muc manja mbur a jiniˀis aseˀe.›»