Read South Giziga DAN 12 Bible Online

DAN 12 - South Giziga bible

DAN 12

¹«Modro ngi Bumbulvuŋ a ɓiy na: ‹Ti hin tayna, Misel madiɗa ngi vurum ngi muŋhoyo naŋ macici zlak ar mizli ɗikey na, a sa bugo vu. A sa tiri i hin ngi muɗa didakay, zle ar zli virzi ngi ruwuy, hã dana, ko gwat ngi muɗa didak kanah, a gi ɗaˀ ta. Ti hin tayna, mizli ɗikey a sa laham, ko wa gar a wuzla taŋ, misi slimiɗ naŋ i mutoho le ar ɗerewol ngi siifa na, a sa lihi.

²Mizli misi ar li cifi ngi mizli mumucahay haɗa, a sa slikiɗam, cah mekelemeye ng'ar siifa ngi sete, cah numuŋhoyo kwana, ng'ar mesem muwãˀ naŋ, ng'ar bonoy mukuyta wãˀ ngi sete.

³Mizli misi lesley a sa wucuɗam kaɓa gwatay mawucuɗam ar birngiŋ a muŋ, mizli mitiram ti zigiduw taˀ ɓa a ndram teŋteŋ na, a sa wucuɗam ngi caˀa, kaɓa wurzlaŋ ngi muŋhoy.

⁴Naka, Daniyele, ndir ti mingiɓi hana yaŋ a mevel ɗiki, yo slirɓa ɗerewol hana sliraɓ hã avu kiɗa mi ngi hin. Mizli haɗa a sa slufaka, yo sin taŋ kwana a sa sik nga mbuŋ aya.»

⁵Ya Daniyele, i ra pur hiri, keɗ na, mizli mekelemey dedeŋ cuw, pal ti ˀay didik ngi mizawa, pal numuŋ kwana ti ˀay didik vay mekeleme ya.

⁶Mbur mideŋ a hirnga yam ngi mizaw, zana ngi gugumay mislirkeɗ ɓaˀ avu vu na, mbur pal a wuzla mucuwoy tuwa, a ɓaŋ: «Gwat ngi zuma hirnga hanayna vuna, hin ngi kiɗa mi taŋ a sa so ti vunaka?»

⁷Yi ra cine ˀay ngi mbur misi zana ngi gugumay mislirkeɗ, misi a hirnga yam ngi mizaw tuwa. A hila haŋ hazum ati haŋ gula hoc ng'a muŋ, a ɓi: «Hadam, ti slimiɗ ngi Buymisemuŋ mandir caˀkine ngi sete. Gwat hanayna, a sa zikam hã vi makir ti reta. Da a sa tikaka gidaŋ ngi mizli ngi Buymisemuŋhoyo le na, naɓa a sa kiɗam mi.»

⁸I cine cin cin na, ko i sla wala naŋ ta, i ɓi: «Kumani ɗu, gwat hanayna vuna, kiɗa mi naŋ i wanaka?»

⁹Naŋ a mbiɗiy di: «Aru ti zuy Daniyel ɗu, asi mingiɓi hana anja a ndir i ɓi miyaŋŋa, yo sliraɓ sliraɓ hã ar hin ngi kiɗa mi naŋ.

¹⁰A sa zuɓaka dili ngi zigiduw taˀ, a bunaka taŋ ndazl ndazl, yo a ndiram celelle baɗ tir bonoyoy. Misi moˀoreheye, a sa gam ti gi moˀore taŋ. Ko misi moˀore pal anta sa sla wala naŋ ta, amma misi lesleye, a sa slaka wala ngi gwatay macohomo.

¹¹Zle avu hin ngi mikuli vur hin gar masa kiɗ mi, hã tapas masa kaka malambaˀ mukuyta wãˀ ngi hirya gwata, ɓaˀ ar li gi mikuli na, naɓa hin a gi le durmuk ti skat skat cuw ti kukur ngoltir.

¹²Mbur masa kutuko hin nah, yo masa ndila hin durmuk ti skat skat makir ti kukur makir nga zlum na, naŋ ar mumul.

¹³Naka so na Daniyel, cici gidaŋ gidaŋ hã ar kiɗa mi naŋ. Ar hin ngi kiɗa mi naŋ na, kisa lum muska vu, yo kisa slikiɗ ngi tiɓa migir ɗike.»