Read South Giziga DAN 5 Bible Online

DAN 5 - South Giziga bible

DAN 5

¹Ngi pas numuŋ ada na, buy Baltazar a gi muguzlum madiɗa da mizli hirnga naŋhay durmuku. Naŋ vuna ara si mbaazla a wuzla taŋ ya.

²Ti naŋ masi mbaazla tuwa na, a ɓa mizli ɓa a sakaŋ ti gazlanga ngi ɓiri tapasl tapasl ati ngi ɓiri bara, cine naŋ Nabukodonozor mihilo taŋ ar hay ngi Bumbulvuŋ a Zeruzalem na. Buy ati mizli hirnga naŋhay waɗ mangasl naŋhay ati ngwas migi slra naŋhay a sa sam taŋ mbaazla.

³Dar a soko ti gazlanga ngi ɓiri tapasl tapasl mihiloko taŋ ar hay ngi Bumbumvuŋ a Zeruzalem tuwa. Joˀ buy ati mizli hirnga naŋhay waɗ mangasl naŋhay ati ngwas migi slra naŋhaya, a sam taŋ mbaazla.

⁴A saka mbaazla, a hunumaka kuli taŋhay mipa taŋ ti ɓiri tapasl tapasl, ti ɓiri bara, ti ɓiri gaza, ti ɓiri ho gar, ngi dum waɗ ngi ɗuguroyo.

⁵A haŋhaŋ vuna si na, muzuŋ haŋ ngi mbur a puro gurjik, naŋ gweˀ avu li ɗuva lampe. A ra tuh gwat avu dalam babara ngi mugum ngi buy. Ti Buy mapura haŋ matoho gwat tuwa na,

⁶a pusluɗaŋ mi ndararara, wuluk ara giraŋ, mitikinjaˀ wuɗak, yo poprokoyo kpar kpar.

⁷Dar buy a widi ti gidaŋ, a ɓi ɓa muɓula musuɗukoy, mupura kulihey ati mupura wurzlaŋhay a soko. A ɓa mizli misi sinmijileŋ ngi Babiloŋ tayna: «Ko wa gar muslufa gwat mutoho hana le, yo a njika mbiɗeˀvra naŋ le na, a sa kakaŋ zana hirnga, a sa luwakaŋ virzle ngi ɓiri tapasl tapasl asi ˀaya, yo naŋ vuna, a sa cifi madiɗa migi slra ar zuma buyo.»

⁸Misi sinmijileŋhey gar a soko, ko a slufaka gu ta, a ɓaka mbiɗeˀvra naŋ gu ta.

⁹Dar wuluk a gira buy Baltazara haɗi ma, a pusluɗaŋ mi ndararara, mizli hirnga naŋhaya, a roko lesl welele ya.

¹⁰Maˀay micina widi ngi buy ati ngi mizli hirnga ngi buyoy tuwa na, a ci ng'ar hay ngi muguzlumo. Joˀ a ɓi: «Aw kumani ɗu! Anja ki ndir ngi sete! Anja wuluk a guruw ta, yo anja a pusluɗuw mi ndarara ta.

¹¹Ar zumabuy ɗike, mbur ada, sin ngi kuli mezlehey ada ar naŋ. Ti hin ngi cine ɗik mazum buy na, i puraka na, a sla wala ngi ɓi kwaŋ kwaŋ, naŋ ti slesle, yo naŋ ti sinmijileŋ kaɓa ngi kuli mezlehey. Cine ɗik Nabukodonozor a cufaŋ i madiɗa ngi muɓula musuɗukoy, ngi mupura kulihey, ngi misi cucukoy waɗ ngi mizli mupura wurzlaŋhay. Cine ɗik buy miga na, naŋ kanah.

¹²Asi a puraka Daniyele na, a wuluk haɗa, a naŋ ti sin ngi gi gwata, a pura gwata kweŋ kweŋ ngi njika musuwunoy, a bo ti ɓi mumbuzahaya njoy, yo a ɗiya ɓi mutuwaˀa. Buy vuna, a caŋ slimiɗ mekelem, a zila Beltasar. Na ani wurenna, ngi zilo mbur Daniyel nah vuna, naŋ a sa njika mbiɗeˀvra ngi gwat mutoho hana.»

¹³Dar a soko ti Daniyele nga mbuŋ buyo. Buy a zla a ɓaŋ: «Daniyel ngi wuzla mizli mijoko taŋ ti ruwuy Zuda, cine ɗu, buy muso di ti Zuda na, i ka gisiŋ kwa?

¹⁴Yi cin, a ɓam sin ngi kuli mezleheye ada ar ka, yo mizli a puraka na, ki pur kaˀ haɗa, ki pur kweŋ kweŋ, yo ka ti sinmijileŋ haɗa ma.

¹⁵Wureˀ ani aka, a sikiy ti misi sinmijileŋhey ati muɓula musuɗukoy ɓa a slufaka gwat mutoho hana, waɗ a ɓikiy mbiɗeˀvra naŋ. Amma ko a ɓikiy di gu ta.

¹⁶Na yi cin na, ki ɓa mbiɗeˀvra ngi gwataya, yo ki ɗiya ɓi mutuwaˀhaya gu. Wurenna so na, gwat mutoho hana, da ki slufa le gu, ki ɓiy mbiɗeˀvra naŋ le gu na, a sa kukuw zana hirnga, a sa luwukuw virzle ngi ɓiri tapasl tapasl asi ˀaya, joˀ kisa cifi madiɗa migi slra ngi buy ar zumabuy ɗu.»

¹⁷Dar Daniyel a mbiɗa da buyo: «Gwat ngatara ɗikey na, anja a ndiram da ka vuna a muŋ, yo madiɗaka mavuliy di na, vula taŋ da mizli mekelemey! Amma, gwat mutoho, yi sa slufuw di buy, ɓa ki si na mbiɗeˀvra naŋ.

¹⁸Kumani! Buymisemuŋ mifineˀ gwat gara, a vula zumabuy, madiɗa, dudok waɗ buy le da cine ɗik Nabukodonozoro zleˀe.

¹⁹Vur naŋ muvulaŋ madiɗa tuwa na, mizli gar, sukwihey ati mizli maɓam mi miwal wal gar na, a zluwunam kirkir a mbuŋ naŋ, asi ko wa gar, da naŋ muwuɗ le na, a kiɗa vagay, ko wa gar, da naŋ muwuɗ le na, a pula ti siifa, ko wa gar, da naŋ muwuɗ le na, a gaŋ ɗongor, ko wa gar, da naŋ muwuɗ le na, a maŋ nga ruwuy.

²⁰Joˀ a huhum, hirnga naŋ a tiri gidaŋ haɗa. Dar a putukusokoŋ tir janga naŋ ngi buyo, a tiɓaka dudok naŋ.

²¹A ɓulakaŋ ti wuzla mizli avra, wuluk naŋ a tiri kaɓa wuluk ngi gwat misahmihey, a cifi ti hay naŋ ati zungu ngi ɓuhoy. A zum giziŋ kaɓa sla, yo a ndir yorororo ar wulngar. A gi kanah hã ti naŋ misa sina, Buymisemuŋ Mimadiɗa miwãˀa, i madiɗa ar zumabuy ngi mizli titirahay, yo mbur naŋ muwuɗ le gar na, a cifi di buyo.

²²Naka, mangal naŋ Baltazara, ki si na gwat tayna le gar ngbaŋ, ko ki hin hirnga ta na si.

²³Ki slikiɗ ngi zlira didak ati Buymuŋ, gazlanga ngir hay naŋ na, a hiloko taŋ nga mbuŋ ɗiki. Joˀ ka ati mizli hirnga ɗikey waɗ mangasl ɗikey, ati ngwas migi slra ɗikeye, kisam mbaazla ti taŋ. Ki hunum kuli mipa taŋ ti ɓiri bara, ti ɓiri tapasl tapasl, ti ɓiri gaza, ti ɓiri ho gar, miciɗa ngi dum, waɗ ngi ɗugur. Taŋ anta puram ta, a cinam ta, a sinam gwat ta. Amma Buymisemuŋ misi siifa ɗik asi haŋ naŋ, yo misi gwat ngi gi ɗikeye cek asi haŋ naŋ na, ki hunumaŋ ta jaka.

²⁴Dar Buymisemuŋ kwana, a slino haŋ misa toho gwat hana na.

²⁵Gwat mutohoko n'ani: MENE, MENE, TEKEL, U-PARSIŊ.

²⁶Mbiɗeˀvra naŋ: MENE, a mbiɗiavra ‹Muslufa.› Buymisemuŋ a sufa hin ngi zumabuy ɗike le, yo a tiɓa zuma buyo le avu ka.

²⁷TEKEL a mbiɗiavra ‹Miwa le ti kilo.› Ka i miwa le ti kilo, keɗ na, ki ndila ta.

²⁸PERES a mbiɗiavra ‹Muwuɗuka le.› Zuma buy ɗike, i muwuɗka le, a vulaka cah da Medihey, cah numuŋ kwana, da Persehey.»

²⁹Akẽh na, Baltazar a ɓa mizli, a kaka zana hirnga da Daniyele, a luwakaŋ virzle ngi ɓiri tapasl tapasl asi ˀaya, yo a ɓa taŋ ɓa a tilam mi ti ɓi ngi Daniyel masa cifi madiɗa migi slra ar zuma buyo.

³⁰Kalla ngi hiikuɗ naŋ vuna si na, a kiɗaka Baltazara Buy Babiloŋ vagay.