Read South Giziga DAN 7 Bible Online

DAN 7 - South Giziga bible

DAN 7

¹Ar vi mudumbuŋ naŋ ngi Baltazar, mazum buy a Babiloŋ na, Daniyel a ro tup ar li hin naŋ, musuwun a gaŋ, a pur gwat ti kleŋ. Dar a toho musuwun nah ti tuhu.

²Daniyel a zla a ɓi: «Ngi hiikuɗo, i pur gwat ti kleŋ. Himiɗ a so tisi diˀisey mufaɗ taŋ ng'ar mubuliy madiɗa.

³Gwat misahmi madiɗahay wal wal mufaɗ, a boko tir mubuliye.

⁴Mudumbuŋ naŋ kaɓa mobor, amma naŋ ti kirpasl ngi kurom. Ti ya mapura na, a mburcakaŋ kirpaslay avra. A slikiɗ ti ruwuyo, a cici deŋ ar sar kaɓa mbur, waɗ a vulakaŋ lesl ngi mbur.

⁵A dirba nah, i pur gwat misahmi mucuw naŋ, naŋ kaɓa luˀuf. A cifi jangaw tir vay purla, cakay makir ngik ngik avu sliŋ. Joˀ a ɓakaŋ: «Slikiɗi! Humbuɗ useˀe kuy kuy.»

⁶A dirba nah, i ra pur hiri ma ni, keɗ na, mekelem deŋ ma. A bam vu ati kokoyta, kirpasl ngi ɗiyuw kaˀ kaˀ mufaɗ a duba, hirnga mufaɗ. A vulakaŋ buy madiɗa miwãˀ.

⁷A dirba naŋ ma na, i ro pur gwat ti kleŋ ngi hiikuɗo na si, keɗ na, gwat misahmi mumufaɗ naŋ deŋ. A gi zluwun, a muɗ didaka, naŋ gidaŋ haɗa. Naŋ ti sliŋ ngi ɓirihey ngoryoŋ ngoryoŋ. A ra zum gwat, ara nguwa gwata, a gudubura is naŋ asi sar. Naŋ wal avu gwat misahmi mudumbuŋhoyo, yo naŋ ti durumoy kuruˀu.

⁸I ra singila durum naŋhaya zleˀe, keɗ na, durum mekelem meciɗek, ara bo a wuzla taŋ. A wuzla durum mudumbuŋhoy mimakire, a muɗaka taŋ a mbuŋ naŋ. Durum meciɗek tuwa, hiri ava kaɓa hiri ngi mbur waɗ mi maɓi ɓi ngi huhumo vu.

⁹I ra pur hiri aruŋ, keɗ na, a ɗuvam janga ngi buyoy, dar mbur midigila a cifi ara. Zana naŋ babara ndazl kaɓa yam, ngwic hirnga naŋ, kaɓa ngwic ngi tumuŋ mubuna le, li cifi naŋ ngi buyo, i irne vu, sar ngi janga nah, a wucuɗ kaɓa vu mihilɓiɓ.

¹⁰Mizaw ngi vu ara ɓulo ti mbuŋ naŋ kaɓa yam maɓul. Mizli milyoŋ mbeˀ mbeˀ, ara gakaŋ slra, milyoŋ kukur mbeˀ mbeˀ, deŋ deŋ a mbuŋ naŋ. Migi kiitahay a cifam jojoˀ, dar mizli a wunaka ɗerewoloyo.

¹¹Yi pur hiri ava ni, asi durum meciɗek tuwa, ara gi mi haɗa, ara ɓi ɓi ngi huhumo vu. Ti ya mapur hiri tuwa, keɗ na, a kiɗaka gwat misahmi mumufaɗ naŋ tuwa le vagay, a hizigaka vagay naŋ ng'ar vu, dar a zlizlir.

¹²A tiɓaka zumabuy ngi gwat misahmi numuŋhoyo. Joˀ a slaka taŋ hin ngi siifa taŋ nga mbuŋ, ar hin naŋ kaslsla.

¹³I ra pur gwat ti kleŋ ngi duvuɗo ni, keɗ na, gwat mibam vu ati Mangal ngi Mbur, ara so, gazlavay gun hirnga naŋ. A ndilo sesẽŋ avu mbur midigila, dar a kirohoko di nga mbuŋ naŋ.

¹⁴A vulakaŋ zumabuy, dudok ati li zumabuy. Mizli ngi ruwuyoy, sukwihey ati mi miwal wal gar, ara gam gawla naŋ. Gidaŋ naŋ ngi buyo, i gidaŋ ngi caˀ, masa kiɗ mi ta. Zuma buy naŋ anta sa kiɗ ta ndiɗaˀ.

¹⁵Ya Daniyele, didak a miɗiy hã sesẽŋ avu membezleŋ ngi vu ɗu, yo gwat ya mupura ti kleŋ tuwa, ɓi naŋ ara giriy a mevele haɗi.

¹⁶Yi girjoho ng'avu mbur pal a wuzla mizli midedeŋ akẽh na, i cufuɗa mbiɗeˀvra ngi gwat hana vuna. Naŋ a ɓiy di, a bigiy mbiɗeˀvra naŋ ma, a ɓiy:

¹⁷«Gwat mimadiɗa misahmihey mumufaɗ na, i buy madiɗahay mufaɗ masa boko ngi zumabuy a ruwuy.

¹⁸Amma mizli ngi Bumbulvuŋ Buymisemuŋ Mimadiɗa wãˀ, a sa lumaka zuma buyo, a sa ndir inga taŋ ngi wãˀ ngi sete.»

¹⁹A dirba naŋ, i wuɗ sey i sla wala ngi gwat misahmi mumufaɗ naŋ na. Naŋ wal avu numuŋhoyo gar, naŋ gidaŋ haɗa. Naŋ ti sliŋ ngi ɓiri ho gar, waɗ zlenek ngi ɓiri gaza. A ra zum gwata, a nguwa ngaw ngaw waɗ a gudubura is naŋ asi sar.

²⁰I cufuɗaŋ vur durum mukuruˀ misi a hirnga gwat misahmi, waɗ vur durum meciɗek misa bawa, dar mimakir numuŋhoy a ndilam na. Durum nah na naŋ ti hirihey, yo naŋ ti mi maɓi ɓi ngi huhumo vu. A biga vu naŋ fineˀ numuŋhoyo gar.

²¹I ra pur hiri ni, keɗ na, durum tuwa, ara kiɗam vu ati mizli muvuku vu taŋ , a lum bugawla ar taŋ.

²²Hã mbur midigila tuwa, a sawa, a ga kiita mijeŋŋe da mizli ngi Buymisemuŋ Mimadiɗa wãˀa. Hin mindilo so na, mizli ngi Buymisemuŋhoy a tiɓaka zuma buyo.

²³Joˀ mbur tuwa a ɓiy: «Gwat misahmi mumufaɗ naŋ na, i zumabuy mumufaɗ naŋ masa gi asi ruwuy. A sa gi naŋ wal avu zumabuy numuŋhoyo cek. A sa zuma hirwuyo cek cek, a sa gudubura li asi sar waɗ a wuɗuka meɗ meɗe.

²⁴Durum mukuruˀhoyo, ar zumabuy nana, buyoy kuruˀ a sa boko asi cala asi cala. Mekelem a sa bo a dirba taŋ ma. Naŋ wal avu mudumbuŋhoyo, a sa kiɗ buyoy makir.

²⁵A sa ɓi ɓi malambaˀ ar Buymisemuŋ Mimadiɗa wãˀa, yo a sa guzuvura mizli ngi Buymisemuŋ Mimadiɗa. A sa wuɗ ɓa a mbiɗa hin ngi muguzlumoy ati ɓimujuwahaya. Mizli tayna a sa ndiram asi haŋ naŋ ngi vi makir ti reta.

²⁶A dirba nah, a sa cifam ngi gi kiita, a sa tikakaŋ ngi zuma buyo, ɓa a susuyumokoŋ, a zizakaŋ ngi wãˀ.

²⁷Na zumabuy, gi madiɗa muwãˀ waɗ micawwa ar zumabuy naŋ gar misi asi ruwuy kurzluˀ gara, a vulaka le da mizli ngi Buymisemuŋ Mimadiɗa wãˀa. Zuma buy naŋ, i zumabuy mandir ngi sete, gidaŋ ngi zuma buyoy, a sa gam gawla naŋ, yo a sa cinakaŋ mi.»

²⁸Slufa ɓi ngi kleŋ ɗu a kiɗ mi ar hana. Ya Daniyele, wuluk ara giriy haɗa. A pusluɗiy vu ndararara, i ro di a mevele.