Read South Giziga DAN 8 Bible Online

DAN 8 - South Giziga bible

DAN 8

¹Ti Baltazar mazum buy ngi vi mimakir naŋ na, ya Daniyel i pur gwat le ti kleŋ, a dirba ngi dumbuŋ na.

²I ra pur gwat ti kleŋ, keɗ na, ya a Sus walahay madiɗaŋ, angi hirwuy ngi buy miwi li ngi Etam, i ra pura ti kleŋ, ya vuna, ya gweˀ a mi mizaw Ulay.

³I zuɓa hirnga paɗɗa ɓa i pur hiri, keɗ na: zlengerek deŋ a mi mizawa. Naŋ ti durumoy cuw. Durumoyo, taŋ jek jek haɗa, pal numuŋ naŋ jek haɗa, a funa mekeleme le, mijek tuwa, a puso a dirba.

⁴I pura na, zlengerek tuwa, ara kiɗ gwat ti durumo kini tisi pas ngi pastaˀ, tir vay muŋ, waɗ tir vay ruwuyo, gwat misahmi macici a mbuŋ naŋ gu anta ko pal ta, yo matiɓa gwat gu ti vaˀa ko pal anta. A ga gwataka naŋ mawuɗ, yo ara gil.

⁵I ra wuluk ara zleˀe, keɗ na, bazuway a bo tisi pas ngi pastaˀa. A bula ruwuyo bal bal kurzluˀ, amma a ɗuva sar a ruwuyo ta. Bazuway nah vuna, naŋ ti durumoy giŋ giŋ ar wala ngi hiriheye.

⁶A so sesẽŋ a ciki zlengerek misi durum cuw, ya mupura deŋ a mi mizaw tuwa, a kil ng'ava ti gidaŋ naŋ wãˀ.

⁷I ra pura, a ndil a ciki zlengereke, a zuɓ mevel fõh fõh ng'ara. A kiɗa zlengerek tuwa, a ngilaŋ durumoyo cuw taŋ, zlengerek a lum gidaŋ ngi cici a mbuŋ naŋ gu ta. A zlumbura nga ruwuy, a gudubura asi sar. Mbur ngi tiɓa zlengerek avaˀa, ko anta loŋ ta.

⁸Bazuway ara gil kuy kuy. Amma naŋ minaha vu so na, durum naŋ madiɗa tuwa a ngil, mekelemey yor mufaɗ, a boko ar li naŋ, pulaˀ pulaˀ ng'asi diˀis mumufaɗaya.

⁹Avu durum pal numuŋ, mekelem meciɗek wãˀ a bawa, a gil haɗa ng'ar vay ruwuy, ng'asi pas ngi miprik waɗ tir vay [1] hirwuy mimezle haɗa.

¹⁰A cici zlak ngi kiɗa vu ati vurum ngi muŋhoy. Vurum ngi muŋhoy cah waɗ wurzlaŋhaya, a zliɗo taŋ nga ruwuy, a gudubura taŋ asi sar.

¹¹A cici zlak ngi kiɗa vu ko ati yarma ngi vurum ngi muŋhoy vuna, a tika mikuli magakaŋ di vur hin gara, a waha si virzi ngi hay ngi Buymisemuŋ.

¹²Vurum ngi muŋhoy jom ati mikuli magaka vur hin gara, a vulaka taŋ ti mevel. Durumo, a hizigo ɓi mikaslsla nga ruwuy. Gwat naŋ muwuɗ gar ngi gi na, a gi le.

¹³Akẽh so na, i cin ˀay ngi modro maɓi, yo modro mekelem a cufuɗaŋ: «Gwat ngi mikuli magaka vur hin gar, mevel ngi waha virzi ngi hay muvula le da Buymisemuŋ ati vurum ngi muŋ maguduburaka asi sar na, pur naŋ ti kleŋ, a sa kiɗ mi hã ti vunaka?»

¹⁴A ɓiy: «Sey hiney a cohom durmuk durmuk cuw ti skat skat makir ɗagay, a dirba nah, hay ngi Buymisemuŋ a sa ndiraka ti jiviɗ naŋ.»

¹⁵Dambalaka, ti ya Daniyel mira pura gwat ti kleŋ, i wuɗ i sla wala naŋ tuwa, keɗ na, mbur mibam vu ati mbur, a so deŋ a ciki ɗu.

¹⁶Joˀ i cin ˀay ngi mbur mawudo ti mizaw Ulay, a ɓi: «Gabriyel! Mbur hana mupura gwat ti kleŋ na, inga slaŋ wala nah.»

¹⁷A so ng'aciki ɗu, ar li ya mideŋ ara na, ti naŋ maso na, didak a muɗiy, i huruk huruk a ruwuy. Dar a ɓiy: «Ka mburu, cin ɗi, gwat ka mupura ti kleŋ na, i ngi kiɗa mi ngi hin.»

¹⁸Ti naŋ maɓiy na, i ro ɗokɗok, durus a ruwuy. A wusiy, a slikiɗiy deŋ ar li ɗu a muŋ.

¹⁹Joˀ a ɓiy: «Gwat masa ndilo a dirba mevel mufõh fõh na, i wuɗ i njukuw di, asi kiɗa mi ngi hin i misla le si.

²⁰Zlengerek misi durum cuw ka mupura na, i buy ngi Medi ati ngi Persehey.

²¹Bazuway misi ngwic dibizik na, i buy Grek. Durum madiɗa misi a wuzla hirihey na, i buy mudumbuŋ.

²²Ti durum mingil na, mekelemey a boko mufaɗ ar li naŋ. Tayna i buyoy mufaɗ masa boko ti hirwuy nah, amma anta a lumaka gidaŋ nga naŋ na ta.

²³Ar kiɗa mi ngi zumabuy taŋ na, misi moˀorehey a gaka moˀore taŋ, a mbam di le muduba so na, a dirba nah, buy muhuhumo vu, misi wer ngi tikina vu a sa bawa.

²⁴Gidaŋ naŋ ngi wi mizli, a sa ru nga mbuŋ nga mbuŋ, amma anta ti gidaŋ ngi hirnga naŋ ta. A sa wuh gwatay haɗa, yo gwat naŋ muwuɗ le ngi gi gar na, a sa gi. A sa ngizl mizli migidaŋhay, mizli ngi Bumbulvuŋhay.

²⁵Naŋ misi ti wer tuwa, a sa si na tikina vu gisiŋ gisiŋ. A sa gil ti huhumo vu a mevele, yo a sa ngisl zigiduw mapuraka kaɓa taŋ zuy zuyo. A sa zlir didak ati madiɗa ngi yarmahay, amma a sa ngilakaŋ ngiɓac ngiɓac, ko mitiɓi naŋ anta pal ta.

²⁶Ka mupur gwatay ti kleŋ ngi pastaˀ ati ngi miprik kaɓa miɓaka ɓi naŋ na, naŋ kaslsla gisiŋ. Ka ja gwat ka mupura ti kleŋ hana ɗum a kwacay ɗik. Asi naŋ vur hin mikileŋhey.»

²⁷Ya Daniyele, i ra hĩhĩy, ya guta, ɓaˀ hin mbeˀ mbeˀe. A dirba nah, i slikiɗ, i gi slra ngi buy. Wuluk ara giriy, vur ɓi ngi gwat ya mupura ti kleŋ na, amma ko mbur misla wala naŋ anta.