Read South Giziga Bel 1 Bible Online

Bel 1 - South Giziga bible

Bel 1

¹Ti Astiyage, buy madiɗa ngi Medes mumuc na, Sirus, mbur Perse a zuɓa li naŋ.

²Buy a wuɗ Daniyele haɗa fineˀ mizli mekelem ngi mamay naŋhaya. Pas mekeleme, n’ada pulaŋ vu mbak da naŋ.

³Dambalaka mizli Babiloŋhoy a ciɗam kuli Bel le. Vur hin gar na, a vulakaŋ hapa gwat ngi kilo skat skat zlum, tumuŋ kukur mufaɗ, waɗ mbaazla gwat ngi litir skat skat cuw ti kukur zlum.

⁴Buy ada ga mikuli da kuli nana vuna, vur hin gar, a ra ru nga dilik a mbuŋ naŋ. Amma Daniyele, a dilik nga naŋ, a mbuŋ Buymisemuŋ naŋ. Ngi pas mekelem ada na, buy a ɓa Daniyele: «Ka ki dilik a mbuŋ kuli Bele ta vur mike?»

⁵Daniyel a mbiɗaŋ di: «Y’anta dilik a mbuŋ gwat mizli miciɗaka ti ciɗe ta. Yi dilik sey a mbuŋ Buymisemuŋ misi ti siifa, miga muŋ ati ruwuy, yo naŋ ti gidaŋ ar gwat misi ti siifahay gar.»

⁶Buy a ɓaŋ ma: «Ki pura kaɓa kuli Bele, naŋ ti siifa ta kwa? Gwat naŋ mazuma, yo naŋ masa vur hin gar na, k’anta pura ta kwa?»

⁷Daniyel a singir, joˀ a ɓaŋ: «Aw buy, gwat minjah na, anja ki sina. Kuli nana, ti huroˀo, i mindira ti hohoy, tiavra, i ɓiri gaza. Ko a zum daˀ ta, a si gwat daˀ ta.»

⁸Buy a zuɓ himaˀ, a zilo masay ngi Beleye cek, joˀ a ɓa taŋ: «Gwat ngi zum, kum mavulaka da kuli Bel na, mazuma i waka, da ki ɓikiy di ta na, ki sa mucam. Amma da ki ɓikiy di le, i naŋ vuna mazuma na, i Daniyel masa mucu, asi a za kuli ndra le.»

⁹Daniyel a ɓa buyo: «Mi ka miɓa na, anja a gaka kanah.»

¹⁰Migi mikuli ngi Beleye, taŋ kukur tarnaˀa, yo ngwas taŋhay ati ziri taŋhay ada ma. Buy a soko ati Daniyele, ng’ar hay ngi kuli Bel tuwa.

¹¹Masayay a ɓakaŋ: «Kumani, ndr’i sa bam tir hay ngi kuli, ka ki sa ga mikuli da Bele, ti gwat ngi zum ati mbaazla milihiɗa [1] so. Ki sa gica miviŋ giceˀ, waɗ haŋ ɗik taˀ ara.

¹²Ki sa mo ti priki, da ki sa luma Bel a zuma gwataya ta na, ki sa kiɗa ndra vagay vagay. Amma da a zuma taŋ le na, ki sa kiɗ Daniyel, asi a kupa ndra ɓi le.»

¹³Mizli masayaya, a puraka kaɓa gwat ngi gi taŋ a ra ru kaslsla, a ra huhumom vu. Dambalaka na, a gurom vigiɗ le yaŋ ti ruwuyo, a ra bi seŋseŋ ar li gi mikuli. Ar pas gar, a cam ti ra nga hila gwat ngir li gi mikuli.

¹⁴Masayay mibam si na, buy a ɗuva gwat ngi mikuli da Bele. Daniyel a ɓa migi slra naŋhaya, joˀ a soko ti fucu. A paka ferfer gun hirnga ngi li gi mikuli, sey buy pal naŋ misinaŋ. A dirba naŋ, a boko, a zliraka miviŋ, buy a ɗuva haŋ naŋ taˀtaˀ ara, joˀ a cohom.

¹⁵Ngi duvuɗo, masayay a soko ati ngwas taŋhay waɗ ziri taŋhaya, a zumaka gwat muvulaka da Bel tuwa wãˀ waɗ a saka mbaazla paya ma.

¹⁶Li naŋ muwun na, buy a bam ngi li ati Daniyele ng’ar hay ngi gi mikuli.

¹⁷Dar a cufuɗaŋ: «Haŋ ɗu, ya muɗuva na, n’ada nga naŋ nga naŋ takwa Daniyel?» Daniyel a mbiɗaŋ di: «Haˀaw kumani, n’ada nga naŋ nga naŋ.»

¹⁸Taŋ muwunaka miviŋ wun, buyo hiri taˀ ng’ar li gi mikuli si na, joˀ a ɓi: «Yawwa Bel, ka madiɗa, ko anta lumam ɓi ngi tikina vu avi ka ta!»

¹⁹Daniyele mbak singir. Buy mawuɗ a ci ng’ar hay ngi mikuli na, a tika tak, a ɓaŋ: «Pur hiri nga ruwuy. Sar hanayna, i ngi wani ka? Ki sina taŋ le kwa?»

²⁰Buy a ɓi: «I pura na, i sar ngi ziley, ngi ngwasay waɗ ngi ziri.

²¹Buy a zuɓ himaˀ, a ja masayaya, jom ti ngwas taŋhay waɗ ziri taŋhaya. Masayay a bugakaŋ vigiɗ miyaŋ, taŋ micam ti ra ng’ar hay ngi mikuli, ngi zuma gwat misi ar tabuloy tuwa.

²²Buy a ngizla taŋ pay. A vula kuli Bele da Daniyel. Joˀ Daniyel a ngurufo ngrof ngurof jom ti hay naŋ wãˀ ma.

²³Mizli Babiloŋhoy ada dilikam a mbuŋ kaw madiɗa ya.

²⁴Ngi pas numuŋ ada na, buy a ɓa Daniyele: «Kuli kawa, ki ɓi naŋ manja siifa na, ki ɓiy gu mata. Dilik a mbuŋ naŋ muduba so!»

²⁵Daniyel a mbiɗaŋ di: «I sa dilik sey a mbuŋ Bumbulvuŋ Buymisemuŋ ɗu. Asi Buymisemuŋ misi siifa pal i naŋ.

²⁶Da ki ngum le na buy, i sa kiɗa kaw madiɗa hana manja maslalam, yo manja ganday ma.» Buy a ɓaŋ: «I puluw jiviɗ naŋ le.»

²⁷Daniyel a wuɗ mukuturmbuy ati mungul waɗ megebec. A vurɗo taŋ cek, a ja leŋ leŋ, waɗ a pa taŋ nga balam kaw madiɗa tuwa. Kaw a nda taŋ, a mucu. Joˀ Daniyel a ɓi: «Puraka gwat kum madilikam a mbuŋ naŋ tuwa so.»

²⁸Mizli Babiloŋhoy micinaka ɓi naŋ na, a ja taŋ mevel haɗa, a kusom tiŋ tiŋ ngi mbiɗa hirnga da buyo. A ɓam na: «Buy a tiri mbur Yude le. A waha kuli Bele le, a kiɗa kaw madiɗa le, yo a ngizla masayaya le ma.»

²⁹Aram, a ra lumaka buyo, a ɓakaŋ: «Vula ndra Daniyele ɓa i kiɗaka vagay. Da ki ngum ta na, ndr’i sa kuɗukuw jom ati mizli ngi hay ɗikeye.»

³⁰Buy a pura na, a surokoŋ mi le kuy kuy wãˀ. A pura na, sey a vula taŋ Daniyel.

³¹Mizli Babiloŋhoy a hizigaka Daniyele ng’ar butum ngi mobor. A gi adiga hin merkeɗ.

³²Ar butum nana, moboroy ara tarnaˀ. Vur hin gar na, a vulaka taŋ vagay ngi mizli cuw waɗ tumuŋhoy cuw ma. Amma ti nana, a vulaka taŋ gwat neˀ ta, ɓa sey a humbiɗaka Daniyele gbaˀa.

³³Hirak ti nana, mijiviɗ Habakuk, a ro asi ruwuy Zuda. A di lar le deˀ deˀ, a pa ar sikiɗ waɗ peŋ mingila meɗ meɗ sek a cikeˀe. A ru di da migi sifihey ar guva.

³⁴Modro ngi Bumbulvuŋ a ɓaŋ: «Ɗaf ka maru di na, a ra vula da Daniyel. N’ani ar butum ngi moboroy a Babiloŋ.»

³⁵Habakuk a mbiɗaŋ di: «Aw buy ɗu, i ru daˀ a Babiloŋ ta, i sina butum nah vuna ta.»

³⁶Modro ngi Bumbulvuŋ tuwa, a jaŋ kaw avi ngwic hirnga. A kil di faw kutum fineˀ himiɗe, seŋseŋ a Babiloŋ. A cica deŋ a mi butum tuwa.

³⁷Habakuk a zilaŋ: «Daniyel, Daniyel! Sawa tuɓa ɗaf Buymisemuŋ mislinuw di ani.»

³⁸Daniyel a mbiɗaŋ di: «Aw Buymisemuŋ ɗu, ki wuluk le keŋ ar ya. Mizli mawuɗukuw na, k’anta pula taŋ ta.»

³⁹Daniyel a ra zuma ɗafa, dambalaka, modro ngi Buymisemuŋ a kil ti Habakuko le faw nga ruwuy naŋ amuŋ.

⁴⁰Ngi hin mitarnaˀ naŋ na, buy a so nga tuwa vagay ngi Daniyele. Naŋ mindilo a mi butumo, keɗ nga huroˀo na, Daniyel a ro joˀ setette gwaɗ naŋ.

⁴¹Dar buy a widi ti ˀay bok: «Bumbulvuŋ, Buymisemuŋ ngi Daniyel, ka madiɗa gisiŋ. Buymisemuŋ mekelem anta mbak ka ta.

⁴²A ɓa mizli, joˀ a boko ti Daniyele tir butumo. A pa mizli mawuɗam kiɗa hirnga ngi Daniyel tuwa gar ng’ara. Moboroy a humbiɗaka taŋ a hahãŋ, daˀ a mihiri ngi buy vuna si.