Read South Giziga HOS 1 Bible Online

HOS 1 - South Giziga bible

HOS 1

¹Ti Zoroboˀam, mangal ngi Zoˀas mazum buy a ruwuy Israyel na, Oze mangal ngi Beˀeri, Bumbulvuŋ a ɓaŋ ɓi le. Ti di nah, Oziyas, Yotam, Ahas waɗ Ezekiyas ara zumam buy ar ruwuy Zuda ma.

²Mingiɓi ngi Bumbulvuŋ miɓa ti balam Oze na, zli virzi naŋ n'ani. Bumbulvuŋ a ɓa Oze na: «Aru, zuɓ ngi ngwasa, i ngwas magi sulome vur Buymisemuŋ. Ziri kum masa ya ka taŋ ati naŋ na, i ziri ngi ngwas sulomehey, asi mike na, hirwuy taˀ gar a mbiɗa duba le da Bumbulvuŋ, ara gam sulome lambaˀ.»

³Joˀ Oze ara zuɓ ngi ngwasa i Gomer, zuŋ ngi Diblayim. Gomer a gi hur, a yaŋ mangal mizile.

⁴Dar Bumbulvuŋ a ɓa Oze: «Mangal ɗik na, caŋ slimiɗe Zizreyel, asi hin neˀ ng'aka, pumbus ngi mizli Zizreyel na, i sa cufuɗa ɓi naŋ avu dideˀ ngi Zehuhoy, yo zumabuy ngi Israyele, i sa kiɗa tay wãˀ avra.

⁵Hin a sa ndilawa, tapasa i sa vuso soje ngi Israyeley ar sozo ngi Zizreyel.»

⁶Gomer tuwa a gi hur ma, a yi zuŋ mongoso. Joˀ Bumbulvuŋ a ɓa Oze: «Ki sa zila Lo-Ruhama mbiɗe avra: ‹Mapurakaŋ ircece ta› asi y'anta sa pura ircece da Israyeleye mata, i sa pula pura taŋ ircece wãˀa.

⁷Amma, i sa pura ircece da hay ngi Zuda ɓula, yo ya Bumbulvuŋ Buymisemuŋ taŋ, i sa laha taŋ, y'anta sa laha taŋ ti lek ta, ti maslalam ta, ti gi vurum ta, ti pilisey ta, ti misi pilisey ta ma.»

⁸A dirba Lo-Ruhama mupula ɗuwa na, Gomer a gi hur, a yi mangal mizile.

⁹Bumbulvuŋ a ɓaŋ na: «Caŋ slimiɗe Lo-Ami, mbiɗe avra: ‹Mizli ɗuwoy ta›, asi kum i mizli ɗuwoy ta, yo ya kwana, yi zliram neˀ le ati kumo ta.»