Read South Giziga HOS 10 Bible Online

HOS 10 - South Giziga bible

HOS 10

¹Israyele zleˀe, naŋ kaɓa gudubun mafuyuk, mayi zinga haɗa zleˀe. Yi naŋ masik nga mbuŋ na, naŋ kwana, ara ska li gi mikuli naŋhaya nga mbuŋ aya. Hirwuy naŋ matiri mezle nga mbuŋ na, naŋ kwana, ara ga wuya da ɗugur kuliheye nga mbuŋ ya.

²Mevel ngi Israyeley i malambaˀa, wurenna, a sa wurkaka malambaˀ taŋ na: Bumbulvuŋ ti haŋ naŋ, a sa mbizla li gi mikuli taŋhaya, yo a sa waha ɗugur taŋ ngi kuliheye.

³Wurenna so na, a ɓam: «Buy ndra misi anta na, asi ndra mazluwunam ti Bumbulvuŋ ta na. Na zle buy vuna, a sa ga ndra mi gu da ndra ka?»

⁴A ra gam mi wuwwo, ara hudumom tir zluɓo si, ara juwam ɓi ngi ngiɓiˀay, dar ɓimujuwa mitaˀ gara, a bo yõˀ yõˀ kaɓa giziŋ malambaˀ ar guva muhufa le.

⁵Samarihey ara jijikam asi ziri sla ngi Bet-Even. Mizli naŋhay ati mizli mawaka vu taŋ kaɓa masay naŋhay na, a roko ar vagay, vur ɓi ngi zuŋ sla vuna. Wurenna, mezle ngi zuŋ sla mihaɗa na, a ram di le kileŋ avu ndra, anja a mumulom vurˀe.

⁶Zuŋ sla kwana, a sa ram di nga Asiri, ara vulaka ngatara da buy madiɗa. Vurˀe, Efrayim a sa ndir ti mesem, yo Israyeley kwana, a sa pam mesem avu mukuluwa ɓi taŋ.

⁷Ɓi ngi Samari a kiɗ mi le. Buy naŋ a ro capapa, kaɓa dum mubuk ɓaˀ a hirnga yam.

⁸Li miɗingir ɗingir ngi gi kuliheye, a sa susuyumoko taŋ avra, i li Israyeley migam mungra ar taŋ. Sisim ati hadaway a sa tiɓaka li gi mikuli taŋhaya, a sa ɓaka muwãhaya: «Ɗumom ndra!» A sa ɓaka li miɗingireye: «Diɗoko ng'ar ndra!»

⁹Israyel, zle ti gwat migi a Gibeya na, ki gi mungra le, na ki wus neˀ ta. Migi mungra madiɗahaya, kiɗa vu ara ndila taŋ sey a Gibeya cummo takwa?

¹⁰Yi wuɗ i kuta taŋ ti bonoy, asi malambaˀ taŋ madiɗa misi makaw cuw na, mizli a sa ngiɓam ˀay ng'ar taŋ.

¹¹Efrayime, naŋ kaɓa bulkoŋ misirkaka le kuy kuy, mangum ɓa ɗugom di daw. Ya mupura ˀay naŋ migiŋ giŋ na, i juwa galalaŋ da Efrayime kaˀ. Zuda ara giruw, Israyele kwana, ara siɗilo di ti dirba.

¹²Zligam hilfa mijeŋŋe ɓa kisa gam sifi mezle. Ngumam guva nawaya. Ɓa ngi sipa Bumbulvuŋ na, sey wurenna, hã a sa po gi jeŋŋe naŋ ng'ar kum.

¹³Kumo, ki zligam hilfa ngi moˀore, kisa gam sifi ngi gwat malambaˀ madiɗaŋ, ani ki zumam yi ngi slire le. «Israyel, ki ka mevel ɗike le ar gidaŋ ɗiki waɗ ar migi vurum ɗikey mimbeˀ mbeˀ na.

¹⁴Gi mi muhoyo hoyo a slikiɗ le a wuzla mizli ɗikeye, mbak walahay ɗik muguno ti moholoyo a sa mbizlaka taŋ kaɓa buy Salman mumbuzla Bet-Arbel yo naŋ mikiɗa mumuŋ ngi ziri jom ati ziri taŋhay cek na.

¹⁵Gwat kum migaka a Betel na, migir kum i hana so, a gi kanah, asi moˀore kum mihaɗa wãˀ na. Ti miprik prik na, ɓi ngi buy Israyel a sa kiɗ mi.»