Read South Giziga HOS 11 Bible Online

HOS 11 - South Giziga bible

HOS 11

¹Bumbulvuŋ a ɓi na: «Ti Israyel misi i zuŋ zuŋ aruŋ na, i wuɗaŋ le, yo naŋ mangal ɗu na, i zilo di le ti Ezipte.

²Amma da i ra zilaka taŋ na, taŋ a kiraham kileŋ avu ya. Taŋ, a gaka mikuli nga taŋ da Baˀal , yo gwat ngi vul ngi wur ti wuro, a vulaka nga taŋ da kuli miciɗa ti ciɗey.

³Efrayime, mudubunaŋ ru i ya ngbaŋ, i jaŋ kaw avu haŋ, amma, ya majigina taŋ kuy kuy na, ko t'anta puraka ta.

⁴I ra ɗiɗa taŋ ti mezle, kaɓa ji ngama ngi mbur titiraŋ, mujumo ndra ati taŋ i wuɗa vu. I gi ti taŋ, kaɓa mazuɓam zuŋ gaza gumbaˀ a didak, i vulaŋ gwat ngi zumo.

⁵Israyele, naŋ anta sa mi nga Ezipte mata, masa waŋ i ruwuy Asiri, asi taŋ mungumam mo ng'avi ya ta na.

⁶Kiɗavu ti maslalama, a sa guno walahay taŋhaya, a sa vuso gwat ngi cika vu a hirnga taŋhaya, a ngizla taŋ pay, asi taŋ makuluwam ɓi na.

⁷Mizli ɗuwoyo a hĩyãka pula sipa jiviɗ ɗu le, ara zilaka taŋ nga muŋ, amma ko mbur mislikiɗ loŋ anta.

⁸Efrayim, i sa guw mbrike? I sa pula Israyel a si haŋ ɗik kwa? Ɓa i sa gi ti kakaɓa walahay Atma na, mbri mbrike? yo i sa tiri ti kakaɓa walahay Seboyim na, mbri mbrike? A giy le welele a mevel ɗu, waɗ mana, ircece anta avu ya mata.

⁹Y'anta sa gi fõh fõh kaɓa mevel ɗu na ta. Y'anta sa mo nga ngizla Efrayimeye ta, asi yi Buymisemuŋ, yi mbur titira ta. A hay ɗike, ya pal y'anta sa mo ti mevel fõh fõh mata.

¹⁰A sa ram ɓaˀa asi Bumbulvuŋ, Bumbulvuŋ matuwuy kaɓa mobor. Ziri a sa kiloko tisi pas ngi mipirike, ti jijik kirkir, asi tuwuy naŋ misi kaɓa ngi mobor tuwa.

¹¹A sa kiloko ti Ezipte, wuw kaɓa juroy, a sa kiloko ti Asuro, wuw kaɓa ɗiyuw dirgwaɗay, i sa ga ɓa a cifam ar hay taŋhay. I ya Bumbulvuŋ miɓa.