Read South Giziga HOS 12 Bible Online

HOS 12 - South Giziga bible

HOS 12

¹Mizli Efrayimey ara gunikiy gun ti slir, mizli Israyeleye, ara tikinikiy. Amma Zuda, naŋ a ro ɓaˀ asi Buymisemuŋ aruŋ, yo a ro teŋteŋ avu Mipal wãˀa.

²Efrayim a mbi le ti himiɗi, a roko hiipas ar li kil asi himiɗ ngi si pas ngi mipriki, ara gam slir, yo ara gam moˀore haɗa haɗa. A ra jumom ˀay ati Asirihey, a vulaka mala da Eziptehey.

³Bumbulvuŋ a ro ar kiita ati Zudahaya, yo ara luuma mizli ngi Zakopoy asi gwat ngi gi taŋ malambaˀ na, a sa kuta taŋ weˀe avu gwat ngi gi taŋ.

⁴Ti Zakop misi a kwacay aruŋ na, a tiɓa li le avu sukum naŋ, ani a tiri mbur le mana, a kiɗam vu le ati Buymisemuŋ.

⁵A kiɗam vu le ati modro ngi Buymisemuŋ, joˀ modro ngi Buymisemuŋ a lum bugawla ar naŋ. Zakop a tuwuy, a tumbuloŋ. A zliram ati Buymisemuŋ a Betel, Buymisemuŋ miɓa ndra ɓi na, a diga.

⁶Bumbulvuŋ, Buymisemuŋ, i Buy ngi sojehey, a zilakaŋ ti slimiɗ naŋ kanah.

⁷Ka so na, sey ki mo ng'avu Buymisemuŋ ɗiki, ndir teŋteŋ, ga gwatakasl kasla, yo njih hiri njah asi Buymisemuŋ ɗiki.

⁸Kanaˀanay a roko ti kilo ngi tikina mizli kaw kaw a haŋ, a wuɗam hul haɗa.

⁹Joˀ Efrayimey a ɓam: «I gi zlili le si, i lum zlili le, ko anta sa lumam mungra neˀ le ar gwat ngi gi ɗu ta.»

¹⁰Amma yi Bumbulvuŋ Buymisemuŋ ɗik, diga zle a ruwuy Egipte. I sa ga ɓa ki ra cifi ar walahay guɗuk ɗik a muŋ, kaɓa ar hin ya mizlir ti kum tuwa.

¹¹I sa ɓa ɓi da mijiviɗeye, i sa ga ɓa a puram gwatay haɗa, ya mibiga taŋ di, Ɓi ɗuwoy miweˀ ti wi, i sa ɓo taŋ ti balam mijiviɗey.

¹²Da Galaˀat i migi malambaˀ si na, naɓa taŋ, a tiram le i mizli ngi pula girey ta. Ar li ngi mikuli misi a Gilgala, a gam mikuli ti gusoŋhoy ko mbak le ta, yo mana, li gi mikuli taŋhaya, taŋ kaɓa ɗuguroy mizikitiŋ zikitiŋ lambaˀ ar guvahay.

¹³Zakopo, a kil le nga Mezopotami vay muŋ, Israyel a gi slra ngi luuma ngwasa. a jigin ginewey ngi luuma ngwas.

¹⁴Amma Bumbulvuŋ a ga, ɓa mijiviɗ naŋ a bo ti Israyele ti ruwuy Ezipte. yo ɓa mijiviɗ naŋ a jiginaŋ.

¹⁵Efrayime, a ga gwat mukuy ta le haɗa da Buymisemuŋ, ɓi ngi pumbus taŋ mipaka na, Bumbulvuŋ taŋ a sa mbiɗa nga hirnga taŋ a muŋ, yo a sa mataŋ ti zi taŋ mizakaŋ na a muŋ.