Read South Giziga HOS 13 Bible Online

HOS 13 - South Giziga bible

HOS 13

¹Da Efrayim ara ɓi ɓi na, didak ara muɗa Israyele. Amma naŋ mihuruk huruk a mbuŋ Baˀal na, a tiri di migi malamba le, a muc na, aseˀe.

²Ani wurenna kwana, ara gam mungra vuna aruŋ: a ɗiyam gwatay ti ɓiri muluwusla, ti sin taŋ, a pam kulihey ti ɓiri bara taŋhaya. Hana gar, i slra ngi mizli misina ɗiya gwatay. Mizli maɓam: «Mizli titirahay, masayay ara curuɓoko mi da kuli ziri slahaya» na, vurˀe.

³Mizli tayna, a sa susuymom kutum kaɓa gazlavay masusuyum ti mipriki, yo kaɓa wulngar ngi miprik masufu. A sa susuymom kaɓa giziŋ himiɗ makil di kileŋ avu məlaŋ, yo kaɓa cunju mabi tir li mufoŋ.

⁴I ya Bumbulvuŋ Buymisemuŋ kum, zle a ruwuy Ezipte. Mbak ya le na, Buymisemuŋ kumo mekelem anta. Milih kum mekelem anta, sey i ya pal ɗu,

⁵Ti ka misi a wuzlaɓuh mikirɗak kirɗak, ar li mumuˀulo na, yi sinuw a diga.

⁶Kum mindiloko ndil ar li misi gwat ngi zum ara si na, ki mbam le, amma kum mimbam si na, joˀ ki huhumomvu, kum mupuyukom hirnga ti ya na vurˀe.

⁷Avu kumo, yi tiri kaɓa mobor, kaɓa dirlengeŋ a jiviɗi, i juɗukum.

⁸I zlukum ngi ji, kaɓa luˀuf mijaka ziri naŋhay le, i ngirukum didakaya pitikay pitikay. I sa nguwukum ngaw ngaw daˀ arleˀe kaɓa madiya mobor manguw useˀ, dar gwat ngi ɓuhoy a sa puwukum meɗ meɗ.

⁹Israyel, ani ki mihirya le, makil widi ɗik gu, i ya pal ɗu.

¹⁰Buy ɗik madiɗa tuwa n'ama, ɓa a lihuw ar walahay ɗikeye gar ka? Migi kiita ɗikeye t'amaka? Ki ɓi zleˀe: «Vula ndra buy madiɗa ati buyoy» kini takwa?

¹¹Ani i vuluw buyo le, amma i ro ti mevel ar ka, yo ti himaˀ ɗu, i tiɓa le a muŋ.

¹²Gwat malambaˀ ngi Efrayime, i ja le a hirnga, mungra taŋ, i wi di vu le ɓaˀa.

¹³Vu a sa jaŋ, kaɓa maji ngwas ngi yi. Naŋ, i mangal manja lesle. Da hin a ndilo le ɓa a yakaŋ na, a ngum bo ti kwacay mumuŋ ta.

¹⁴Ɓa i mbuɗo hirnga taŋ, ti ruwuy ngi mizli mumucahaya sukwa? Ɓa i tuɓo taŋ ti vu muco sukwa? Mucu, bonoy ɗik ka maga da mizli tuwa naŋ maka? Li ngi mizli mumucahay, mozorbono ka mangizl di mizli tuwa naŋ maka? Ko ɓi ngi pura ircece anta avu ya mata.

¹⁵Ko Efrayim a sik le a wuzla sukum naŋhaya tekeɗe kwana, himiɗ ngi si pas ngi miprik a sa sawa, i himiɗ ngi Bumbulvuŋ masa so ti wuzlaɓuh mikirɗak kirɗaka: joˀ miviɗiviɗi ngi yam a sa hisik, vigiɗ ngi yam a sa muˀul, a sa tiɓaka zlili naŋ, gwat mupuɗaw puɗaw naŋhaya gar.